ឃុំក្បាលទឹក ស្រុកទឹកផុស ត្រូវជនខិលខូចមួយក្រុម លួចដុតបំផ្លាញចោល ដោយមិនដឹងមូលហេតុដំណាំហូបផ្លែ មានស្វាយ មៀន ខ្នុរ ប្រមាណ១២០០ដើម និងផ្ទះមួយខ្នង នៅក្នុងចំការមួយកន្លែង ស្ថិតនៅក្នុងណុចខ្សាច់ពូន ភូមិក្រសាំងដុះឡើង ឃុំក្បាលទឹក ស្រុកទឹកផុស ត្រូវបានជនខិលខូចមួយក្រុម នាំគ្នាដុចបំផ្លាញចោល ដោយមិនដឹងមូលហេតុ ។ ការដុតបំផ្លាញដំណាំខាងលើនេះ បានកើតឡើងនៅវេលាម៉ោង៩និង៥០នាទីព្រឹក នៅលើដីចំការ៥៥ហិកតា របស់លោក គង់ ប៊ុនធឿន និងអ្នកស្រី អ៊ុន ណាវី ដែលឯ,ឧ អភិបាលខេត្តកំពង់ឆ្នាំង បានចេញដីកាដកហូត ករណីនេះសមត្ថកិច្ច កំពុងស្រាវជ្រាវ តែមិនទាន់អោយ ដឹងពី មូលហេតុច្បាស់លាស់នៅឡើយ។
លោក សេង អេង អាយុ៥៦ឆ្នាំ និងប្រពន្ធឈ្មោះ យឹម ហេង អាយុ៥៥ឆ្នាំ ជាអ្នកស៊ីឈ្នួលចាំចំការ រស់នៅក្នុងទីតាំងកើតហេតុខាងលើ នៅព្រឹកថ្ងៃទី២០ ខែមេសា ឆ្នាំ២០១៥ បាននិយាយអោយអ្នកយកព័ត៌ មានយើងដឹងថា នៅម៉ោង៩និង៥០ព្រឹក ថ្ងៃទី១៩ ខែមេសា ឆ្នាំ២០១៥ ពួកគាត់បានឃើញភ្លើងព្រៃ កំពុងឆាបឆេះសន្ធោសន្ធៅ មានប្រវែងទទឹងប្រមាណ១០០ម៉ែត្រ ឆេះពីក្នុងចំការ ទិសខាងត្បូង ចំណុចផ្លូវរទេះ ដេញមកក្នុងចំការផ្នែកខាងជើង ពេលគាត់បានរត់ជិតដល់ប្រមាណ២០០ម៉ែត្រ គាត់បានឃើញមនុស្សប្រុស៥នាក់ បានចេញមកពីចំណុចភ្លើងឆេះ ដើរឡើងម៉ូតូ២គ្រឿង ជិះចេញទៅតាមផ្លូវលំ ទៅទិសខាងត្បូងបាត់ទៅ ។
នៅពេលភ្លើងឆេះដំណាំក្នុងចំការយ៉ាងសន្ធោសន្ធៅ មានប្រវែងវែងបែបនេះ ពួកគាត់ពុំមានលទ្ធភាព ពន្លត់បានឡើយ រហូតរាលដាលឆេះផ្ទះជញ្ជាំងស្លឹក ដំបូលសង្ក័សី ទំហំ៣មគុណ៤មអស់១ខ្នង និងដំណាំក្នុងចំការ ប្រមាណ១២០០ដើម ទើបរលត់វិញ ។
នៅព្រឹកថ្ងៃទី២០ ខែមេសា ឆ្នាំ២០១៥ នៅពេលទទួលព័ត៌មាន ពីភ្លើងឆេះចំការ ម្ចាស់ចំការបានទូរសព្ទ័ប្តឹងទៅប៉ុស្តិក្បាលទឹក លោកអធិការនគរបាលស្រុកទឹកផុស និងលោកស្នងការរង នគរបាលខេត្ត សុំអោយជួយអន្តរាគម ប៉ុន្តែមកដល់ពេលនេះ ពុំទាន់ទទួលបានព័ត៌មានអ្វី ពីសមត្ថកិច្ចនៅឡើយទេ ។
នាយប៉ុស្តិនគរបាលក្បាលទឹក បានអោយដឹងថា ក្រោយពេលបានទទួលព័ត៌មាននេះ លោកបានបញ្ជាកម្លាំង តាមស្រាវជ្រាវរកជនសង្ស័យផងដែរ តែដោយអ្នកចាំចំការ មិនបានស្គាល់អត្តសញ្ញាណ និងភិនភាគជនសង្ស័យច្បាស់លាស់ ហេតុនេះសមត្ថកិច្ច ប្រហែលជាមិនអាចស្រាវជ្រាវ រកជនល្មើសទាំងនោះឃើញឡើយ ម្យ៉ាងទៀត នៅល្ងាចនោះ មានអ្នកជិះម៉ូតូទៅមកដើរលេងច្រើន ។
ម្ចាស់ចំការខាងលើ បានអោយដឹងទៀតថា នេះជាលើកទី២ហើយ ដែលមានគេលួចដុតដំណាំ នៅក្នុងចំការរបស់គាត់ ដែលកាលពីលើកទីមួយ នៅម៉ោង៥ល្ងាច ថ្ងៃទី០១ ខែមេសា ឆ្នាំ២០១៥ ជាថ្ងៃលោកនាយរងខណ្ឌ័រដ្ឋបាលព្រៃឈើកំពង់ឆ្នាំង យកដីកាដកហូតដី របស់លោកអភិបាលខេត្ត មកប្រគល់អោយគាត់ ក៏មានគេលួចដុតចំការស្វាយរបស់គាត់ និងបានឆេះអស់ទំហំប្រមាណ៣០០ម៉ែត្រ គុណនិង៤០០ម៉ែត្រ ម្តងរួចមកហើយ និងសមត្ថកិច្ចក៏មិនទាន់រកឃើញជនល្មើសនៅឡើយដែរ ។ ករណីទាំង២លើកនេះ លោកនិងអ្នកស្រី សុំអំពាវនាវ ដល់សមត្ថកិច្ច និងអាជ្ញាធរគ្រប់ជាន់ថ្នាក់ មេត្តាជួយស្រាវជ្រាវរកមុខជនល្មើស និងអ្នកនៅពីក្រោយខ្នងអោយឃើញ ដើម្បីចាប់ខ្លួនមកផ្តន្ទាទោស តាមផ្លូវច្បាប់ មិនត្រូវអោយគេរួចខ្លួនឡើយ ៕
