នៅស្នាក់ការគណបក្សប្រជាជនកម្ពុជាខេត្តសៀមរាប នាព្រឹកថ្ងៃទី ២៧ ខែ មេសា ឆ្នាំ២០១៥នេះ មានធ្វើបទឧទ្ទេសនាមស្តីពីការកសាងសមត្ថភាពនៃគណបក្សកាន់អំណាច ជូនដល់មន្ត្រីគណបក្សប្រជាជនកម្ពុជាថ្នាក់ខេត្តក្រុងស្រុកឃុំសង្កាត់និងក្រុមយុវជនគណបក្ស 
ដែលមានចំនួនចូលរួមប្រមាណ ២៤៥នាក់ ។ ក្នុងបទឧទ្ទេសនាមនេះ បានប្រព្រឹត្តទៅក្រោមអធិបតីភាពរបស់លោក នូ ផល្លា សមាជិកគណៈកម្មាធិការកណ្តាល និង ជាអនុប្រធានគណៈ កម្មាធិ ការគណបក្សប្រជាជនខេត្ត និង ជាប្រធានក្រុមប្រឹក្សាខេត្តសៀមរាប និង លោក ចាវ ឈាន នាយករងសាលាបក្ស នៃគណៈកម្មាធិការមជ្ឈឹមបក្សកុម្មុយនីស្តចិនខេត្តសានទុងនៃសាធារណរដ្ឋប្រជាមានិតចិនព្រមទាំងអស់លោកលោកស្រី ជាគ្រូឧទ្ទេសចិនមួយចំនួនផងដែរ ។
មានប្រសាសន៍នោះដែរលោក ចាវ ឈាន ក៏បានធ្វើការបញ្ជាក់ អំពីគោលបំណង ក្នុងការស្វែងយល់អំពីផែន ការ យុទ្ធសាស្ត្រគ្រប់ជ្រុងជ្រោយ សំដៅកំណែទម្រង់ការអភិវឌ្ឍន៍ដោយសន្តិភាព ការអភិវឌ្ឍន៍សេដ្ឋកិច្ចសង្គម និង ឈានដល់ការពង្រឹងការកសាងបក្សនៅមូលដ្ឋាន ព្រមទាំងរក្សាបាននូវទំនាក់ទំនងជិតស្និទ្ធរបស់គណបក្សជាមួយមហាជន។ ម្យ៉ាងទៀតក៏ជាការពង្រឹងថែមទៀតនូវចំណងមិត្តភាពកិច្ចសហប្រតិបត្តិការ និងការផ្លាស់ប្តូរបទពិសោធន៍គ្នាទៅវិញទៅមកក្នុងការគ្រប់គ្រងរដ្ឋរវាងគណបក្សប្រជាជនកម្ពុជានិង បក្សកុម្មុយនីស្តចិន។ ក្នុងនោះឯកឧត្តមប្រធានប្រតិភូក៏បានលើកនូវសំណូមពរមួយចំនួន ដល់ឯកឧត្តម លោកជំទាវ អស់លោក លោកស្រី ដែលមាន ចម្ងល់ដែលពាក់ពាន្ធ័បទឧទ្ទេសនាម របស់គ្រូឧទ្ទេស សូមឲ្យលើកជាសំណួរឡើង ដើម្បីឲ្យយើងបានទទួលនូវចំណេះដឹងថ្មីក្នុងការអភិវឌ្ឍន៍នៅតាមមូលដ្ឋានខ្លួន សំខាន់របស់គណបក្សនៃប្រទេសទាំងពីរ ។
ក្នុងបទឧទ្ទេសនាមនោះវាគ្មិនចិនក៏បានលើកនូវបទពិសោធន៍ល្អៗមួយចំនួនដែលមានការពាក់ព័ន្ធទៅនឹង វិស័យ នយោបាយនិងសេដ្ឋកិច្ចដោយផ្តោតទៅលើវិស័យពាណិជ្ជកម្មនិងឧស្សាហកម្ម ព្រមទាំងពីការគ្រប់គ្រងកសាង នូវសមាជិកភាពបក្សនៅតាមមូលដ្ឋាន កត្តាសំខាន់លើការគ្រប់គ្រងកម្លាំងមហាជន ក្នុងការគាំទ្រគណបក្សរបស់ខ្លួន
ក្នុងនោះគណបក្សប្រជាជនខេត្តក៏បានបញ្ជាក់ពីការគ្រប់គ្រងនិងកសាងកម្លាំងបក្សរបស់ខ្លួន គឺមានលក្ខណៈដូច គ្នានឹងគណបក្សប្រជាជនកម្ពុជាផងដែរព្រមទាំងបានលើកជាសំណួរមួយចំនួនផងដែរ។ តាមការបកស្រាយរបស់គ្រូឧទ្ទេសនាមចិនអំពីបញ្ហាដែលសមាជិកអង្គពិធីបានលើកឡើង ដែលកាន់តែធ្វើឲ្យមន្ត្រីគណបក្សប្រជាជនកម្ពុជាមានការយល់ដឹងបានមួយកម្រិតបន្ថែមទៀត ដែលជាយានមួយក្នុងការដឹកនាំប្រតិបត្តិនូវគោលនយោបាយរបស់គណបក្ស ក្នុងការបញ្ជាក់ពីភាពជឿជាក់របស់មហាជននៅតាមមូលដ្ឋាន ដើម្បីគាំទ្រគណបក្សប្រជាជនកម្ពុជាតទៅអនាគត ។
ក្នុងការថ្លែងអំណរគុណនោះដែរលោកនូ ផល្លាក៏បានលើកឡើងថា នេះជាសក្ខីភាពដែលសរបញ្ជាក់ឲ្យឃើញពី ចំណងមិត្តភាព និង កិច្ចសហប្រតិបត្តិការ រវាងបក្ស រដ្ឋាភិបាល និង ប្រជាជនចិនជាមួយនឹងគណបក្ស រាជរដ្ឋាភិបាល និងប្រជាជនកម្ពុជាឲ្យកាន់តែមានភាពរឹងមាំនឹងរួមសុខរួមទុក្ខរាល់ការលំបាកគ្រប់កាលៈទេសៈ ដែលធ្លាប់មានក្នុងប្រវត្តិសាស្ត្រដ៏យូរលង់រហូតមកដល់សព្វថ្ងៃនេះ។លោកក៏បានបន្តទៀតថា គណៈកម្មាធិការគណបក្សប្រជាជនខេត្តសៀមរាបបានប្រមូលផ្តុំនូវកម្លាំងមធ្យោបាយសរុបនិងវិធានការ ធ្វើឲ្យស្ថានភាពទូទៅរបស់ខេត្តរក្សាបានសន្តិភាពស្ថេរភាពនយោបាយសន្តិសុខសណ្តាប់ធ្នាប់សង្គមនិង មានការអភិវឌ្ឍន៍ខេត្តប្រកបដោយការទាក់ទាញអារម្មណ៍នៃភ្ញៀវទេសចរណ៍ហើយនៅឆ្នាំ២០១៥ ក្រុងសៀមរាបបានក្លាយជាគោលដៅដែលមានភាពស្រស់ស្អាត ទទួលបាននូវ ចំណាត់ថ្នាក់លេខ១នៅតំបន់អាស៊ី និងលេខ២នៅលើពិភពលោក។ក្នុងព្រឹត្តិការណ៍អង្គរសង្ក្រាន្តគឺបានធ្វើការផ្សព្វផ្សាយពីវប្បធម៌ ដ៏សំបូរបែបដែលមាននៅលើទឹកដីប្រវត្តិសាស្ត្រសៀមរាបដែលបានធ្វើឲ្យកំណើននៃភ្ញៀវទេសចរណ៍ មានការកើនឡើងជារៀងរាល់ឆ្នាំផងដែរ។លោកនូផល្លាក៏បានសម្តែងនូវកតញ្ញូតាធម៌ចំពោះ គណៈប្រតិភូបក្សកុម្មុយនីស្តចិន ដែលបានមកបំពេញទស្សនកិច្ចនៅខេត្តសៀមរាប ព្រមទាំងបានធ្វើការឧទ្ទេសនាម និងផ្តល់នូវបទពិសោធន៍ល្អៗក្នុងការកសាងសមត្ថភាពនៃគណបក្សកាន់អំណាច ជូនដល់មន្ត្រីគណបក្សប្រជាជនកម្ពុជាខេត្តសៀមរាប ដើម្បី បង្កើននូវចំណងមិត្តភាព កិច្ចសហប្រតិបត្តិការ និង ផ្លាស់ប្តូរបទពិសោធន៍គ្នាទៅវិញទៅមក សំដៅកំណែទម្រង់ការ អភិវឌ្ឍន៍សន្តិភាព សេដ្ឋកិច្ច និង សង្គម ដើម្បីឈានដល់ការកសាងបក្សនៅមូលដ្ឋានព្រមទាំងរក្សាបាននូវទំនាក់ទំនង ជិតសិ្នទ្ធរបស់គណបក្សជាមួយមហាជន ។ ក្នុងដំណើរទស្សនកិច្ចនេះ ក៏ជាការពង្រីក ពង្រឹងធ្លុងសាមគ្គីភាព មិត្តភាព និង កិច្ចសហប្រតិបត្តិការ ក្នុងភាពជាបងប្អូននៃប្រទេសទាំងពីរស្ថិតស្ថេរចិរកាលតទៅអនាគត ៕
