ខេត្តសៀមរាប៖នៅពេលថ្មីៗនេះក្រុមបណ្តាញទំនាក់ទំនងសង្គមដែលហៅកាត់ថា facebook និងពលរដ្ឋមួយចំនួននៅក្នុងខេត្តសៀមរាបបានធ្វើការរិះគន់ទៅលើអាជ្ញាធរពាក់ពន្ធ័ជាពិសេសខាង សហភាពសហពន្ធ័យុវជនកម្ពុជា(ស.ស.យ.ក) ថាបានចំលងក្បាច់ចម្លាក់ក្លោងទ្វារពីប្រទេសជិតខាង ប៉ុន្តែករណីនេះត្រូវបានអ្នកនាំពាក្យរបស់សហភាពសហពន្ធ័យុវជនកម្ពុជា(ស.ស.យ.ក)ច្រានចោលទាំងស្រុង ដោយសារការរិះគន់នេះមិនមានមូលដ្ឋានត្រឹមត្រូវ និងអ្នកខ្លះឆ្លៀតគេងចំនេញខាងនយោបាយ។ ព័ត៌មានដែលផ្ទុះពីរឿងក្លោងទ្វារនេះកើតឡើងនៅដើមខែមេសាឆ្នាំ២០១៥នេះ ដែលខាង(ស.ស.យ.ក)កសាងឡើងនៅតាមផ្លូវឆ្ពោះទៅកាន់ប្រាសាទអង្គរ។
តាមប្រភពពីពលរដ្ឋម្នាក់ដែលសុំមិនបញ្ចេញឈ្មោះបានប្រាប់ថា ការសាងសង់ក្លោងទ្វារនេះមិនដែលឃើញមាននៅក្នុងខេត្តសៀមរាបនេះទេ ទើបតែពេលនេះឃើញគេសាងសង់ឡើងនៅតាមផ្លូវទៅប្រាសាទអង្គរវត្ត ។ប្រភពដដែលបន្តថា ការសាងសង់នេះមើលទៅហាក់បីដូចក្បាច់ចម្លាក់របស់ប្រទេសវៀតណាម តែត្រង់ថានៅជំនាន់ណានោះលោកមិនបានចាំនោះទេ ហើយទម្រង់ពណ៌ទាំងនេះ ទៀតសោតរឹតតែស្រដៀងនឹងក្បាច់ចម្លាក់របស់ប្រទេសវៀតណាម ត្រង់មានលាបពណ៌ចំរុះច្រើនពេក ហើយក្បាច់ខ្មែរយើងពុំមានលក្ខណៈដូច្នេះទេ។ប្រភពមួយផ្សេងទៀតបានឲ្យដឹងថា ការសាងសង់ក្លោងទ្វារនេះគាត់មានការចាប់អារម្មណ៍ត្រង់ថា កន្លងទៅមិនដែលធ្លាប់ឃើញមាននៅខេត្តសៀមរាបទេ ហើយបញ្ហានេះក៏មិនមែនជាបញ្ហាចោទធ្ងន់ធ្ងរនោះដែរ។
ទាក់ទិនទៅនឹងការរិះគន់របស់ ក្រុមបណ្តាញទំនាក់ទំនងសង្គម ដែលហៅកាត់ថា facebook និងពលរដ្ឋមួយចំនួននៅក្នុងខេត្តសៀមរាបនេះដែរ ត្រូវបានលោក សោម រតនា អ្នកនាំពាក្យរបស់សហភាពសហពន្ធ័យុវជនកម្ពុជា(ស.ស.យ.ក)មានប្រសាសន៍ឲ្យដឹងនៅរសៀលថ្ងៃទី០៤ខែមេសានេះថា ការសាងសង់ក្លោងទ្វារអង្គរសង្គ្រាន្តនៅក្នុងបរិវេនប្រាសាទអង្គរវត្តនេះ មិនមានអីខុសនោះទេ គឺធ្វើទៅតាមរូបចម្លាក់នឹងផ្ទាំងសិលាចរឹក និងមាននៅក្នុងក្បាច់ផ្កាច័ន្ទដែលសុទ្ធសឹងជារបស់ខ្មែរ។លោកបន្តថា គោលបំណងរបស់(ស.ស.យ.ក)មិនមែនត្រឹមតែបង្ហាញពីវប្បធម៌ អរិយធម៌ របស់ខ្មែរនោះទេ គឺយើងធ្វើឲ្យមានការទាក់ទាញ ទើបបានពេលខ្លះមានលាយពណ៌ដើម្បីបង្ហាញឲ្យមានការចាប់អារម្មណ៏។លោកបន្ថែមថា ចំពោះ
ការលើកឡើងរបស់ពលរដ្ឋនឹងសង្គមហ្វេសបុកថាយកស្តាយរបស់ប្រទេសជិតខាង នោះគឺជាសេរីភាពរបស់ពួគគេ ប៉ុន្តែគ្រាន់តែចង់បញ្ជាក់ថា អ្វីទៅជាស្តាយគេនិងជាក្បាច់របស់គេនោះ។លោកបន្ថែមទៀតថា ចំពោះក្លោងទ្វារនេះខាង សសយក មិនមានអ្វីផ្លាស់ប្តូរនោះទេ ព្រោះ ការរិះគន់ទាំងនោះមិនមានមូលដ្ឋានត្រឹមត្រូវ ជាពិសេសការរិះគន់មួយចំនួន សុំកុំឲ្យមានការលំអៀងទៅខាងផ្នែកនយោបាយ ព្រោះការធ្វើក្លោងទ្វារ នេះមានទិសដៅតែមួយគត់គឺដើម្បីទាក់ទាញនូវចំណាប់អារម្មណ៍របស់ភ្ញៀវទេសចរណ៍ជាតិនិងអន្តរជាតិ និងជាពិសេសនោះមិនធ្វើអ្វីឲ្យហួសពីវប្បធម៌និងអរិយធម៌របស់ខ្មែរនោះឡើយ៕
