ខេត្តសៀមរាប៖ អគ្គិភ័យបានឆាបឆេះហាងលក់សាំងយីហោ(រិទ្ធី)តែសំណាងល្អស្ថានីយ៍លក់សាំងនោះមានបំពង់ពន្លត់អគ្គិភ័យបាញ់ពន្លត់ទាន់ពេល ប៉ុន្តែហេតុការនេះបណ្តាលឲ្យកម្មករម្នាក់រងរបួសធ្ងន់កំពុងជួយសង្គ្រោះនៅមន្ទីរពេទ្យ ហេតុការនេះបណ្តាលមកពីកម្មករជួសជុល
មានការធ្វេសប្រហែស។
ហេតុការឆេះស្ថានីយ៍ធ្វើឲ្យភ្ញាក់ផ្អើលទាំងព្រឹកនោះកើតឡើងនៅវេលាម៉ោង១០និង៣០នាទីព្រឹកថ្ងៃទី២២ខែមេសាឆ្នាំ២០១៥ស្ថិតនៅក្នុងភូមិអង្គ្រង ឃុំកន្ត្រាំង ស្រុកប្រាសាទបាគង ខេត្តសៀមរាប។តាមប្រភពពីសមត្ថកិច្ចមូលដ្ឋានបានឲ្យដឹងថា មុនដំបូងម្ចាស់ស្ថានីយ៍បានឲ្យកម្មករទៅជួសជុលទុយោប្រេងនៅជិតស៊ីទែនសាំង។ ពេលកម្មករកំពុងជួសជុលនោះស្រាប់តែបែកផ្កាភ្លើងបណ្តាលឲ្យឆាបឆេះនិងឆេះខ្លួនកម្មករម្នាក់ធ្វើឲ្យភ្ញាក់ផ្អើលទាំងព្រឹក រួចក៏នាំគ្នាជួយពន្លត់ទាន់ពេល។ប្រភពបានបន្តថា កម្មករដែលរងរបួសដោយសារភ្លើងឆេះនេះគេមិនដឹងថា ជាឈ្មោះអ្វីនោះទេ ដោយសារម្ចាស់ស្ថានីយសាំងនោះប្រញាប់បញ្ជូនជនរងគ្រោះទៅមន្ទីរពេទ្យ ទើបពុំមានសមត្ថកិច្ចណាស្គាល់ឈ្មោះជនរងគ្រោះឡើយ៕
