បាត់ដំបង៖ ជនសង្ស័យម្នាក់រួមទាំងវត្ថុតាងដែលជាប្រភេទសារធាតុញៀន ត្រូវបានសមត្ថកិច្ចនៃអធិការដ្ឋាននគរបាលស្រុកសំពៅលូន ធ្វើការតាមប្រមាញ់និងបង្ក្រាបបានកាលពីថ្ងៃទី4-4-15វេលាម៉ោង3រសៀល ត្រង់ចំនុចក្រពើហា ស្ថិតក្នុងភូមិរស្មី ឃុំជ្រៃសីមា ស្រុកសំពៅលូន
ខេត្តបាត់ដំបងខណ:ដែលជននេះកំពុងប្រព្រឹត្តនូវករណីជួញដូរ កាន់កាប់ និងរក្សាទុកនូវគ្រឿងញៀនខុសច្បាប់ជាក់ស្តែង។
យោងតាមកំណត់ហេតុរបស់សមត្ថកិច្ចបានបញ្ជាក់ថា មុនកិច្ចប្រតិបត្តិការបង្ក្រាបនេះ
លោកអធិការបានទទួលនូវសេចក្តីរាយការថា មានករណីជួញដូរគ្រឿងញៀនខុសច្បាប់មួយដែលបាននិងកំពុងធ្វើសកម្មភាពជាក់ស្តែងនៅត្រង់ចំនុចខាងលើ ទើបសមត្ថកិច្ចបានចេញប្រតិបត្តិការភ្លាមៗដោយប្រទះឃើញមុខសញ្ញាម្នាក់ទៅតាមការរាយការក៏សំរេចឃាត់ខ្លួនយកមកកាន់អធិការដ្ឋានដើម្បីសាកសួរ ព្រមទាំងបានដកហូតនូវសារធាតុញៀនចំនួន4កញ្ចប់តូចដែលជនសង្ស័យបានវេចខ្ចប់នៅក្នុងថង់ព៌ណខ្មៅ ហើយបោះចោលទៅលើដី។
ក្រោយពេលត្រួតពិនិត្យ សមត្ថកិច្ចបានប្រទះឃើញមានថ្នាំញៀនប្រភេទយ៉ាម៉ាចំនួន120
គ្រាប់ ដែលជនសង្ស័យនេះមានឈ្មោះ ឌឹម រតនា ភេទប្រុស អាយុ23ឆ្នាំ រស់នៅភូមិចំបក់ ឃុំជ្រៃសីមាស្រុកសំពៅលូន ខេត្តបាត់ដំបង បើទោះបីជាជននេះមានចេតនាលាក់លៀមមិនបានបកស្រាយបំភ្លឺថាកន្លងមករូបគេធ្លាប់បានរកសុីចំនួនប៉ុន្មានដងក៏ដោយ ក៏សមត្ថកិច្ចបានកំណត់រួចជាស្រេចដែរថាជននេះគឺជាមុខសញ្ញាជួញដូរយ៉ាងសកម្មដែរ ដែលសមត្ថកិច្ចបានដាក់កំលាំងតាមប្រមាញ់ជាយូរមក ហើយ ដោយគ្រាន់តែមិនទាន់មានឱកាសតែប៉ុណ្ណោះ។បច្ចុប្បន្នក្រោយពេលឃាត់ខ្លួន កំលាំងនគរបាលនៃអធិការដ្ឋានស្រុកសំពៅលូនបាន និងកំពុងរៀបចំសំណុំរឿងដើម្បីបញ្ជូនខ្លួន ព្រមទាំងវត្ថុតាង ទៅកាន់សាលាដំបូងហើយ ដោយទុកអោយតុលាការមានវិធានការទៅតាមផ្លូវច្បាប់៕
