បុរសម្នាក់បានរងរបួសធ្ងន់ត្រូវបានដឹកទៅសង្គ្រោះនៅមន្ទីរពេទ្យភ្លាមៗខណៈដែលរួបគាត់បានលើកត្រីដាក់ម៉ូតូហើយត្រូវបានរថយន្តម៉ាកវីស្តូបើកបរដោយបុរសម្នាក់បើកក្នុងល្បឿនលឿនជ្រុលបុកពេញទំហឹង កាលពីវេលាម៉ោង២១និង០៥នាទីយប់ ថ្ងៃទី២៩ ខែមេសា ឆ្នាំ
២០១៥ នៅចំណុចមុខផ្សារត្រពាំងថ្លឹង តាមបណ្តោយផ្លូវវេងស្រេង ស្ថិតក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។ ជនរងគ្រោះឈ្មោះ លន់ ធ្លន់ ភេទប្រុសអាយុ ៤៤ ឆ្នាំ មុខរបលក់ត្រី នៅមុខផ្សារត្រពាំងថ្លឹង ស្លាក់នៅជិតវត្តគោកកញ្ជន់ ស្ថិតក្នុងសង្កាត់ចោមចៅ ខណ្ឌពោធិ៍សែនជ័យ ជិះម៉ូតូម៉ាកសង់កូរ៉េ ពណ៌ក្រហម ពាក់ស្លាកលេខ ណ ៩៩២៨ ភព១។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុជនរងគ្រោះកំពុងលើកធុងត្រីដាក់លើម៉ូតូពេលដែលរួបគាត់ឈប់លក់ហើយបំណងយកទៅផ្ទះវិញ ភ្លាមនេះស្រាប់តែមានបុរសម្នាក់បើករថយន្តម៉ាកវីស្តូ ពណ៌ក្រហម ពាក់ស្លាកលេខភ្នំពេញ2AB-3404 ធ្វើដំណើរតាមបណ្តោយផ្លូវវេងស្រេង ក្នងទិសដៅពីលិចទៅកើត ក្នុងល្បឿនលឿនបានជ្រុលបុកជនរងគ្រោះពេញទំហឹងហើយអូសជិត១០ម៉ែត្រជាប់ម៉ូតូនៅខាងក្រោមរថយន្តបណ្តាលឲ្យរងរបួសធ្ងន់ ចំណែកម៉ូតូរងការខូចខាតយ៉ាងដំណំផងដែរ។
បន្ទាប់ពីកើតហេតុម្ចាស់រថយន្តបាននាំជនរងគ្រោះទៅមន្ទីរពេទឯកជនមួយកន្លែងរួចហើយក៏បានរត់គេចខ្លួនបាត់ ចំណែករថយន្តនិងម៉ូតូត្រូវបានសមត្ថកិច្ចបានធ្វើការវាស់វែងយកទៅរក្សា ទុកនៅអធិការដ្ឋាន នគរបាលខណ្ឌពោធិ៍សែនជ័យដើម្បីរងចាំម្ចាស់រថយន្តបង្កចួលខ្លួនមកដោះស្រាយតាមផ្លូវច្បាប់៕
