សៀមរាប លោកស្រី គួយ ណាលីន អនុប្រធានគណកម្មាធិការកាកបាទក្រហមកម្ពុជា(សាខាខេត្តសៀមរាប) បានទទួលជួបស្វាគមន៍យ៉ាងកក់ក្តៅ ចំពោះវត្តមានរបស់តំណាងក្រុមហ៊ុន TENSAI Yoshi ប្រចាំខេត្តសៀមរាប ដែលមានបំណងបង្ហាញនូវទឹកចិត្តសប្បុរសធម៌ ចូលរួម
អបអរសាទរជាមួយនឹងខួបអនុស្សាវរីយ៍លើកទី ១៥២ ទិវាពិភពលោក កាកបាទក្រហម អឌ្ឍចន្ទក្រហម ( ៨ ឧសភា ឆ្នាំ២០១៥ ) តាមរយៈនៃការនាំយកទៅជាមួយ នូវការជួយឧបត្ថម្ភភេសជ្ជៈ តែបៃតង TENSAI Yoshi ចំនួន២០០យួរ ស្មើនឹង ២,៤០០ដប ។
លោក ស៊ុំ សំអន នាយកប្រតិបត្តិ សាខាកាកបាទក្រហមកម្ពុជា(ខេត្តសៀមរាប) បានលើកបង្ហាញអំពីខ្លឹមសារនៃបេសកកម្មមនុស្សធម៌របស់កាកបាទក្រហមកម្ពុជា ដែលមិនប្រកាន់និន្នាការនយោបាយ ពណ៌សម្បុរ ជាតិសាសន៍ នោះឡើយ ។ លោកក៏បានបង្ហាញឲ្យដឹងដែរថា កន្លងមកនេះ បើនិយាយជារួម គឺបេសកកម្មមនុស្សធម៌របស់កាកបាទក្រហមកម្ពុជា អាចដំណើរការទៅបានប្រកបដោយប្រសិទ្ធិភាព គឺអាស្រ័យដោយមានការចូលរួមពីសំណាក់បងប្អូនសប្បុរសជនជាតិនិងអន្តរជាតិ ។
លោកតំណាងឲ្យក្រុមហ៊ុនភេសជ្ជៈតែបៃតង TENSAI Yoshi បាននិយាយថា នេះគឺគ្រាន់តែជាការចាប់ផ្តើមប៉ុណ្ណោះ ។ លោកបានបន្តថា គឺក្រោយពេលដែលក្រុមហ៊ុន Tensai Yoshi មានវត្តមានចែកចាយផលិតផលរបស់ខ្លួននៅក្នុងខេត្តសៀមរាប ក្រុមហ៊ុនបានរៀនចំគម្រោងរួចហើយ ថា ការចូលរួមចលនាសប្បុរសធម៌ ជាមួយនឹងសកម្មភាពមនុស្សធម៌នៃបេសកកម្មមនុស្សធម៌របស់កាកបាទក្រហមកម្ពុជាសាខាខេត្តសៀមរាប គឺគ្មានទីបញ្ចប់នោះឡើយ ។
លោកស្រី គួយ ណាលីន អនុប្រធានគណកម្មាធិការសាខាកាកបាទក្រហមកម្ពុជា(ខេត្តសៀមរាប) បានសម្តែងនូវទឹកចិត្តសោមនស្សរីករាយជាមួយនឹងការចាប់ផ្តើមនេះ ហើយលោកជំទាវ បានសម្តែងនូវក្តីសង្ឃឹមថា តាមរយៈនៃចលនាសប្បុរសធម៌មកពីគ្រប់មជ្ឈដ្ឋាន និងគ្រប់ទិសទី បងប្អូនប្រជាពលរដ្ឋដែលងាយរងគ្រោះ និងបងប្អូនប្រជាពលរដ្ឋដែលកំពុងជួបភ័យវិបត្តិ ឬក៏កំពុងជួបនឹងគ្រោះវិបត្តិផ្សេងៗ នឹងអាចកាត់បន្ថយបាន នូវការលំបាក ហើយតាមរយៈនៃបេសកកម្មមនុស្សធម៌កាកបាទក្រហមកម្ពុជា ការចម្លងគ្រាលំបាកនៃជីវភាពជនរងរងគ្រោះ តែងតែបានធ្វើឡើង យ៉ាងទាន់ពេលវេលា ។ លោកជំទាវ បានបញ្ជាក់បន្ថែមថា អំណោយសប្បុរសធម៌ គឺមិនត្រូវបានកំណត់ តិច ឬ ច្រើន ឬ ជាប្រភេទអ្វីនោះឡើយ ជាស្បៀងអាហារ សម្ភារៈប្រើប្រាស់ ឬ ក៏ជាថវិកា គឺអាស្រ័យទៅតាមលទ្ធភាព ដែលសប្បុរសជន អាចបរិច្ចាគឲ្យបាន ៕
