ខេត្តសៀមរាប៖ អគ្គិភ័យបានលេបត្របាក់ផ្ទះអស់១ខ្នងទាំងស្រុង ខណៈពេលម្ចាស់ផ្ទះអុជធូបបន់ស្រន់ទុកចោលហើយចុះមកក្រោម មិនបានប្រុងប្រយ័ត្នរួចចាក់សោរចេញទៅឆ្ងាយបាត់ ទើបបង្កឲ្យមានការឆេះឆាបចេញពីកន្លែងអសនៈអស់ផ្ទះទាំងស្រុងតែម្តង
ហេតុការបង្កឲ្យមានការភ្ញាក់ផ្អើលទាំងព្រឹកនេះកើតឡើងនៅវេលាម៉ោង១០និង០៥នាទីព្រឹកថ្ងៃទី២៣ខែមេសា ឆ្នាំ២០១៥ស្ថិតនៅក្រុមទី៩ភូមិបឹងដូនប៉ា សង្កាត់ស្លក្រាម ក្រុងសៀមរាប។
សាក្សីនៅកន្លែងកើតហេតុបានប្រាប់ឲ្យដឹងថា មុនពេលកើតហេតុម្ចាស់ផ្ទះពីនាក់ប្តីប្រពន្ធមិនបាននៅផ្ទះទេ ប្រហែលដុតធូបនៅលើផ្ទះរបស់គាត់ដើម្បីបន់ស្រន់ រួចចាក់សោរទៅបាត់ ក៏ឃើញផ្សែងហុយទ្រលោមចេញពីលើផ្ទះនោះ រួចពួកគាត់នៅជិតខាងក៏ស្រែកឲ្យជួយហៅឡានទឹកមកពន្លត់តែមិនបានប៉ុន្មាននាទីផងស្រាប់តែឆេះអស់ទៅហើយ។សាក្សីបានបន្តទៀតថា ក្រោយពេលកើតហេតុពួកគាត់ក៏បានរាយការទៅនគរបាលប៉ុស្តិស្លក្រាមដើម្បីជួយហៅរថយន្តពន្លត់អគ្គិភ័យឲ្យមកជួយ មួយសន្ទុះធំក៏ឃើញរថយន្តពន្លត់អគ្គិភ័យមកដល់ចំនួន១ឡានរួចក៏ជួយបាញ់ពន្លត់ភ្លើងបាត់ទៅ។
លោកវរសេនីយត្រី អ៊ុន ភិរម្យ នាយរងការិយាល័យពន្លត់អគ្គិភ័យ នៃស្នងការនគរបាលខេត្តសៀមរាបបានប្រាប់កោះសន្តិភាពនៅរសៀលថ្ងៃទី២៣ខែមេសានេះថា ក្រោយពីបានទទួលព័ត៌មានថាមានភ្លើងឆេះផ្ទះនៅសង្កាត់ស្លក្រាម លោកក៏បានឲ្យរថយន្តពន្លត់អគ្គិភ័យចំនួនគ្រឿងរបស់ស្នងការនគរបាលខេត្តទៅជួយពន្លត់ តែប្រើទឹកអស់១ឡានទើបអាចទប់ស្កាត់បានមិនឲ្យរាលដាលទៅផ្ទះផ្សេងទៀតទេ។លោកបន្តថា ម្ចាស់ផ្ទះមានឈ្មោះ ព្រំ ស៊ឹម ភេទប្រុស អាយុ៧៨ឆ្នាំមុខរបរនៅផ្ទះ និងប្រពន្ធឈ្មោះ វង់ សាផុន អាយុ៦១ឆ្នាំរស់នៅភូមិ កើតហេតុខាងលើ ត្រូវបានភ្លើងឆេះផ្ទះអស់ទាំងស្រុង ដែលធ្វើអំពីឈើលើ ថ្មក្រោម ប្រក់ហ្វីបប្រូ (មូលហេតុមកពីម្ចាស់ផ្ទះបានអុចធូបទុកចោលនៅក្នុងកន្លែងអសនៈរបស់ខ្លួនរួចចាក់សោរចោលចេញទៅឆ្ងាយបាត់ ទើបបណ្តាលឲ្យឆេះជើងធូបយ៉ាងដូច្នេះ ព្រោះមកពីម្ចាស់ផ្ទះធ្វេសប្រហែសដោយខ្លួនឯង)ចំណែកទ្រព្យសម្បត្តិដែលត្រូវភ្លើងឆេះនោះលោកពុំបានដឹងអំពិចំនួននៅឡើយទេ។
