ឯកឧត្តមឧត្តមសេនីយ៍ ហ៊ុន ម៉ាណែត នាយរងសេនាធិការចំរុះអគ្គមេបញ្ជាការរងកងយោធពលកងខេមរះភូមិន្ទ និង ជាមេបញ្ជាការរងកងទ័ពជើងគោក បានអញ្ជើញជាអធិបតីក្នុងពិធីចុះហត្ថលេខាចងសម្ព័ន្ធមេត្រីភាពរវាងកងពលតូចអន្តរាគមន៍លេខ ១៤ ជាមួយអាជ្ញាធរ
អគ្គីសនីកម្ពុជា និង អគ្គនាយកដ្ឋានអគ្គីសនីកម្ពុជា ។ ពិធីនេះបានប្រារព្វធ្វើនៅទីបញ្ជាការដ្ឋានកងពលតូចអន្តរាគមន៍លេខ ១៤ ដែលមានទីតាំងនៅភ្នំបាយឃ្លះ ស្ថិតក្នុងឃុំត្នោតជុំ ស្រុកក្រគរ ដោយមានការចូលរួមពីសំណាក់ ឯកឧត្តម ទី នរិន្ទ ប្រធានអាជ្ញាធរអគ្គីសនីកម្ពុជា ឯកឧត្តម កែវ រតនៈ ប្រតិភូរាជរដ្ឋាភិបាលទទួលបន្ទុកជាអគ្គនាយកអគ្គីសនីកម្ពុជា ឯកឧត្តម ម៉ៅ ធនិន អភិបាលនៃគណៈអភិបាលខេត្តពោធិ៍សាត់ និង ថ្នាក់ឧត្តមសេនីយ៍ វរះសេនីយ៍ជានាយទាហ៊ាន នាយទាហ៊ានរងមួយចំនួនទៀត ។
ឯកឧត្តមឧត្តមសេនីយ៍ គឹម សេងងន មេបញ្ជាការកងពលតូចអន្តរាគមន៍លេខ១៤ បានជំរាបជូនថា អង្គភាពមានផ្នែកចំនួន០៣, ការិយាល័យចំនួន០៩, កងអនុសេនាធំចំនួន០៧, កងអនុសេនាតូចចំនួន០១ និង ០៥វរះសេនាតូច ។ ទីបញ្ជាការកងពល ផ្នែក ការិយាល័យ កងអនុសេនាធំ កងអនុសេនាតូច ចំណុះកងពល, វរះសេនាតូចលេខ១៤១ ១៤៣ និង ១៤៤មានទីតាំងនៅស្រុកក្រគរ,វរះសេនាតូចលេខ១៤២ មានទីតាំងនៅស្រុកភ្នំក្រវាញ និង វរះសេនាតូចលេខ១៤៥ មានទីតាំងនៅឃុំថ្មដាស្រុកវាលវែង ។ កងពលមានភារកិច្ចសំខាន់ពីរ ទីមួយអន្តរាគមន៍ឲ្យកងទ័ពជើងគោក និង ទីពីរការពារព្រំដែនប្រវែង ៤៩គម ក្នុងឃុំថ្មដា ស្រុកវាលវែង ។ កាលចងសម្ព័ន្ធមេត្រីភាពជា មួយក្រសួងឧស្សាហកម្មរ៉ែ និង ថាមពលឯកឧត្តមរដ្ឋមន្ត្រី ស៊ុយ សែម បានជួយកសាងអគារថ្ម ចំនួន០២ខ្នង, អគារស្នាក់នៅ០១ខ្នង, អគារស្នាក់នៅវរះសេនាតូចលេខ ១៤១ និង អគារពេទ្យនៅទីបញ្ជាការកងពល ។
លេណដ្ឋានបញ្ជារ៉ឹងមាំ ចំនួន០១ ព្រមទាំងសម្ភារះប្រើប្រាស់មាន វិទ្យុទាក់ទង អគ្គីសនីប្រើពន្លឺព្រះអាទិត្យ ប្រេងឥន្ទនះ ថវិកា ស្បៀង និង គ្រឿងឧបភោគបរិភោបមួយចំនួនធំទៀត ។ ចំណែកធនាគាកាណាឌីយ៉ាបានជួយសាងសង់អគារស្នាក់ការ ចំនួន០២ខ្នង ស្រះទឹក០២កន្លែង សម្ភារះសំណង់ និង គ្រឿងឧបភោគបរិភោបមួយចំនួន ។ ក្រុមការងារថ្នាក់កណ្ដាលចុះជួយស្រុកក្រគរ ដែលមាន ឯកឧត្តម កែវ រតនៈ ជាប្រធានបានជួយកសាងស្រះទឹក០១, អិដ្ឋការ៉ូក្រាលសាលប្រជុំ និង ធ្វើពិធីជប់លៀងជូននាយទាហាននាយទាហានរងពលទាហាន និង គ្រួសារកងទ័ពបានចំនួន០៣លើក ។
ឯកឧត្តម កែវ រតនៈ ប្រតិភូរាជរដ្ឋាភិបាលទទួលបន្ទុកអគ្គនាយកអគ្គីសនីកម្ពុជាថ្លែងថាកន្លងមកឯកឧត្តមធ្លាប់តែធ្វើពិធីជប់លៀងជូនកងទ័ពយើងនៅក្រោយថ្ងៃបុណ្យចូលឆ្នាំថ្មីប្រពៃណីជាតិខ្មែរដោយសារក្នុងឱកាសនោះបងប្អូនយើងជាប់រវល់ការពារសន្តិសុខជូនប្រជាពលរដ្ឋដើរលេងកំសាន្តតាមទីវត្តអារាម និងរមណីយដ្ឋាននានាមិនបានចូលរួមនឹងគេ ។ ប៉ុន្តែដោយសារពេលនេះយើងធ្វើពិធីចងសម្ព័ន្ធមេត្រីភាពនឹងគ្នាជាថ្មី ទើបឯកឧត្តមភ្ជាប់ពិធីជុបលៀងជូនតែម្ដងទៅតាមការសម្របសម្រួលរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ ក្រោយពីចងសម្ព័ន្ធភាពហើយអាជ្ញាធរអគ្គីសនីកម្ពុជា និង អគ្គនាយកដ្ឋានអគ្គីសនីកម្ពុជានឹងចុះមកទីនេះជាញឹកញាប់ ដើម្បីជួយកសាងអង្គភាពក៍ដូចជាជួយទំនុកបំរុងដល់កងទ័ពយើងផងដែរ ។ លោកបញ្ជាក់ថាក្នុងពេលឆាប់ៗនេះ យើងនឹងតខ្សែរភ្លើងមកដល់ទីនេះដើម្បីឲ្យអង្គភាពកងពលតូចអន្តរាគមន៍លេខ១៤និងគ្រួសារកងទ័ពមានភ្លើងអគ្គីសនីប្រើប្រាស់ក្នុងតម្លៃសមរម្យ ។
ឯកឧត្តមឧត្តមសេនីយ៍ ហ៊ុន ម៉ាណែត បានពាំនាំសេចក្ដីនឹករលឹកពីសំណាក់សម្ដេចតេជោ និងសម្ដេចកិត្តិព្រឹទ្ធបណ្ឌិត ក៍ដូចជាថ្នាក់ដឹកនាំជាន់ខ្ពស់ នៃកងយោធពលខេមរៈភូមិន្ទទាំងអស់ដែលលោកតែងតែយកចិត្តទុកដាក់គិតគូរចំពោះកងទ័ពយើងគ្រប់ពេលវេលា ហើយនេះគឺជាលើកទី៧ហើយដែលឯកឧត្តមបានមកកាន់កងពលតូចអន្តរាគមន៍លេខ១៤នៅខេត្តពោធិ៍សាត់ ។ កន្លងមកឯកឧត្តមរដ្ឋមន្ត្រី ស៊ុយ សែម, ឯកឧត្តម កែវ រតៈ និង ធនាគារកាណាឌីយ៉ា បានជួយដល់អង្គភាពច្រើនណាស់ ទាំងការអភិវឌ្ព្យន៍ ការផ្ដល់សម្ភារះប្រើប្រាស់ និង ស្បៀងអាហារផ្សេងៗ ហើយពេលនេះយើងបានធ្វើពិធីចងសម្ព័ន្ធមេត្រីភាពជាមួយអាជ្ញាធរអគ្គីសនីកម្ពុជា និង អគ្គនាយកដ្ឋានអគ្គីសនីកម្ពុជា ដើម្បីជួយបន្តទៀត ។ សូមកសាង និងពង្រឹងកម្លាំងឲ្យមានទាំងបរិមាណ និង គុណភាព, កសាងធនធានមនុស្សតាមរៈការហ្វឹកហ្វឺនបង្កើនសមត្ថភាព និង គុណធ៌ម, រួមចំណែកការពាររដ្ឋធម្មនុញ្ញ ជាតិ សាសនា ព្រះមហាក្សត្រ , ជឿជាក់លើការដឹកនាំនិង ការពាររាជរដ្ឋាភិបាលស្របច្បាប់មិនឲ្យអ្នកណារំលោភបានឡើយ ,បង្កើនសាមគ្គីភាពផ្ទៃក្នុងព្រមទាំងមានទំនាក់ទំនងល្អជាមួយអាជ្ញាធរ សប្បុរសជន និង ប្រជាពលរដ្ឋ ។
ក្នុងឱកាសនោះគណៈអធិបតីបានធ្វើពិធីប្រគល់ម៉ូតូ ចំនួន០៥គ្រឿង ដល់អង្គភាពវរៈសេនាតូច ៥០៨ របស់តំបន់សឹករងខេត្ត សម្រាប់ជាមធ្យោបាយជិះបំរើការងារ ដែលក្នុងនោះម៉ាកវ៉េវ ០៣ គ្រឿង រួមជាមួយកុំព្យូទរយួរដៃ០១គ្រឿងទៀត ជាអំណោយរបស់ឯកឧត្តម ម៉ៅ ធនិន និង លោកជំទាវ និង ០២គ្រឿងម៉ាកស្មាស់ ជាអំណោយរបស់ ឯកឧត្តម គង់ វិបុល ប្រតិភូរាជរដ្ឋាភិបាលទទួលបន្ទុកអគ្គនាយកពន្ធដា ។ ចំណែកអំណោយរបស់ឯកឧត្តម កែវ រតនៈ មានមីយើង ចំនួន១២២៤កែស ទឹកបរិសុទ្ធ ៥០ កែស ទឹកក្រូច ៥០ កែស ទឹកផ្លែឈើ ៤៩ កែស ស្រាបៀរកម្ពុជា ២២០កែស ម្ហូបអាហារជាច្រើនមុខ និង តន្ត្រីរាំកំសាន្តជប់លៀងជូននាយទាហ៊ាន នាយទាហ៊ានរង ពលទាហ៊ាន និង គ្រួសារទាហ៊ាន សរុប១០៤៦នាក់ដើម្បីអបអរសាទរបុណ្យចូលឆ្នាំថ្មីប្រពៃណីជាតិខ្មែរនារាត្រីនោះផងដែរ ៕
