កំពង់ឆ្នាំង៖ ដើម្បីសុវត្តិភាពចរាចរណ៍គោយន្តចំនួន២១១គ្រឿងត្រូវបានសមត្ថកិច្ចនគរបាលស្រុកកំពង់ត្រឡាចបំពាក់ឌីសជាចំណាំងផ្លាតនៅពីខាងក្រោយ ក្នុងគោលបំណងជួយការពារនិងកាត់បន្ថយ ករណីគ្រោះថ្នាក់ចរាចរណ៏ដែលកើតដោយការមើលមិនឃើញរបស់អ្នក
បើកបរយានយន្តពីក្រោយនៅពេលយប់ ។ ការបំពាក់ចំណាំងផ្លាតដល់គោយន្ត ដែលយកឌីសមកបំពាក់នេះបានធ្វើឡើងរយៈពេល២ថ្ងៃ គឺនៅថ្ងៃទី ២៧ និង២៨ ខែមេសា ឆ្នាំ៣២០១៥នេះ ។ លោក ហ៊ុល វាសនា អធិការនគរបាលស្រុកកំពង់ត្រឡាចបាននិយាយអោយដឹងថា៖ ដោយមានការណែនាំពីលោក អភិបាលខេត្ត និងលោកស្នងការខេត្ត ស្តីពីការបំពាក់ចំណាំងផ្លាតតាមកន្ទុយគោយន្តលោកបានអញ្ជើញប្រជាពលរដ្ឋ ដែលមានគោយន្តអោយមកដាក់ចំណាំងផ្លាតអោយគ្រប់ៗគ្នារយៈពេល២ថ្ងៃគឺថ្ងៃទី២៧ និង២៨ មេសា ឆ្នាំ២០១៥ បានចំនួន២១១គ្រឿង ដែលធ្វើនៅទីតាំងចំនួន៣គឺ ឃុំតាជេស ឃុំជ្រេស និងឃុំថ្មឥដ្ឋ ស្រុកកំពង់ត្រឡាច ។លោក អធិការស្រុកបានរំឮកថា៖ការ ដាក់ចំណាំងផ្លាតនេះ បន្ទាប់ពីមានករណីគ្រោះថ្នាក់ចរាចរណ៏មួយបានកើតឡើងដោយសារតែមានបុរសអ្នកជិៈម៉ូតូម្នាក់បានបើកម៉ូតូ
ទៅបុកគូថគោយន្តដឹកអុស ពីក្រោយបណ្តាលអោយរងរបួសយ៉ាងធ្ងន់ធ្ងរ ព្រោះ តែបើកម៉ូតូនៅពេលយប់មើលមិនឃើញ។នៅក្នុងពេលដាក់ចំណាំងផ្លាតនោះដែរ លោកក៏បានប្រជុំអប់រំណែនាំដល់អ្នកបើកបរគោយន្តទាំងអស់ អោយគោរពច្បាប់ចរាចរណ៏ ដោយគ្រប់គោយន្តត្រូវមានភ្លើងបំភ្លឺក្នុងពេលបើកបរនៅពេលយប់ និងបើគ្មានភ្លើងខាងក្រោយទេ ត្រូវមានចំណាំងផ្លាតដូចដែលបានដាក់នៅពេលនេះ ដើម្បីកាត់បន្ថយគ្រោះថ្នាក់ចរាចរណ៏ដែលកើតឡើង ដោយសារតែមើលមិនឃើញនៅពេលធ្វើចរាចរណ៏ពេលយប់ ។
លោក អៀរ ប៊ុនធឿន នាយការិយាល័យ័ចរាចរណ៏ផ្លូវគោកនៃស្នងការដ្ឋានខេត្ត បាននិយាយថា៖ក្នុងខែមេសា ឆ្នាំ២០១៥នេះ កត្តាគ្រោះថ្នាក់ចរាចរណ៏ដែលកើតពីការមើលមិនឃើញពេលបើកបរ ពេល យប់គឺបានកើនឡើងគួកត់សំគាល់ ហើយការដាក់ចំណាំងផ្លាតលើគោយន្តនេះ គឺជាវិធានការណ៍ការពារល្អណាស់ដើម្បីសុវត្តិភាពចរាចរណ៍។ លោកសូមអំពាវនាវអោយអ្នកមានគោយន្តទាំងអស់រកឌីសចាស់ៗ មកវ៉ៃភ្ជាប់ នៅកន្ទុយគោយន្តខាងក្រោយដោយខ្លួនឯង ដើម្បីបញ្ច្រាស និងកាត់បន្ថយគ្រោះថ្នាក់ចរាចរណ៏ ដែលបណញតាលមកពីគ្មានចំណាំងផ្លាតនៅពីក្រោយកន្លងមក៕
