ខេត្តប៉ៃលិន ៖ គ្រោះធម្មជាតិភ្លៀងលាយខ្យល់កន្ត្រាក់ បានបក់បោកផ្ទះប្រជាពលដ្ឋឱ្យប៉ើងដំបូល និងដួលរលំ រងការខូចខាតអស់ចំនួន២៧ខ្នង នៅភូមិផ្សារព្រំ និងភូមិអូរឈើក្រំ បណ្តាលឱ្យស្ត្រីម្នាក់ត្រូវបានផ្ទះសង្កត់លើ រងរបួសធ្ងន់ និងក្មេងប្រុសម្នាក់អាយុ៨ឆ្នាំ រងរបួស
ក្បាលស្រាលផងដែរ ។ហេតុការណ៍ភ្លៀងលាយឡំដោយខ្យល់កន្ត្រាក់បណ្តាលឱ្យរលំផ្ទះ និងរងរបួសប្រជាពលរដ្ឋនេះបានកើតឡើងកាលពីវេលាម៉ោង៤ និង៣០នាទីរសៀលថ្ងៃទី២៨ ខែមេសា ឆ្នាំ២០១៥ ស្ថិតនៅភូមិផ្សារព្រំ និងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។លោក សុខ មុំ អនុប្រធានភូមិអូរឈើក្រំ បានឲ្យដឹងថា៖ នៅពេលកើតហេតុខាងលើក្នុងភូមិរបស់លោកមានការ ដួលរលំផ្ទះប្រជាពលរដ្ឋអស់ចំនួន១ខ្នង បណ្តាលឲ្យស្ត្រីម្នាក់រងរបួសធ្ងន ត្រួវបានយកទៅសង្គ្រោះនៅមន្ទីរពេទ្យបង្អែកខេត្ត ដោយសារតែសសរផ្ទះសង្គត់លើ ។ ចំណែកលោក មាស សាវ៉ាត់ មេភូមិផ្សារព្រំ បានឲ្យអ្នកយកព័ត៌មានដឹងថា៖ ក្នុងភូមិរបស់លោក ក៏មានការដួលរលំខូចខាតផ្ទះប្រជាពលរដ្ឋចំនួន២៦ខ្នង ក្នុងនោះរលំដួលដល់ដីមានចំនួន៤ខ្នង ហើយរបើកដំបូលផ្នែកខាងលើចំនួន២២ខ្នង ព្រមទាំងបាក់បង្គោលភ្លើង និង
ដើមឈើជាច្រើនដើមផងដែរ ។លោក សំ សារ៉េត អភិបាលស្រុកសាលាក្រៅ បានឲ្យអ្នកយកព័ត៌មានដឹងថា៖ កាលពីវេលាម៉ោង៤ និង៣០នាទីរសៀលថ្ងៃទី២៨ ខែមេសា ឆ្នាំ២០១៥ នៅភូមិផ្សារព្រំ និងភូមិអូរឈើក្រំ ឃុំស្ទឹងកាច់ មានករណីភ្លៀងលាយខ្យល់កន្ត្រាក់ បណ្តាលផ្ទះប្រជាពលរដ្ឋចំនួន២៧ខ្នងដួលរលំ និងបង្កឲ្យមនុស្សរងរបួសធ្ងន់ ស្រាល់ចំនួន២នាក់ ហើយលោកក៏បាន អំពាវនាវដល់ប្រជាពលរដ្ឋឱ្យមានការប្រុងប្រយ័ត្នខ្ពស់ ខណៈមានភ្លៀងម្តងៗ ត្រូវរកកន្លែងជ្រកកោនឱ្យបានសមរម្យដើម្បីជៀសវាងគ្រោះថ្នាក់កើតឡើងជាយថាហេតុ ៕
សេង សុវណ្ណារិទ្ធ
