បុរស៣នាក់បានរងរបួសធ្ងន់និងស្រាល ដោយសារតែពួកគេ ទាស់ពាក្យសំដីគ្នា រឿងជិះម៉ូតូ មើកមុខគ្នា ហើយដកកាំបិទដេញកាប់គ្នា តាមផងផ្លូវសាធារណៈ បង្កឲ្យមានការភ្ញាក់ផ្អើល ដល់សមត្ថកិច្ច ចុះឃាត់ខ្លួនបានភ្លាមៗតែម្តង ។ ហេតុការណ៍ភ្ញាក់ផ្អើលនេះ បានកើតឡើង
កាលពីវេលាម៉ោង១និង១០នាទី រំលងអាធ្រាត ឈានចូលថ្ងៃទី៦ ខែមេសា ឆ្នាំ២០១៥ នៅចំណុចជញ្ជីងថ្លឹងឡាន តាមបណ្តោយផ្លូវលេខ២០០៤ ស្ថិតក្នុងសង្កាត់កាកាប ខណ្ឌពោធិ៍សែនជ័យ ។ ជនរងគ្រោះត្រូវបានគេស្គាល់ឈ្មោះ ឯក វណ្ណៈ ភេទប្រុស អាយុ១៩ឆ្នាំ ទី២ឈ្មោះ រ័ត្ន រិទ្ធទីណូ ភេទប្រុស អាយុ២០ឆ្នាំ នាក់ទាំង២ ស្នាក់នៅតាមបណ្តោយផ្លូវលេខ២០០៤ សង្កាត់កាកាប ខណ្ឌពោធិ៍សែនជ័យ ។ ចំណែកជនបង្កឈ្មោះ ម៉េង សេង ភេទប្រុស អាយុ៣០ឆ្នាំ ស្នាក់នៅភូមិក្រាំងរវា សង្កាត់ចោមចៅ ខណ្ឌពោធិ៍សែនជ័យ មានស្រុកកំណើត នៅភូមិព្រែកតាអិន ឃុំព្រែកតាអិន ស្រុកកោះធំ ខេត្តកណ្តាល ។ យោងតាមសាក្សីនៅកន្លែងកើតហេតុ បានឲ្យដឹងថា មុនពេល
កើតហេតុ ជនរងគ្រោះបានជិះម៉ូតូមួយគ្រឿង មកពីទិញស្រាបៀរផឹក ជិះតាមបណ្តោយផ្លូវលេខ២០០៤ ក្នុងទិសដៅពីលិចទៅកើត ខណៈមកដល់ចំណុចជញ្ជីងថ្លឹងឡាន ស្រាប់តែងាកមើលបុរសម្នាក់ឈ្មោះ ម៉េង សេង ដែលកំពុងអង្គុយលើម៉ូតូ ឈប់ចាំប្រពន្ធចេញពីធ្វើការ ។ បន្ទាប់មកឈ្មោះ ម៉េង សេង បានស្រែកទៅកាន់ជនរងគ្រោះថា មើលមុខអី បើខ្លាំងឈប់ម៉ូតូមកវាយគ្នា បន្ទាប់មកឈ្មោះ រ័ត្ន រិទ្ធទីណូ និងឈ្មោះ ឯក វណ្ណៈ ក៏បានយកម៉ូតូទុកក្នុងផ្ទះរួចដើរមកវាយ ឈ្មោះម៉េង សេង បណ្តាលឲ្យវាយទៅវិញទៅមក និងដកកាំបិទដេញកាប់គ្នា តាមដងផ្លូវសារធារណៈ យ៉ាងអាធិបតេយ្យ ផ្អើលដល់ប្រជាពលរដ្ឋ នៅជិតនិងនាក់ដំណើរដើររត់ឈប់មើល និងនាក់ខ្លះបានរាយការណ៍ទៅសមត្ថ្កកិច្ច ចុះមកឃាត់ខ្លួនបានភ្លាមៗតែម្តង និងដក់ហូតបានកាំបិទមួយដើមផងដែរ។ សាក្សីដដែលបានបន្តថា ទាក់ទិននិងហេតុការណ៍នេះ បង្កឡើងដោយសារតែទំនាស់សំដី គ្នាពេលជិះម៉ូតូមើលមុខគ្នា ។
ក្រោយពេលកើតហេតុ ជនរងគ្រោះដែលរបួសធ្ងន់ ត្រូវបានបញ្ជូនទៅសង្គ្រោះ នៅមន្ទីរពេទ្យភ្លាមៗ ចំណែកនាក់របួសស្រាល សមត្ថកិច្ចបានធ្វើការឃាត់ខ្លួន និងនាំយកទៅសាកសួរ នៅប៉ុស្ថិ៍នគរបាលកាកាប ដើម្បីដោះស្រាយតាមក្រោយ ៕
