ឧត្តរមានជ័យ៖ បុរសចំនួន៣នាក់ចេញពីផឹកស៊ី នៅផ្ទះមិត្តភ័ក្រស្រវឹងជោកជាំបាននាំគ្នាជិះម៉ូតូត្រលប់ទៅផ្ទះដល់ពាក់កណ្ដាលផ្លូវបានបុកគោយន្តកន្ត្រៃដឹកឈើបង្គូលក្រាក់បែកកង់ឈប់ចតនៅនិងចញ្ចើមផ្លូវលំពីក្រោយពេញមួយទំហឹងបណ្តាលឲ្យស្លាប់ម្នាក់និងរបួសធ្ងន់២នាក់។ហេតុ
ការបុរស៣នាក់ស្រវឹងជិះម៉ូតូបុកគោយន្តកន្ត្រៃដឹកឈើក្រាក់ពីក្រោយនោះ បានកើតឡើងនៅត្រង់ចំណុចលើផ្លូវលំ ស្ថិតនៅក្នុងភូមិស្រឡៅស្រោង ឃុំលំទង ស្រុកអន្លង់វែង ខេត្តឧត្តរមានជ័យ។
ប៉ូលិសសណ្តាប់ធ្នាប់ស្រុកបានឲ្យដឹងថា ជនរងគ្រោះដែលជិះម៉ូតូបុកគោយន្តកន្ត្រៃទាំង៣នាក់ ទាំងស្លាប់និងរបួសនោះបានឲ្យដឹងថា ១ឈ្មោះខ្លូ ភេទប្រុសអាយុ២០ឆ្នាំ រស់នៅភូមិស្រឡៅស្រោង ឃុំលំទង ស្រុកអន្លង់វែង ខេត្តឧត្តរមានជ័យ បើកម៉ូតូស្មាក់សេរីចាស់គ្មានស្លាកលេខ(ស្លាប់)និងនាក់រួមដំណើរឈ្មោះឆ្លើង ណាយ ភេទប្រុសអាយុ១៨ឆ្នាំរស់នៅភូមិ ឃុំជាមួយគ្នារបួសធ្ងន់២ឈ្មោះធឿន ហួរ ភេទប្រុសអាយុ២៥ឆ្នាំរស់នៅភូមិឃុំជាមួយគ្នារបួសធ្ងន់។រីឯនាក់បើកគោយន្តកន្ត្រៃឈ្មោះបាន សុខុម ភេទប្រុសអាយុ២៩ឆ្នាំរស់នៅភូមិអូរ ឃុំទានកាំ ស្រុកព្រះនេតព្រះ ខេត្តបន្ទាយមានជ័យ គ្មានរបួស។
នៅមុនពេលកើតហេតុប្រជាពលរដ្ឋបានឃើញគោយន្តកន្ត្រៃដឹកឈើក្រាក់ បែកកង់ឈប់ជាប់និងចិញ្ចើមផ្លូវហើយមានកាច់មែកឈើដាក់ពីក្រោយគោយន្តកន្ត្រៃនោះ៤ទៅ៥ម៉ែត្រ ហើយបានដាក់ភ្លើងពិលជាសញ្ញារបន្ថែមទៀត។តែដោយសារតែបុរសទាំង៣នាក់នោះស្រវឹងស្រាជោកជាំខ្លាំងពេកបានបើកម៉ូតូលឿនលើសល្បឿនកំណត់ក៏ជ្រុលទៅបុកគោយន្តដែលកំពុងតែឈប់ចតពេញមួយទំហឹងតែម្ដង។ សាក្សីនៅកន្លែងកើតហេតុបានបន្តទៀតថា ក្រោយពេលគ្រោះថ្នាក់ចរាចរណ៍ភ្លាមគាត់បានឃើញប៉ូលិសសណ្តាប់ធ្នាប់ផ្នែកចរាចរណ៍ស្រុកអន្លង់វែងចុះមកដល់កន្លែងកើតហេតុធ្វើការត្រួតពិនិត្យនិងវាស់វែង រួចប្រមូលវត្ថុតាងមករក្សាទុកនៅអធិការដ្ឋានស្រុករងចាំការដោះស្រាយជាក្រោយ។ រីឯសាកសពរងគ្រោះសមត្ថកិច្ចប្រគល់ទៅអោយក្រុមគ្រួសារយកទៅធ្វើបុណ្យតាមប្រពៃណី ដោយឡែកអ្នកដែលរងរបួសធ្ងន់ពីរនាក់ត្រូវសមត្ថកិច្ចជួយសង្គ្រោះបញ្ជូនមកកាន់មន្ទីរពេទ្យបង្អែកស្រុកអន្លង់វែង ៕
