ខេត្តប៉ៃលិន៖ កាលពីព្រឹកថ្ងៃទី១០ ខែមេសា ឆ្នាំ២០១៥ នៅមន្ទីរសាធារណៈការខេត្តប៉ៃលិន មានរៀបចំពិធីសូត្រមន្តចំរើនព្រះបរិត្ត ទៅតាមទំនៀមទំលាប់ប្រពៃណីព្រះពុទ្ធសាសនា ដើម្បីត្រៀមទទួលអំណរសាទរពិធីបុណ្យចូលឆ្នាំថ្មីប្រពៃណីជាតិ ឆ្នាំមមែ សប្តស័ក ព.ស ២៥៥៩
ដែលនឹងឈានចូលមកដល់នាពេលឆាប់ៗខាងមុខនេះ ។អញ្ជើញចូលរួមក្នុងពិធីនេះដែរ មានលោកឌិន គឹម ប្រធានមន្ទីរសាធារណៈការខេត្តប៉ៃលិន ព្រមទាំងអស់លោក លោកស្រី ជាអនុប្រធានមន្ទីរសាធារណៈការ ,ប្រធាន អនុប្រធានការិយាល័យ នៃមន្ទីរសាធារណៈការ បុគ្គលិក កម្មករជាច្រើននាក់ផងដែរ ។អង្គពិធីបាននិមន្តព្រះចៅអធិការវត្តអូរច្រា និងព្រះថេរានុថេរៈ សូត្រមន្តចំរើនព្រះបរិត្ត រាប់បាត្រ បង្សុកូល ទៅតាមទំនៀមទំលាប់ប្រពៃណីព្រះពុទ្ធសាសនាដ៏រុងរឿងនៃយើង ដោយសូមឧទ្ទិសកុសលផលបុណ្យប្រកបដោយក្តីសទ្ធា តាមរយៈព្រះសង្ឃជាស្រែបុណ្យ នាពេលនេះ ជូនចំពោះដួងវិញ្ញាណក្ខន្ធថ្នាក់ដឹកនាំ និង មន្ត្រីនៃមន្ទីរសាធារណៈការខេត្ត ដែលបានបាត់បង់ជីវិតក្នុងបុព្វហេតុបំរើប្រទេសជាតិ មាតុភូមិ សូម ឲ្យដួងវិញ្ញាណក្ខន្ធ អ្នកទាំងអស់នោះ បានរំដោះចាកផុតពីកម្មពៀរវេរាទាំងឡាយ និងបានទៅសោយសុខដល់ឋានសុគតិភព កុំបីឃ្លៀងឃ្លាតឡើយ ។
អង្គពិធី ក៏បានឧទ្ទិសបួងសួងដល់គុណបុណ្យព្រះរតនត្រ័យកែវទាំង៣ ទេវតាឆ្នាំថ្មី ឆ្នាំមមែ ព្រះនាម រាត្យសាទេវី ដែលនឹងយាងមកគ្រប់គ្រងថែរក្សាទឹកដីព្រះរាជាណាចក្រកម្ពុជា សូមប្រោះព្រំ ប្រសិទ្ធពរជ័យ សិរីសួស្តី មហាប្រសើរ ជូនដល់មន្ត្រី បុគ្គលិក នៃមន្ទីរសាធារណៈការ និងដឹកជញ្ជូនខេត្តប៉ៃលិន សូមទទួលបាននូវសិរីសួស្តី ជ័យមង្គល និង វិបុលសុខគ្រប់ប្រការជាដរាបតរៀងទៅ ។
នៅក្នុងឱកាសនេះដែរ លោក ឌិន គឹម ប្រធានមន្ទីរសាធារណៈការ និងដឹកជញ្ជូនខេត្តប៉ៃលិន ក៏បានជួបសំណេះសំណាលជាមួយមន្ត្រីរបស់មន្ទីរ ដែលចូលនិវត្តន៍ ដោយបានលើកឡើងអំពីការវិវត្តន៍រីកចំរើននាពេលបច្ចុប្បន្ន របស់អង្គភាពមន្ទីរសាធារណៈការ គឺពិតជាពុំអាចកាត់ផ្តាច់បានពីការចូលរួមចំណែក ក្នុងការបំពេញភារកិច្ចស្នូលរបស់មន្ត្រីដែលចូលនិវត្តន៍យើងបានឡើយ ។ បន្ទាប់មកលោកប្រធានមន្ទីរ ក៏បានផ្តល់ប្រាក់ឧបត្ថម្ភជូនមន្ត្រីនៃមន្ទីរសាធារណៈការខេត្តផងដែរ ៕
