កំពង់ធំៈ ប្រជាពលរដ្ឋរស់នៅក្នុងស្រុកសន្ទុក មានការព្រួយបារម្ភណ៍ ដោយសារតែមានការធ្វេសប្រហែស របស់ប៉ិស្តិ៍រដ្ឋបាលឃុំកកោះ ស្រុកសន្ទុក ខេត្តកំពង់ធំ បានធ្វើឲ្យមានការបាត់អាវុធអាកា AK47 ជាប្រភេទអាកាស្វាយបទ និងមានអនុភាពខ្លាំងក្នុងការធ្វើសឹកសង្គ្រាម តែមកដល់ពេលនេះ អាវុធមួយដើមនេះពុំអាចរកឃើញមកវិញនោះទេ ដោយ មហាជនទូទៅមានភាពភ័យខ្លាច ដោយមិនដឹងថាធ្លាក់ទៅលើដៃមនុស្សល្អ ឬអាក្រក់ ជាពិសេសទៅទៀតនោះ ខ្លាចមានសកម្មភាពប្លន់នៅក្នុងមូលដ្ឋាន។
តាមប្រភពពត៌មានច្បាស់ការបានបញ្ជាក់ថា អាវុធប្រភេទអាកា47 ស្វាយបទ ត្រូវបានបាត់ដោយពុំមានមូលហេតុ កាលពីយប់ថ្ងៃទី១៩ឈានចូល២០ ខែ មេសា ឆ្នាំ ២០១៥ ស្ថិតនៅប៉ុស្តិ៍រដ្ឋបាលឃុំកកោះ ស្រុកសន្ទុក ខេត្តកំពង់ធំ នាយប៉ុស្តិ៍រដ្ឋបាល មានឋានៈជាអនុសេនីយ៍ឯក លី ងួនធាង ពុំមានភាពទទួលខុសត្រូវក្នុងកិច្ចការប៉ុស្តិ៍រដ្ឋបាល ដើរផឹក ស៊ីប៉ែឡែមិនដែលចូលប៉ុស្តិ៍ បណ្តាលឲ្យមានការបាត់អាវុធ ដែលមានឈ្មោះ វង្ស ធារ៉ា ជាមន្ត្រីប៉ុស្តិ៍ជាអ្នកកាន់កាប់ ប្រើប្រាស់អាវុធអាកាលេខ ១២៩៤ ស្វាយបទ ។
លោក ពេជ្រ ថាល់ អធិការស្រុកសន្ទុក បានឲ្យអ្នកសារពត៌មាន ដឹងថា អាវុធអាកានៅក្នុងប៉ុស្តិ៍រដ្ឋបាលឃុំកកោះ ពិតជាបាត់មែន លោកកំពង់តែឲ្យសមត្ថកិច្ចនៃប៉ុស្តិ៍រដ្ឋបាល នាំគ្នារកអាវុធមួយដើមនេះ តែសង្ស័យថា មន្ត្រីក្នុងប៉ុស្តិ៍នាំគ្នាយកលាក់ដោយសារទាស់ទែងគ្នា តែទោះជាយ៉ាងណានោះ នឹងហៅមកសម្របស្រួលគ្នាវិញ ហើយរកអាវុធឲ្យឃើញ ចំណែកលោកអនុសេនីយ៍ឯក លី ងួនធាង នាយប៉ុស្តិ៍រដ្ឋបាលឃុំកកោះ ពុំអាចសុំការបំភ្លឺជុំវិញករណីការបាត់អាវុធបានទេ ព្រោះបិទទូរស័ព្ទ។
ប្រជាពលរដ្ឋបាននាំគ្នារិះគន់យ៉ាងខ្លាំងទៅលើ កាធ្វេសប្រហែសរបស់ សមត្ថកិច្ចប៉ូលិស ដែលជាអ្នកកាន់ច្បាប់ ជាអ្នកការពារ សូម្បីតែអាវុធជាអាយុជីវិតរបស់ខ្លួនក៏ពុំអាចការពារបានផង ចុះទំរាំសន្តិសុខ សុវត្តិភាពប្រជាពលរដ្ឋ ធ្វើម៉េចនឹង អាចការពារបានទៅ ជាពិសេសទៅទៀតនោះ សកម្មភាពរបស់នាយប៉ុស្តិ៍រដ្ឋបាល នឹងមន្ត្រីប៉ុស្តិ៍ពុំមានការយកចិត្ត ទុកដាក់ការពារ នឹងប្រចាំការនៅប៉ុស្តិ៍រដ្ឋបាលនោះទេ ចង់ទៅរកពឹងពាក់ម្តងៗវាពិបាកជាជាងណាត់ជួប រដ្ឋមន្ត្រីទៅទៀត ចំណែកប៉ុស្តិ៍រដ្ឋបាលនៅពេលយប់ មានតែសំបកប៉ុស្តិ៍មន្ត្រីប្រចាំការជាកម្មវិធី ស៊ីផឹកតាមភាសាអ្នកនៅលីវអស់ ហើយ ក្នុងនោះអ្នកភូមិសុំឲ្យលោកឧត្តមសេនីយ៍ត្រី ជូ សំអាន ស្នងការនគរបាលខេត្តកំពង់ធំ មេត្តាជួយរឹតបន្តឹងកិច្ចការការពារសុវត្តិភាពជូនប្រជាពលរដ្ឋបន្ថែមទៀត និងសូមជួយរកអាវុធអាកា៥៤ ស្វយបទមកវិញ ដើម្បីកុំឲ្យធ្លាក់ទៅ លើដៃជនពាលនាំឲ្យបង្ករះសន្តិសុខដល់ប្រជាពលរដ្ឋ ។ ដោយ ប៊ុន រដ្ឋា
