យុវជនម្នាក់បានរងរបួសរលាត់ដៃរលាត់ជើង ដោយសារតែត្រូវបានរថយន្តតាក់ស៊ី មហាកំផែងគៀរ បណ្តាលឱ្យដួលឡើងលើឌឿន ព្រោះតែអ្នកបើករថយន្តងួកមួយភាំង ហើយរថយន្តបង្កបានព្យាយាមបើករត់ ប៉ុន្តែត្រូវបានប្រជាពលរដ្ឋដេញតាមតាំងពីម្តុំរង្វង់មូលវិមាន
ឯករាជ្យ ហើយឃាត់ចាប់បាននៅខាងមុខផ្សារទំនើប អ៊ីអនម៉ល តាមបណ្តោយផ្លូវសុធារស ស្ថិតក្នុងសង្កាត់ទន្លេបាសាក់ ខណ្ឌចំការមន កាលពីវេលាម៉ោង៩នឹង៥០នាទីយប់ ថ្ងៃទី២៨ ខែមេសា ឆ្នាំ២០១៥ ។ ប្រភពពត៌មានពីកន្លែងកើតហេតុ បានឱ្យដឹងថា នៅមុនពេលកើតហេតុ គេបានឃើញយុវជនម្នាក់ជិះម៉ូតូ Scoopy mini ពណ៍ស គ្មានស្លាកលេខ ធ្វើដំណើរតាមបណ្តោយផ្លូវព្រះស៊ីហនុ ទិសដៅពីលិចទៅកើត ខណះមកដល់ចំណុចកើតហេតុស្រាប់តែមានរថយន្តតាក់ស៊ីមហាកំផែង ពាក់ស្លាកលេខភ្នំពេញ2Z-2064 បើកដោយបុរសម្នាក់ ទិសដៅស្របគ្នាពីក្រោយម៉ូតូ ហើយបានងងុយងួកមួយភាំងបានជ្រុលគៀរម៉ូតូ ដួលឡើង លើឃឿន បណ្តាលឱ្យ អ្នកជិះម៉ូតូរងរបួសរលាត់ដៃរលាត់ជើង ។
ប្រភពបន្តថា ក្រោយពីបង្កហេតុ រថយន្តបង្កបានព្យាយាមបើករត់ តែត្រូវបានអ្នកដំណើរតាមដងផ្លូវ ដេញឃាត់ចាប់បាននៅខាងមុខនឹងផ្សារទំនើបអ៊ីអនម៉ល ហើយអ្នកបើករថយន្តតាក់ស៊ី សុខចិត្តជួសជុលម៉ូតូ ចេញថ្លៃព្យាបាល និងលុយចំនួន៣០ដុល្លារ ដើម្បីបញ្ចប់រឿងនៅនឹងកន្លែងកើតហេតុ ចំណែកភាគីខាងម៉ូតូ ក៏ព្រមទទួល ព្រោះមិនចង់មានរឿងវែងឆ្ងាយ ៕
