សៀមរាប៖កាលពីវេលាម៉ោង៤និង៥នាទីរសៀលថ្ងៃច័ន្ទនេះ អ្នកវិនិច្ឆ័យ របស់កំណត់ត្រាប្លែកៗនៅក្នុងពិភពលោក បានប្រកាសថានំអន្សមជ្រូកយក្សរបស់ខ្មែរមួយនេះ បានជាប់ក្នុងឯតទគ្គកម្មថ្មីនៃពិភពលោកហើយ។
អនុប្រធានសមាគមចុងភៅកម្ពុជា លោកឡុង បូរ៉ា មានប្រសាសន៍ថាការដែលនំអន្សមជ្រូកយក្សរបស់ខ្មែរ ជាប់ក្នុងកំណត់ត្រាពិភពលោក (Guiness World Record ) នេះវាគឺជានំអន្សមខ្មែរទី១ហើយ ដែលធ្វើឱ្យពិភពលោកបានស្គាល់។
((ជាមោទនៈភាពសម្រាប់ចុងភៅរបស់ខ្ញុំទី១ ក៏ជាមោទនៈភាពសម្រាប់ប្រជាជនសៀមរាបក៏ដូចជាប្រជាពលរដ្ឋខ្មែរទាំងមូលដែរ))។
សមាគមចុងភៅកម្ពុជា ដែលជាអ្នកធ្វើនំអន្សមជ្រូកយក្សមួយនេះ ឱ្យដឹងថាគេបានប្រើធាតុផ្សំជាច្រើនមុខ សរុបទម្ងន់៣២៦៤(បីពាន់ពីររយហុកសឹបបួន)គីឡូក្រាម ក្នុងនោះមានអង្ករដំណើរ១តោន ខ្ទិះដូង៤៩៩គីឡូក្រាមអំបិល១៥គីឡូក្រាម សណ្ដែកបាយ ៤៩៩គីឡូក្រាម សាច់ជ្រូកបីជាន់៥០៧គីឡូក្រាម ម្រេចកំពត៣គីឡូក្រាម ស្លឹកខ្ទឹមចិញ្ច្រាំ១៦គីឡូក្រាម ស្លឹកចេក៣៣៣គីឡូក្រាមនិងខ្សែចំណង៣៧៥គីឡូក្រាមជាដើម។
មន្ត្រីរៀបចំព្រឹត្តិការណ៍អង្គរសង្ក្រាន្តឆ្នាំ២០១៥ ឱ្យដឹងថា ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរឆ្នាំមមែនេះ គេមានបំណងជំរុញឯតទគ្គកម្មចំនួន២ ទៅក្នុងសៀវភៅកំណត់ត្រាពិភពលោក គឺទី១នំអន្សមជ្រូកយក្ស ដែលមានទម្ងន់៣២៦៤គីឡូក្រាម និងទី២ ការប្រមូលគ្នារាំចង្វាក់ម៉ាឌីហ្សូន ដែលមានមនុស្សចូលរួមចំនួន២០១៥(ពីរពាន់ដប់ប្រាំ)នាក់៕
ខេង ឧត្តម
