កុមារ៤នាក់រស់នៅ ដោយក្រុមគ្រួសារបោះបង់ចោល ត្រូវបានអាជ្ញាធរខេត្ត បញ្ជូនយកមកអោយស្នាក់នៅក្នុងមណ្ឌលកុមារកំព្រា សប្បុរសជននានា ប្រធានមន្ទីរអង្គភាពជុំវិញខេត្ត និងឯ,ឧអភិបាលខេត្ត បានឧបត្ថម្ភថវិកា ជូនពួកគេសរុបជាងមួយពាន់ដុល្លា និងគ្រឿង
ឧបភោគបរិភោគ មួយចំនួនទៀត ។
នៅក្នុងពិធីសំណេះសំណាល និងចែកអំណោយ ជូនកុមារឯកកោ ទាំង៤នាក់ខាងលើនេះ ឯ,ឧ ឈួរ ច័ន្ទឌឿន អភិបាលខេត្តកំពង់ឆ្នាំង និងជាប្រធានកិត្តិយស គណៈកម្មការសាខា កាកបាទក្រហមខេត្ត បានថ្លែងអោយដឹងថា ក្រោយពីទទួលបានព័ត៌មាន ពីកាសែត វិទ្យុ និងទូរទស្សន៍ក្នុងស្រុក បានផ្សព្វផ្សាយនូវទុក្ខលំបាកវេទនា របស់កុមារ៤នាក់បងប្អូន ត្រូវក្រុមគ្រួសារ និងឪពុកម្តាយបោះបង់ចោល រស់នៅក្នុងភូមិក្រាំងស្គារត្បូង ឃុំក្រាំងស្គារ ស្រុកទឹកផុស កាលពីថ្ងៃទី៣០ ខែមិនា ឆ្នាំ២០១៥រួចមក គណៈបញ្ជាការឯកភាពខេត្ត បានធ្វើការកោះប្រជុំជាបន្ទាន់មួយ ដោយផ្តោតលើការជួយដោះស្រាយជីវភាព របស់កុមារឯកោទាំង៤នាក់ ។
បន្ទាប់មកលោកជំទាវ កែ ចន្ទ័មុនី អ្នកតំណាងរាស្ត្រ មណ្ឌលកំពង់ឆ្នាំង សាខាកាកបាទក្រហមខេត្ត និងសប្បុរសមួយចំនួន បាននាំយកអំណោយសង្គ្រោះ និងថវិកាមួយចំនួន យកទៅផ្តល់ជូនពួកគេ ដល់លំនៅដ្ឋានផងដែរ ។
ដោយមានការព្រួយបារម្មណ៍ អំពីសុខភាព សន្តិសុខ សុវត្តិភាព ជីវភាព និងការមិនបានរៀនសូត្រ ឯ,ឧអភិបាលខេត្ត ក៏បានសម្រេចចិត្តដឹកបញ្ជូនកុមារឯកោទាំង៤នាក់ មកអោយស្នាក់នៅក្នុងមណ្ឌលកុមារកំព្រារបស់ខេត្ត ។ ទន្ទឹមនោះដែរ អាជ្ញាធរខេត្ត ត្រូវគិតគូរបញ្ហា៤ជាចម្បង ក្នុងការជួយសង្គ្រោះ កុមារឯកកោក្រីក្រ ទាំង៤នាក់នេះ ១ អោយអាជ្ញាធរស្រុក ពិនិត្យដីធ្លីដែលកុមាររស់នៅមានប្លង់ឬអត់ ២ តើអាចសង់ផ្ទះអោយគេ នៅលើដីនោះបានឬទេ ៣ ត្រូវដោះស្រាយ អណ្តូងទឹកអោយបាន ៤ សន្តិសុខ សុវត្តិភាពក្មេង គួរជួយបែបណា ពេលពួកគេទុកលុយកាក់ ដែលសប្បុរសជនផ្តល់ អោយ ។ ប៉ុន្តែបញ្ហាសំខាន់នោះ គឺត្រូវគិតគូរពីសុខភាពកុមារមុនគេ និងគិតគូរអោយកុមារតូចៗ៣នាក់ បានចូលរៀន សូត្រដូចគេឯង ហេតុនេះហើយ ទើបអាជ្ញាធរខេត្ត សម្រេចបញ្ជូនពួកគេ អោយមករស់នៅ ក្នុងមណ្ឌលកុមារកំព្រាខេត្ត មួយរយៈសិន ។ ដោយឡែកបងៗពួកគេ៣នាក់ទៀត មានវ័យជាយុវជន អាចរស់ក្នុងលំនៅដ្ឋានពួកគេបាន ដោយអាជ្ញាធរខេត្ត ស្រុក និងជួយសាងសង់ផ្ទះ សំរាប់អោយពួកគេ រស់នៅបានសមរម្យផងដែរ ។
សូមរំលឹកផងដែរថា ឈ្មោះ ញឹម សៃ អាយុ៤៥ឆ្នាំ ត្រូវជាឪពុកកុមារទាំងនោះ ទៅមានប្រពន្ឋចុង រីឯម្តាយ ឈ្មោះ យ៉ុន នី អាយុ៤២ឆ្នាំ ទៅរកស៊ីនៅខេត្តមណ្ឌលគីរី បាត់ដំណឹងឈឹង ពួកគេនៅឯកកោ មានគ្នា៤នាក់ ១-ឈ្មោះ ស៊ឺ គឹមសាន អាយុ១៥ឆ្នាំ ជាអ្នកមើលការខុសត្រូវ និងចិញ្ចឹមប្អូនៗ ដោយការស៊ីឈ្នួលឃ្វាលគោអោយគេ ២-ឈ្មោះ ស៊ឺ កំ សត់ អាយុ១១ឆ្នាំ ភេទប្រុស ៣-ឈ្មោះ ស៊ឺ ស្រីនាថ អាយុ១០ឆ្នាំ ភេទស្រី និង៤-ឈ្មោះ ស៊ឺ ស្រីណៃ អាយុ៩ឆ្នាំ ភេទស្រី ពិការជើង ដោយពស់ចឹកដំបៅរលួយ ត្រូវពេទ្យកាត់ជើងមួយកំណាត់ ។
អំណោយរបស់សប្បុរស និងឯ,ឧអភិបាលខេត្ត យកទៅផ្តល់ជូនពួកគេ ក្នុងមណ្ឌលកុមារកំព្រា នៅព្រឹកថ្ងៃទី០៤ ខែមេសា ឆ្នាំ២០១៥ សរុបមានចំនួន ២.២០០.០០០រៀល និង៦០០ដុល្លា ក្នុងនោះអំណោយរបស់ឯ,ឧអភិបាលខេត្ត១០០ដុល្លា ,ឯឧត្តម អ៊ុក រ៉ាប៊ុន ២០០ដុល្លា , ឧកញ្ញា ស្រីងួន ស្រីវុឌ្ឍី ២០០ដុល្លា ,មន្ត្រីរាជការជុំវិញខេត្ត ១.១៧០.០០០រៀល និងអំណោយរបស់ចាងហ្វាងកាសែត កោះសន្តិភាព ១.០៣០.០០០រៀល និង១០០ដុល្លា ត្រូវបានប្រគល់ជូនលោកប្រធានមណ្ឌលកុមារកំព្រា ទុកដាក់ចាត់ចែងជូនកុមារកំព្រា៤នាក់ខាងលើ ៕ \
