បាត់ដំបង៖ លំនៅដ្ឋានមួយខ្នងដែលមានលក្ខណ:ថ្មក្រោមឈើលើ បានក្លាយទៅជាចំណីភ្លើងតែក្នុងរយ:ពេលមួយប៉ព្រិចភ្នែក ដែលអគ្គីភ័យនេះបានឆាបឆេះឡើងកាលពីវេលាម៉ោង10,15នាទីយប់ថ្ងៃទី5-4-15 ត្រង់ចំនុចភូមិកំពង់ព្រះ ឃុំកំពង់ព្រះ ស្រុកសង្កែ ខេត្តបាត់ដំបង បន្ទាប់ពី
ម្ចាស់ផ្ទះបានបង្កាត់ភ្លើងចង្ក្រានដើម្បីដាក់កំដៅខសាច់ជ្រូកដែលនៅសល់ពីការសែនឆេងម៉េងពីថ្ងៃ ហើយក៏ចូលទៅសំរាកលង់លក់ដោយមិនបានពន្លត់វា។
តាមការអះអាងពីប្រជាពលរដ្ឋដែលរស់នៅក្បែចំនុចកើតហេតុបាននិយាយថា នៅមុន
ពេលកើតហេតុគឺពួកគាត់បានឃើញផ្សែង និងអណ្តាតភ្លើងបានចាប់ផ្តើមហុយចេញពីដំបូលផ្ទះរបស់អ្នកភូមិម្នាក់ឈ្មោះ យូ ធិន ភេទប្រុស អាយុ52ឆ្នាំ ដែលផ្ទះនេះមានលក្ខណ:ថ្មក្រោម ឈើលើហើយនៅពេលនោះដែរទំនងជាម្ចាស់ផ្ទះដេកលក់គឺមិនបានដឹងថាមានអ្វីកំពុងកើតឡើងនោះទេទើបពួកគាត់បាននាំគ្នាស្រែកឆោរឡោឡើង ទើបគេឃើញម្ចាស់ផ្ទះស្ទុះចេញមកដោយនាំគ្នាប្រមូលយកទ្រព្យសម្បត្តិសំខាន់ៗចេញមកក្រៅ ក្នុងនោះក៏បានអូសគោយន្ត និងជញ្ជូនស្រូវចេញបានមួយចំនួនផងដែរ នេះក៏ដោយសារតែមានការជួយអន្តរាគមន៍ពីប្រជាពលរដ្ឋ ព្រោះអណ្តាតភ្លើងត្រូវបានឆេះឡើងចាប់ពីជាន់ខាងលើចុះមកវិញ។ស្របពេលជាមួយគ្នានោះដែរ សមត្ថកិច្ចមូលដ្ឋានក៏បានទូរស័ព្ទសុំទៅខាងអគ្គីភ័យនៃស្នងការដ្ឋាននគរបាលខេត្តដើម្បីអោយជួយអន្តរាគមន៍។
មួយសន្ទុះក្រោយមកក៏មានរថយន្តបង្ការ ពន្លត់អគ្គីភ័យបានចុះទៅដល់ ប៉ុន្តែដោយសារតែ
កំលាំងភ្លើងមានការឆាបឆេះលឿនផងនោះ ផ្ទះដែលរងគ្រោះត្រូវភ្លើងឆេះស្ទើរទាំងស្រុងទៅហើយដូច្នេះរថយន្តទឹកបានត្រឹមតែបាញ់ការពារ និងទប់ស្កាត់កុំអោយអណ្តាតភ្លើងនេះមានការឆេះរាលដាល. ទៅលំនៅដ្ឋានដទៃតែប៉ុណ្ណោះ ដោយប្រើប្រាស់ទឹកអស់តែពីររថយន្ត នៅទីបំផុតផ្ទះមួយខ្នងដែលមានទំហំ 7ម៉ែត្រគុណនឹង8ម៉ែត្រ ធ្វើអំពីថ្មក្រោម ឈើលើ ប្រក់ក្បឿងត្រូវឆេះខ្ទេចទាំងស្រុង។
លោកយូ ធិន ជាម្ចាស់ផ្ទះបានរៀបរាប់ទាំងភាពសោកស្តាយថា បើសរុបជាទឹកប្រាក់ទៅលើ
ផ្ទះមួយខ្នងនេះ ព្រមទាំងសម្ភារ:ដែលនៅក្នុងផ្ទះទាំងអស់ដែលអគ្គីភ័យបានបំផ្លាញប្រហែល3ម៉ឺនដុល្លារហើយលោកក៏បានទទួលស្គាល់ដែរអំពីកំហុសរបស់លោកក្នុងការធ្វេសប្រហែសដោយមិនបានពន្លត់ភ្លើងចង្ក្រានបាយ ដោយគិតថាវាមិនអី ព្រោះកាលពីថ្ងៃក្រោយពេលរៀបចំសែនឆេងម៉េងរួចមកលោកនិងអ្នកភូមិបាននាំគ្នារជួបជុំញុំលែងបន្តិចបន្ទួច ហើយបន្ទាប់មកខសាច់ជ្រូកដែលនៅសល់គ្រួសាររបស់លោកបានដាក់ភ្លើងកំដៅនៅលើចង្ក្រានខាងលើផ្ទះរួចក៏ចុះមកសំរាកនៅក្នុងបន្ទប់ខាងក្រោមផ្ទះ ទីបំផុតគឺអណ្តាតភ្លើងបានឆាបឆេះចេញពីចង្ក្រានខាងលើផ្ទះមែន ហើយកុំតែបានប្រជាពលរដ្ឋដែលនៅជុំវិញស្រែកហៅម្ល៉េះទ្រព្យសម្បត្តិសំខាន់ៗក៏មិនអាចយកចេញទាន់ដែរ។
ដោយឡែកលោកគឹម ប៊ុនធឿន នាយការិយាល័យបង្ការ ពន្លត់អគ្គីភ័យខេត្តបានបញ្ជាក់ថា
ភាពយ៉ឺតយ៉ាវរបស់អង្គភាពនេះក៏ដោយសារតែការរាយការរបស់ប្រជាពលរដ្ឋមានការយ៉ឺតយ៉ាវដែរម្យ៉ាងទៀតផ្លូវក៏ឆ្ងាយទំរាំចុះទៅដល់ផ្ទះនោះឆេះស្ទើរទាំងស្រុងទៅហើយ ដូច្នេះលោកក៏សុំអំពាវនាវដល់ប្រជាពលរដ្ឋទាំងអស់ មេត្តាបង្កើននូវការប្រុងប្រយ័ត្នដោយមុននឹងចូលទៅសំរាក ឬក៏ត្រូវធ្វើដំណើរទៅណាឆ្ងាយ ត្រូវពិនិត្យក្នុងផ្ទះអោយគ្រប់ជ្រុងជ្រោយដើម្បីជៀសវាងនូវបញ្ហាណាមួយដែលបានកើតឡើងជាយថាហេតុ៕
