កំពង់ធំៈលោក សាយ ណូរ៉ា ព្រះរាជអាជ្ញារង ខេត្តកំពង់ធំ បានដឹកនាំកម្លាំងស្ទាក់ចាប់ រថយន្តវីហ្គោមួយគ្រឿង ដែលបានធ្វើសកម្មភាពដឹកជញ្ជូនឈើគ្រញូងដោយខុសច្បាប់ ចេញពីខេត្តព្រះវិហារ ឆ្លងកាត់ខេត្តកំពង់ធំ ឆ្ពោះទៅខេត្តកំពង់ចាម នៅរសៀលម៉ោង២ថ្ងៃទី ២៣ ខែ មេសា ឆ្នាំ២០១៥ នៅចំនុច ការ៉ាស់សាំងមួយកន្លែងស្ថិតនៅព្រំប្រទល់ ខេត្តព្រះវិហារ និងខេត្តកំពង់ធំ ។
សមត្ថកិច្ចប៉ូលិសសេដ្ឋកិច្ចខេត្តកំពង់ធំ បានឲ្យដឹងថា មុនពេលស្ទាក់ចាប់រថយន្តនេះបាន គឺទទួលបានពត៌មានពីបណ្តាញថា មានរថយន្តម៉ាកវីហ្គោ ពណ៌ស្ក ពាក់ស្លាកលេខ ភ្នំពេញ 2AA-3555 បានដឹកឈើគ្រញូងចំនួន ៤៨ដុំ ស្មើនឹង៣០៥គីឡូក្រាម ស្មើរនឹង០.២៥៤ម៉ែត្រគូប បានធ្វើសកម្មភាពមានមនុស្សចំនួន២នាក់ និងត្រូវបានឃាត់ខ្លួន ឈ្មោះ ហាក់ ផល្លា ជាទាហានៅអង្គភាពឆ័ត្រយោង ៩១១ រស់នៅភូមិពាក់ស្បែក ឃុំ យាង ស្រុកជាំក្សាន្ត ខេត្តព្រះវិហារ ចំនែកលោក ខន នៅអង្គភាពកងពលលេខ៣ យកឋានៈនឹងតួនាទីរកស៊ីដឹកឈើគ្រញូង ប្រចាំខេត្តព្រះវិហារ និងជាថៅកែឈើគ្រញូង ជាប់គុកមិនចេះរៀង ត្រូវបានចាប់ម្តងរួចមកហើយ កាលពីឆ្នាំ២០១៤ បានបើករថយន្ត ម៉ាកណាវរ៉ា ដឹកឈើគ្រញូង ត្រូវបានជាប់អន្ទាក់របស់មេព្រៃ លុះចេញទៅវិញបានធ្វើសកម្មភាពដឹកឈើគ្រញូងជារៀងរាល់ថ្ងៃ ដោយមានការត្រូវរ៉ូវគ្នានិងសមត្ថកិច្ចខេត្តកំពង់ធំ តែការចាប់នេះត្រូវបានគេសង្ស័យថា ប្រហែលជាមានទំនាស់ ផ្ទៃក្នុងទើបមានការបែកបាក់ តែទោះរថយន្តរបស់លោក ខន ដែលត្រូវបានគេដឹងថា ថៅកែឈើគ្រញូងប្រចាំព្រះវិហារ ត្រូវបានសមត្ថកិច្ចចាប់បានទៅហើយនោះ ក៏លោកខន ត្រូវបានរត់រួចខ្លួនតាមទំលាប់ ។
តាមប្រភពពត៌មាននៃហេតុការតាមប្រម៉ាញ់ រថយន្តវីហ្គោដឹកឈើគ្រញូង ដែលត្រូវបានដឹកនាំបង្ក្រាបដោយ លោក សាយ ណូរ៉ា ព្រះរាជអាជ្ញារង ខេត្តកំពង់ធំ បានដេញចាប់ទំរាំតែបាន ជនសង្ស័យបានបើកឡាន ចូលព្រៃ ចូលព្រៃ កាត់ វាលខ្សាច់ ដែលជាសែនពិបាក់ដល់ការបង្ក្រាបរបស់សមត្ថកិច្ច ទីបំផុតលោក ខន ជាម្ចាស់រថយន្ត បាននាំគ្នាទំលាក់ឈើគ្រញូងពីរថយន្តរបស់ខ្លួនចូលក្នុងវាលខ្សាច់ ហើយបានបើកឡានត្រឡប់ក្រោយសំដៅទៅខេត្តព្រះវិហារវិញ តែត្រូវបានលោក សាយ ណូរ៉ាធ្វើការទំនាក់ទំនងទៅសមត្ថកិច្ចខេត្តព្រះវិហារ ឲ្យជួយស្ទាក់រថយន្ត ទីបំផុតលោក ខន បានបើកឡានចូលការ៉ាសសាំងហើយដាក់មេប្រូចបាត់ស្រមោល បានបន្សល់មនុស្សម្នាក់ ដែលជាគូកន ត្រូវបានសមត្ថកិច្ចឃាត់ខ្លួនបាន ។
ខណៈនេះឈើគ្រញូងចំនួន ៤៨ដុំ ត្រូវបានប្រគល់ជូនផ្នែករដ្ឋបាលព្រៃឈើស្ទោង រក្សាទុក ចំណែករថយន្តត្រូវបាននាំយកមករក្សាទុកនៅតុលាការខេត្តកំពង់ធំ រីឯលោក ហាក់ ផល្លា ត្រូវបានយកមកផ្ញើរនៅទៅឃុំឃាំងនៃស្នងការដ្ឋាន ខេត្តកំពង់ធំ រងចាំដោះស្រាយនៅពេលក្រោយ ។
ដោយ ខេមរា 
