កំពង់ឆ្នាំង៖ មនុស្ស៥នាក់ដោយមានក្មេងម្នាក់ផងបានរងរបួសជាមធ្យម នៅក្នុងករណីរថ យន្តធុនធំភ្លៅ៥ដឹកក្បឿងពេញរអិលបុកចំផ្នែកខាងស្តាំរថយន្តទួរីសពេលមានភ្លៀងធ្លាក់ ក្នុងទិសដៅច្រាស់ទិសគ្នា។ហេតុការណ៍នេះបានកើតឡើងនៅវេលាម៉ោង៩និង១៥នាទី ព្រឹក
ថ្ងៃទី២៧ ខែមេសា ឆ្នាំ២០១៥ តាមបណ្តោយផ្លូវជាតិលេខ៥ ចន្លោះគីឡូម៉ែត្រលេខ ៣៩និង៤០ ស្ថិតក្នុងភូមិពោធិរិទ្ធីក្រៃ ឃុំស្វាយ ស្រុកសាមគ្គីមានជ័យ។
លោកអធិការស្រុកសាមគ្គីមានជ័យបានអោយដឹងថា៖ជនរងគ្រោះទាំង៥នាក់ មាន ឈ្មោះ ១.ម៉ៅ ម៉ុយ អាយុ១៣ឆ្នាំ ,២.មាន សាវុធ អាយុ៤៦ឆ្នាំ ,៣.មាន សាវ៉ាន អាយុ ៤៥ឆ្នាំ ,៤.នាង សុគា ភេទស្រី អាយុ៣៦ឆ្នាំ ,និងទី៥ឈ្មោះ សុវណ្ណ វុទ្ធី អាយុ៤២ឆ្នាំ ពួកគាត់ទាំងអស់គ្នារស់នៅក្នុងឃុំផ្សារដូនកែវ ស្រុកបាកាន ខេត្តពោធិសាត់។
មុនពេលកើតហេតុគេឃើញរថយន្តយីឌុបភ្លៅ៥បានផ្ទុកក្បឿងពេញបើកបរក្នុងទិសដៅពីជើងទៅត្បូង លុះមកដល់ចំណុចកើតហេតុ អ្នកបើកបរបានវ៉ារថយន្តមួយគ្រឿងទៀតដែលកំពុងបើកបរស្របទិសគ្នា ខណៈពេលកំពុងវ៉ាបានបន្តិចស្រាប់តែតួរថយន្តបាន រអិលទៅខាងឆ្វេងដៃបុករថយន្តទួរីសដឹកអ្នកដំណើរពេញ ក្នុងទិសដៅច្រាស់ទិសគ្នាពេញ ទំហឹង បណ្តាលអោយអ្នកជិះនៅក្នុងរថយន្តទួរីសរងរបួសជាមធ្យមចំនួន៥នាក់។
ក្រោយពេលកើតហេតុជនរងគ្រោះទាំងអស់ត្រូវបានគេដឹកបញ្ជូនទៅសង្គ្រោះព្យាបាលនៅមន្ទីរពេទ្យស្រុកឧត្តុង្គ ខេត្តកំពង់ស្ពឺ បន្ទាប់មកនៅវេលាម៉ោង១២ថ្ងៃត្រង់ ពួកគាត់បានរំរបួសរួច និងបាននាំគ្នាវិលត្រឡប់ទៅលំនៅដ្ឋានវិញអស់ហើយ។ដោយឡែកអ្នក បើកបររថយន្តយីឌុបភ្លៅ៥ខាងលើក្រោយពេលកើតហេតុបានរត់គេចខ្លួនបាត់ រីឯអ្នក បើកបររថយន្តទួរីសវិញមិនបានរត់ទៅណានោះទេ។រថយន្តទាំង២គ្រឿងត្រូវបាន សមត្ថ កិច្ចនគរបាលចរាចរណ៍ស្រុក អូសយកមករក្សាទុកនៅអធិការដ្ឋានស្រុកសាមគ្គីមានជ័យ កសាងសំណុំរឿងដោះស្រាយតាមផ្លូវច្បាប់៕
