បុរសម្នាក់អាងខ្លួនជាអ្នកមាន ស្រវឹងស្រាបានបើករថយន្តសេរីទំនើបមួយគ្រឿង ដេញបុកយុវជន២នាក់ ដោយមានការភ័យតក់ស្លុតពេក ក៏ដួលម៉ូតូរងរបួស ហើយបុរសម្នាក់នោះ បានស្រែកថា ពួកគេជាចោរថែមទៀតផង ហេតុការណ៍នេះ បង្កការណ៍ភ្ញាក់ផ្អើល កាលពីវេលា
ម៉ោង១១នឹង៣០នាទីយប់ ថ្ងៃទី៥ ខែមេសា ឆ្នាំ២០១៥ តាមបណ្តោយផ្លូវបេតុង នៅចំណុចមុខផ្ទះសំណាក់ថប ខាងក្រោយវិទ្យាល័យជាស៊ីមសាមគ្គី ស្ថិតក្នុងសង្កាត់ទឹកល្អក់៣ ខណ្ឌទួលគោក ។
តាមសម្តីរៀបរាប់ ពីជនរងគ្រោះសុំមិនបញ្ចេញឈ្មោះ បានឱ្យដឹងថា នៅមុនពេលកើតហេតុ រូបគេទាំង២នាក់ បានចេញពីផឹកស៊ីបន្តិចបន្ទួច នៅផ្ទះមិត្តភក្ត្រ ហើយវេលាម៉ោងកើតហេតុ បានជិះម៉ូតូស្តុបពីមយយគ្រឿង បំណងត្រឡប់ទៅផ្ទះរបស់ខ្លួនវិញ នៅម្តុំកន្លែងកើតហេតុ ខណះធ្វើដំណើរជិតដល់ស្តុបណូគានោះ ស្រាប់តែមាន រថយន្តសេរីទំនើបមួយគ្រឿង ម៉ាកហាយប្រ៊ីដ ពណ៍ខ្មៅ ពាក់ស្លាក លេខខេមរៈភូមិន្ទ 2-2375 ដែលបើកបរដោយបុរសម្នាក់ ទំនងជាស្ថិតក្នុងស្ថានភាពស្រវឹងស្រា បើកមកពីក្រោយក្នុងល្បឿនយ៉ាងលឿនគៀរពួកគេ ។
ប្រភពបន្តថា ឃើញដូចនេះ ពួកគេបានអែបចូលគៀន ហើយបានព្យាយាមជិះរត់គេច ប៉ុន្តែត្រូវបានរថយន្តនោះដេញរហូត ដល់ខាងក្រោយវិទ្យាល័យជាស៊ីមសាមគ្គី មុខនឹងផ្ទះសំណាក់ថប ដោយមានការភ័យតក់ស្លុតពេក ក៏បានដួលម៉ូតូទាំងកំរោល បណ្តាលឱ្យរងរបួសទាំង២នាក់ ភ្លាមៗនោះ អ្នកបើកបររថយន្តបានចុះមក ហើយបានស្រែកឆោរឡោរឡើងថា ពួកគេគឺជាចោរថែមទៀតផង បង្កឱ្យមានការភ្ញាក់ផ្អើល ដល់ប្រជាពលរដ្ឋជិតខាងនោះ ។ ហើយដោយខ្លាចផងនោះ ពួកគេបានរត់ពួន និងបានទំនាក់ទំនងទៅក្រុមគ្រួសារ និងសមត្ថកិច្ចឱ្យមកភ្លាមៗផងដែរ ។ មិនតែប៉ុណ្ណោះបុរសដែលជាអ្នកបើកបររថយន្ត អាងខ្លួនជាអ្នកមាន និងរថយន្តពាក់សុតតែស្លាកលេខ ខេមរភូមិន្ទផងនោះ បានបញ្ចេញអាកប្បកិរិយាមិនសមរម្យ និងបានស្រែកឡូឡារដាក់គេដាក់ឯង ហាក់ដូចជាមិនញញឺតនឹងសមត្ថកិច្ច ក៏ដូចជាកម្លាំងកងរាជអាវុធហត្ថ ដែលចុះទៅអន្តរាគមន៍បន្តិចទាល់តែសោះ ហើយបានចង្អុលមុខជន រងគ្រោះ យុវជនទាំង២នាក់ថា ជាអ្នកគប់កញ្ចក់រថយន្តរបស់ខ្លួនទៅវិញ ទាំងពួកគេបានប្រកែកថា មិនដឹងអ្វីទាល់តែសោះ និងមិនឱ្យអ្នកកាសែត ថតថែមទៀតផង ដោយនិយាយថាគ្មាន់សិទ្ឋនោះទេ ។
ដោយមិនចង់មានរឿងវែងឆ្ងាយ ជនរងគ្រោះបានទាមទារសំណង់ថ្លៃព្យាបាល និងខូចខាតម៉ូតូចំនួន២០០ដុល្លារ ដើម្បីបញ្ចប់រឿង ប៉ុន្តែភាគីខាងរថយន្តមិនព្រម សមត្ថកិច្ចក៏សម្រេច យកទាំងរថយន្តនិងម៉ូតូ ទៅរក្សាទុក នៅអធិការដ្ឋាន ខណ្ឌទួលគោក រង់ចាំដោះស្រាយគ្នានាពេលក្រោយ ៕
