ខេត្តព្រះសីហនុ
ព្រឹកថ្ងៃទី០១ ខែឧសភា ឆ្នាំ២០១៥ កំពង់ផែស្វយ័តក្រុងព្រះសីហនុ ប្រារព្ធទិវាពលកម្មអន្តរជាតិ១ឧសភា ២០១៥ ដោយមានការចូលរួមពីបុគ្គលិក កម្មករ សរុប ១៤០៨នាក់ ក្នុងនោះបុគ្គលិកក្របខណ្ឌ ៩១១នាក់ បុគ្គលិកជាប់កិច្ចសន្យា ៨៦នាក់ និងនិវត្តន៌ជន ៤១១នាក់ ក្រោម
អធិបតីភាពឯកឧត្តមកិត្តិសេដ្ឋាបណ្ឌិត គាត ឈន់ ឧបនាយករដ្ឋមន្ត្រីប្រចាំការ និងជាតំណាងដ៌ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តម KUMAMARU YUJI ឯកអគ្គរាជទូតវិសាមញ្ញ និងពេញសមត្ថភាពជប៉ុនប្រចាំកម្ពុជា
ឯកឧត្តមកិត្តិសេដ្ឋាបណ្ឌិត គាត ឈន់ មានប្រសាសន៌ថា ថ្ងៃ១ ឧសភា ជាទីវាប្រវត្តិសាស្ត្រពិភពលោកទាំងមូលបានប្រារព្ធឡើងវិញអំពីភាពជោគជ័យរបស់ពលករកាលពី១២៩ឆ្នាំ ដែលទាមទារឪ្យមានការទទួលស្គាល់នូវតម្លៃនៃពលកម្ម និងគោរពតាមលក្ខខណ្ឌស្មើភាព ក្នុងការប្រកបការងារគ្រប់ប្រភេទ ដោយគ្នានការរើសអើងបងប្អូនកម្មករ និយោជិក និយោជកនៅ
ទូទាំងប្រទេសជាពិសេសបុគ្គលិកកម្មករកំពង់ផែស្វយ័តក្រុងព្រះសីហនុ ក្នុងឪកាសទិវាពលកម្មអន្តរជាតិ ១ឧសភា ២០១៥ ឪ្យក្លាយជាទិវានៃសាមគ្គីភាព ភាតរភាព សមភាព សម្រាប់ពលករកម្ពុជា ក៌ដូចជាមហាគ្រួសារនៃសង្គមជាតិកម្ពុជាទាំងមូល តាមពាក្យស្លោក សាមគ្គីភាព ផលិតភាព និងការងារ ព្រមទាំងអំពាវនាវគ្រប់ភាគីពាក់ពន្ធ័ មេត្តាខិតខំពង្រឹងនូវ ភាពសុខដុមរមនារវាងគ្នានិងគ្នា ដើម្បីភាពសុខដុមរមនានៃមហាគ្រួសារសង្គមខ្មែរ ។ រាជរដ្ឋាភិបាលបានយកចិត្តទុកដាក់លើកកម្ពស់សិទ្ធិស្របច្បាប់របស់ពលករគ្រប់រូបជាក់ស្តែង សិទ្ធិកម្មករ និងសេរីភាពសហជីពត្រូវបានអនុវត្តយ៉ាងម៉ឺងម៉ាត់ ។
ឯកឧត្តមកិត្តិសេដ្ឋាបណ្ឌិត គាត ឈន់ បានបន្តថា រាជរដ្ឋាភិបាលតែងយកចិត្តទុកដាក់ជីវភាពរស់នៅពលករ ដូចជាការដំឡើងប្រាក់ឈ្នួលអប្បបរមាជាបន្តបន្ទាប់នាពេលកន្លងមក ព្រមទាំងផ្តល់សំណាញ់សុវត្ថិភាពសង្គមជូនកម្មករ កម្មការីនី និងយុវជន យុវនារី និងគ្នានការងារធ្វើតាមរយះមូលនិធិពិសេសសម្តេចតេជោនាយករដ្ឋមន្ត្រី ដើម្បីការដំឡើងប្រាក់ឈ្នួលអប្បបរមាផ្តល់ផលពិតប្រាកដដល់កម្មករ និយោជិក ដើម្បីជួយសម្រួលបន្ទុកចំណាយ ដូចជាយុទ្ធនាការរបស់អគ្គីសនីកម្ពុជាចុះភ្ជាប់ចរន្តអគ្គីសនី ៦១០រៀល ជូនលំនៅដ្ឋាន ផ្ទះជួល បន្ទប់ជួលប្រជាពលរដ្ឋក្រីក្រ ពិសេសកម្មករ និយោជិកកំពុងបម្រើការងារនៅតាមរោងចក្រ មិនតែប៉ុណ្ណោះរដ្ឋាភិបាលអំពាវនាវឪ្យម្ចាស់ផ្ទះ បន្ទប់ជួលផ្គត់ផ្គង់ទឹកស្អាតជូនកម្មករ និយោជិក និងសិស្ស និស្សិត ប្រើប្រាស់គ្រប់គ្រាន់ក្នុងតម្លៃ ១២០០រៀលក្នុងមួយម៉ែត្រគូប ។ សម្តេចតេជោនាយករដ្ឋមន្ត្រីផ្តល់អនុសាសន៌ណែនាំឪ្យក្រសួង ស្ថាប័ន និងអង្គភាពពាក់ពន្ធ័ បន្តខិតខំអនុវត្តឪ្យបានជោគជ័យនូវកំណែទម្រង់ស៊ីជំរៅទាំង ៥ចំណុច ក្នុងផែនការយុទ្ធសាស្ត្រអភិវឌ្ឍវិស័យការងារឆ្នាំ២០១៤-២០១៨ ទី១ ការអភវឌ្ឍលក្ខខណ្ឌការងារនិងសុខដុមនីយកម្មក្នុងវិជ្ជាជីវះ ទី២ ការអភិវឌ្ឍការអប់រំ និងបណ្តុះបណ្តាលបច្ចេកទេស និងវិជ្ជាជីវះ ទី៣ ការអភិវឌ្ឍមុខរបរ និងការ ទី៤ ការអភិវឌ្ឍរបបសន្តិសុខសង្គម សម្រាប់ជនទាំងឡាយស្ថិតក្រោមបទបញ្ញាតិ្តនៃច្បាប់ស្តីពីការងារ និងទី៥ ការពង្រឹងសេវាសាធារណះល្អ ។
ឯកឧត្តមកិត្តិសេដ្ឋាបណ្ឌិត គាត ឈន់ បានបន្តថា កំពង់ផែស្វយ័តក្រុងព្រះសីហនុបានចូល រួមចំណែកសំខាន់ក្នុងការអភិវឌ្ឍសេដ្ឋកិច្ចកម្ពុជា ដែលមានទំនិញឆ្លងកាត់កើនឡើងពីមួយឆ្នាំទៅ មួយឆ្នាំជាក់ស្តែង បិរមាណទំនិញឆ្លងកាត់ក្នុងឆ្នាំ២០១២ មានចំនួនប្រមាណជាង ២.៦លានតោន ២០១៣ ប្រមាណ៣លានតោន ២០១៤ប្រមាណ ៣.៤លានតោន និងក្នុងឆ្នាម២០១៥នេះ កាប៉ាន់ប្រមាណនឹងសម្រេចបានជិត ៤លានតោន ។ ការវិនិយោគលើការដឹកជញ្ជូនផ្លូវទឹក និងការកែសម្រួលសេវាពាក់ពន្ធ័នឹងការដឹកជញ្ជូន នាំមកនូវ ការកាត់បន្ថយថ្លៃដឹកជញ្ជូន ការបង្កើតភាពអាចទុកចិត្តបាន និងភាពស័ក្តិ សិទ្ធិ ការពង្រឹងភាពប្រកួតប្រជែង និងការបង្កើនការវិនិយោគនិងពាណិជ្ជ កម្ម ។ នៅពេលខាងមុខកំពង់ផែស្វយ័តក្រុងព្រះសីហនុបំពាក់មធ្យោបាយ គ្រឿងចក្រផ្ទេរ ផ្ទុកកុងតឺនរ័ នៅគែមផែប្រភេទ QC (Quay Gantry Crane)ចំនួន០១គ្រឿង និងគ្រៀងចក្រលើកដាក់កុងតឺន័រ នៅទីលានប្រភេទ RTG (Rubber Tire Gantry Crane ចំនួន០៥គ្រៀងបន្ថែមទៀត ដោយថវិកាកំពង់ផែក្នុងតម្លៃ ១២លានដុល្លា ដើម្បីពង្រឹងសមត្ថភាព និរន្តរភាពនិងបង្កើនល្បឿនសេវាកម្មរបស់ខ្លួន ។ ហើយការបើកសម្ពោធការដ្ឋានសាងសង់ចំណតពហុបំណង និងមូលដ្ឋានផ្គត់ផ្គង់ភស្តុភារ សម្រាប់រុករកប្រេងនៅដែនសមុទ្រកម្ពុជា និងចំណតផែមានជម្រៅទឹករហូតដល់ ១៣.៥ម៉ែត្រ អាចឪ្យនាវាដឹកទំនិញរាយ ចាក់ធារដែលមានចំណុះពី៣០ទៅ ៤០ពាន់តោន ចូលចតបាន និងបង្កើនបន្ថែមទៀតនូវការនាំចេញអង្ករ កំទេចឈើ ដំឡូងមី និងកសិផលជាដើមបន្ថែមទៀត ។
បន្ទាប់គណអធិបតី និងឯកឧត្តមកិត្តិសេដ្ឋាបណ្ឌិត គាត ឈន់ ក៌បានអញ្ញើញចុចបូតុង បើកការដ្ឋានសាងសង់ចំណតផែពហុបំណង និងមូលដ្ឋានផ្គត់ផ្គង់ភស្តុភារ ៕
