នៅក្នុងកិច្ចប្រជុំបូកសរុបការងារត្រីមាសទី១ និងទិសដៅអនុវត្តន៍ការងារត្រីមាសទី២ ឆ្នាំ២០១៥ របស់អគ្គបញ្ជាការ នៃកងយោធពលខេមរភូមិន្ទ ឯកឧត្តម នាយឧត្តមសេនីយ៍ ប៉ុល សារឿនអគ្គមេ បញ្ជាការបានថ្លែងថា៖ គ្រប់បណ្តាកងឯកភាពនៃកងយោធពលខេមរភូមិន្ទរក្សាបានយ៉ាង ខ្ជាប់ខ្ជួនក្នុងការគោរពវិន័យ មានសាមគ្គីផ្ទៃក្នុងអោយបានស្អិតរមួត បន្តខិតខំហ្វឹកហ្វឺនរៀនសូត្រ និងអនុវត្តតូនាទីភារកិច្ចរបស់ខ្លួន ទទួលបានស្នាដៃគួរជាទីមោទនៈ រក្សាការពារបានយ៉ាងរឹងមាំនូវអធិបតេយ្យភាព បូរណភាពទឹកដីនៃព្រះរាជាណាចក្រ កម្ពុជា និងរក្សាបានល្អនូវចំណងមិត្តភាពរវាងកងទ័ពនៃបណ្តាប្រទេសជាមិត្ត។
ឯកឧត្តម នាយឧត្តមសេនីយ៍ ប៉ុល សារឿន បានវាយតម្លៃខ្ពស់ចំពោះស្នាដៃទាំងឡាយ ដែលកងយោធពលខេមរភូមិន្ទសម្រចបាននូវភារកិច្ចជាច្រើនជូនប្រទេសជាតិ លើភារកិច្ចការពារជាតិ និងការ ចូលរួមទប់ស្កាត់បង្ក្រាបរាល់បទល្មើសនានា ដោយរក្សាបាននូវស្ថិរភាព សន្តិសុខ សណ្តាប់ធ្នាប់សង្គមបានល្អប្រសើរជូន សង្គមជាតិ។
ឯកឧត្តម ប៉ុល សារឿន បានបញ្ជាក់ថា យើងត្រូវយកចិត្តទុក ដាក់អនុវត្តន៌បានម៉ឺងម៉ាត់នូវយុទ្ធសាស្ត្រ៣ សកម្មភាព១០ របស់សម្តេចតេជោនាយករដ្ឋមន្ត្រី ដោយយកចិត្តទុកដាក់លើ ការពង្រឹងលើការងារ ហ្វឹកហ្វឺនដល់យោធិនវ័យក្មេងអោយមានសមត្ថភាពពេញលេញ ក្នុងការបំពេញភារកិច្ចប្រកបដោយ ស្មារតីឆន្ទៈមោះមុតក្នុងបុព្វហេតុការជាតិមាតុភូមិ យកចិត្តទុកដាក់ បន្ថែមទៀតលើការកសាង ពង្រឹងវិស័យការពារជាតិ ឲ្យបានរឹងមាំលើគ្រប់វិស័យ សំដៅឲ្យបណ្តាកងឯកភាពទាំងអស់ មានសមត្ថភាពគ្រប់គ្រាន់ក្នុងការរក្សាសន្តិភាព ស្ថេរភាព
នយោបាយ អធិបតេយ្យភាព បូរណភាពទឹកដី ការពារភាពសុខសាន្ត របស់ប្រជាជន បង្កនូវបរិយាកាសអំណោយផល សម្រាប់ការអភិវឌ្ឍន៍សេដ្ឋកិច្ចសង្គម។ យកចិត្តទុកដាក់ថែទាំកងកម្លាំង ប្រដាប់អាវុធគ្រប់ប្រភេទ ទាំងការបណ្តុះបណ្តាល ហ្វឹកហ្វឺនជីវភាពរស់នៅ ទាំងខាងស្មារតី សម្ភារៈ សំដៅធ្វើឲ្យមាន សមត្ថភាពគ្រប់គ្រាន់ក្នុងការបំពេញភារកិច្ច ពិសេសគឺ បណ្តាកងឯកភាពបំពេញការងារតាមព្រំដែនទាំងដែនគោក និង ដែនទឹក ដែនអាកាស។ ពង្រឹងពង្រីក ទំនាក់ទំនងល្អ ជាមួយកម្លាំងប្រទេសជិតខាង ដោះស្រាយបញ្ហាផ្សេងៗ ដោយ សនិ្តវិធី សំដៅកសាងព្រំដែនឲ្យក្លាយជាតំបន់សន្តិភាព មិត្តភាព សហប្រតិបតិ្តការ និងអភិវឌ្ឍន៍ ៕
