បាត់ដំបង មុខសញ្ញាលួច ប្លន់ត្រូវឃាត់ខ្លួនឡើងវិញ ក្រោយចេញពីគុកបាត់ដំបង: ជនសង្ស័យចំនួនពីរនាក់ដែលជាមុខសញ្ញាលួច និងប្លន់យ៉ាងសកម្មនៅតំបន់ជាយដែលត្រូវបានអស់លក្ខណ៍ ហើយចូលអន្ទាក់ប៉ូលីសជាបន្តបន្ទាប់កាលពីថ្ងៃទី28-4-15វេលាម៉ោងជិត9យប់
នៅចំនុចភូមិកូនភ្នំខាងជើង ឃុំតាស្តា ស្រុកសំពៅលូន ខេត្តបាត់ដំបង បន្ទាប់ពីពួកគេបានធ្វើសកម្មភាព លួចយកម៉ូតូអ្នកភូមិហើយជិះគេចបំរុងយកទៅលក់នៅគោលដៅរបស់គេ។
លោកអធិការរងឈិត សេង បានប្រាប់កម្ពុជាថ្មីថា នៅមុនពេលកើតហេតុគឺជនរងគ្រោះឈ្មោះ ម៉ក់ វ៉ាង ភេទប្រុស អាយុ77ឆ្នាំ រស់នៅក្នុងភូមិឃុំកើតហេតុខាងលើ បានជិះម៉ូតូម៉ាកសង់ធុនC125 ព៌ណខ្មៅស៊ែរី05 ពាក់ស្លាកលេខបាត់ដំបង1C1629 បានបើកបរម្នាក់ឯងតាមបណ្តោយផ្លូវជាតិ ហើយក៏បានបត់ចូលទៅក្នុងរបងផ្ទះដោយចតម៉ូតូទុកនៅខាងមុខផ្ទះ។នៅពេលនោះដែរជនសង្ស័យ ចំនួនពីរនាក់ដែលបានជិះម៉ូតូម៉ាកសង់ព៌ណខ្មៅស៊ែរី011ឡើងតែម014អត់ស្លាកលេខ និងកំពុង ជិះតាមពីក្រោយបានលបចូលទៅដឹកម៉ូតូនោះចេញមកខាងក្រៅហើយផ្តាច់ខ្សែកុងតាក់បញ្ឆេះជិះ ចេញទៅបាត់យ៉ាងមានសុវត្ថិភាព។
ភ្លាមៗម្ចាស់ម៉ូតូបានទូរស័ព្ទទំនាក់ទំនងទៅសមត្ថកិច្ចអោយជួយអន្តរាគមន៍ ដោយមិនបានប៉ុន្មាននាទីផងកំលាំងដែលឈរជើងនៅតាមគោលដៅសំខាន់ៗបានស្ទាក់ចាប់បានម្នាក់ ដោយឡែកបក្ខពួករបស់វាម្នាក់ទៀតបានជិះម៉ូតូគេចខ្លួនបាត់ស្រមោលទាំងយប់តែម្តង ប៉ុន្តែដោយយោងតាមចម្លើយ សារភាព ទើបព្រឹកឡើងសមត្ថកិច្ចបានឈានទៅឃាត់ខ្លួនជនសង្ស័យបានម្នាក់ទៀតនៅចំនុចខាងមុខ ផ្ទះសំណាក់យីហោ”ពេជ្រសីហា”ដោយដកហូតបានម៉ូតូចំនួនពីរគ្រឿងគឺមួយជារបស់ជនរងគ្រោះឯមួយគ្រឿងទៀតគឺជារបស់ជនសង្ស័យដែលលួចពីគេយកមកធ្វើសកម្មភាព។ជនទាំងពីរនេះមានឈ្មោះព័ន្ធ ហុីង ហៅហី ហៅវីរ: ហៅជ្រូក ភេទប្រុស អាយុ34ឆ្នាំនិង ឈ្មោះហ៊ុំ ហុន ភេទប្រុស អាយុ15ឆ្នាំ អ្នកទាំងពីរ
រស់នៅភូមិទួលពង្រ ឃុំទួលពង្រ ស្រុកម៉ាឡៃខេត្តបន្ទាយមានជ័យ ប្រវត្តរបស់ឈ្មោះព័ន្ធ ហុីង គឺធ្លាប់ជាប់គុកចំនួនពីរលើករួចមកហើយចំនួន7ឆ្នាំ ពីបទលួច និងប្លន់ ដោយគេបានធ្វើសកម្មភាពចំនួន7លើករួចមកហើយគឺនៅក្នុងទឹកដីម៉ាឡៃចំនួន 5លើក និងក្នុងស្រុកសំពៅលូនចំនួនពីរលើក ដោយលើកទីមួយប្រព្រឹត្តនៅក្នុងភូមិតាស្តា ឃុំតាស្តា ដែលគេបានប្លន់ម៉ូតូក្មេងស្រីកាលពីថ្ងៃទី10-4-15 វេលាម៉ោង7,30នាទីយប់ លុះនៅលើកចុងក្រោយនេះក៏ត្រូវសមត្ថកិច្ចឃាត់ខ្លួនបានតែម្តង។> ក្រោយពេលសាកសួរ និងធ្វើការស្រាវជ្រាវរួចមកលោកស្នងការរងជេត វណ្ណនី បានសុំគោលការទៅលោកព្រះរាជអាជ្ញាដើម្បីនាំខ្លួនអ្នកទទួលផលចោរកម្មម្នាក់ទៀតឈ្មោះមឿន មិន ភេទប្រុស អាយុ48ឆ្នាំរស់នៅភូមិអូរចំណិត ឃុំតាស្តា ព្រមទាំងបានដកហូតនូវម៉ូតូដែលមិនមានភាពប្រក្រតី សរុបចំនួន6គ្រឿងបន្ថែមទៀតដើម្បីបញ្ជូនទៅកាន់ស្នងការដ្ឋាននគរបាលខេត្តជាអ្នកចាត់ការបន្ត ទៅតាមផ្លូវច្បាប់៕
