កំពង់ឆ្នាំង៖ ដើម្បីរៀបចំសណ្តាប់ធ្នាប់លក់ដូរអោយមានរបៀបរៀបរយ មានអនាម័យល្អ និងមានសោភ័ណភាពទាំងនៅក្នុងផ្សារលើ និងសងខាងផ្សារលើ នៅព្រឹកថ្ងៃទី០១ ខែឧសភា ឆ្នាំ២០១៥ គណៈកម្មាការចំរុះដែលដឹកនាំដោយលោក ស៊ុន សុវណ្ណរិទ្ធ អភិបាលរងខេត្តកំពង់
ឆ្នាំង និងលោក ហៃ មនោរម្យ អភិបាលក្រុងកំពង់ឆ្នាំងបានចុះត្រួតពិនិត្យសណ្តាប់ធ្នាប់របៀបរៀបរយ អនាម័យ និងសោភ័ណភាពនៃការលក់ដូររបស់អាជីវករទាំងអស់នៅក្នុងផ្សារលើ។
ក្រោយពីបានចុះពិនិត្យការលក់ដូររបស់អាជីវករក្នុងផ្សារលើ លោក ហៃ មនោរម្យ អភិបាលក្រុងកំពង់ឆ្នាំងបានអោយដឹងថា៖នៅថ្ងៃទី០៥ ខែឧសភា ឆ្នាំ២០១៥ខាងមុខនេះ អាជ្ញាធរខេត្ត នឹងកោះអញ្ជើញក្រុមហ៊ុនលោក ថូ ម៉ាក់ ដែលជាអ្នកវិនិយោគផ្សារលើ និងគណកម្មាការផ្សារលើមកប្រជុំនៅសាលាខេត្ត ដើម្បីត្រួតពិនិត្យកិច្ចការងារអនុវត្តសៀវភៅបន្ទុករបស់ផ្សារលើ។ព្រោះថាជាង១០ឆ្នាំកន្លងមកនេះ ក្រុមហ៊ុន ថូ ម៉ាក់ មិនបានអនុវត្តត្រឹមត្រូវតាមសៀវភៅបន្ទុកទេដូចជា៖ មិនជួសជុលថែទាំផ្សារដែលមានការធ្លុះធ្លាយ មិនគិគូរៀបចំសណ្តាប់លក់ដូរ បណ្តែតបណ្តោយអោយអាជីវករតតូបលក់ដូរលៀនលយ និងដាក់ឥវ៉ាន់លក់ដូរយ៉ាងទំនើងចិត្តរាំងស្ទះផ្លូវចេញចូលហើយបែរជាថាលក់មិនដាច់។កន្លងមក ពួកគេបានលួចលក់ដីរាប់រយរាប់ពាន់ដុល្លា អោយអ្នកលក់ដូរធ្វើតូបនៅសងខាងផ្សារយ៉ាងអាណាធិបតេយ្យ យកថ្លៃភាស៊ី ថ្លៃអនាម័យ មួយចំនួនខុសមុខសញ្ញា ខុសសៀវភៅបន្ទុក បង្កអោយមានផលលំបាកដល់អាជ្ញាធរ។
លោកអភិបាលក្រុងបានបញ្ជាក់អោយដឹងទៀតថា៖ក្រោយពេលប្រជុំជាមួយក្រុមហ៊ុន ថូ ម៉ាក់រួច ចាប់ពីថ្ងៃទី០៥ ខែឧសភា ឆ្នាំ២០១៥តទៅ បើក្រុមហ៊ុន ថូ ម៉ាក់ និងគណកម្មាការផ្សារលើគោរពល័ក្ខ ខ័ណ្ឌក្នុងសៀវភៅបន្ទុមិនបាននោះទេ ទោះបីមិនទាន់ចប់អណត្តិក៍ដោយ អាជ្ញាធរខេត្តក្រុងនឹងធ្វើរបាយការណ៍សំណូមពរថ្នាក់ ដកហូតអាជ្ញាប័ណ្ណមុនអណត្តិ មិនទុកអោយក្រុមហ៊ុន ថូ ម៉ាក់ បង្កភាពអនាធិបតេយ្យ ធ្វើអោយអាជីវករផ្សារលើទាំងអស់នៅតែថ្នាំងថ្នាក់ជាមួយអាជ្ញាធរទៀតនោះឡើយ។
ផែនការរៀបចំសណ្តាប់ធ្នាប់លក់ដូរអោយមានរបៀបរៀបរយក្នុងផ្សារលើឡើងវិញ អាជ្ញាធរខេត្តនឹងបង្កើតគណកម្មាការចំរុះមួយដែលមានគ្រប់ស្ថាប័នពាក់ពន្ធ័ និងដោយលោកព្រះរាជអាជ្ញាអមសាលាដំបូងខេត្តចូលរួមផងដែរ ដោយតំរូវអោយអាជីវករនៅក្នុងផ្សារលើកាត់តំរឹមតូប ឬរានលក់ដូររបស់ខ្លួនដែលលៀនលយចេញស្ទះផ្លូវ ខុសពីប្លង់នៃសៀវភៅបន្ទុក ហើយធ្វើការលាងសំអាតក្នុងផ្សារអោយមានអនាម័យ និងបូមលូកុំអោយមានសំរាមកកស្ទះ។បើហួសពេលកំណត់ អាជីវករក្នុងផ្សារមិនអនុវត្តបាននោះ ទេគណៈកម្មាការចំរុះនឹងធ្វើការរុះរើ ហើយតំរូវអោយម្ចាស់តូបទាំងនោះជាអ្នកចេញសោហ៊ុយទាំងអស់។
ដោយឡែកចំពោះអាជីវករដែលលក់ដូរនៅសងខាងផ្សារលើ អាជ្ញាធរនឹងសំណូមពរអោយចេញ ទៅលក់ដូរខាងក្រៅមួយរយៈសិន ក្រោយពេលសម្ភោធខេត្តទទួលសមិទ្ធិផលផ្លូវថ្នល់ និងប្រព័ន្ធ ពីរាជរដ្ឋាភិបាលជប៉ុនរួច គណៈកម្មាការរៀបចំផ្សារលើ តំរូវអោយពួកគាត់ទៅចុះឈ្មោះចាប់ឆ្នោតយកលេខរៀងរានលក់ដូរទៅតាមប្រភេទនៃការលក់ដូរដែលរានតូច ឫរានធំទៅតាមមុខរបរជាក់ស្តែង។
លោកអភិបាលក្រុងកំពង់ឆ្នាំងបានបន្តអោយដឹងទៀតថា៖ក្នុងការអនុវត្តគំរោងខាងលើនេះ អាជីវករភាគច្រើនបានគាំទ្រ។ប៉ុន្តែអាជីវករមួយចំនួនតូចនៅតែមានការតវ៉ា ព្រោះតែបាត់បង់ផលប្រយោជន៍ធំរបស់ពួកគេ ដែលអ្នកតវ៉ាមួយចំនួននោះខ្លះគឺជាសមាជឹករបស់គណកម្មាការផ្សារលើ ដែលកន្លងមកគេធ្លាប់បានជួលឆ័ត្រអោយអាជីវកររាប់រយឆ័ត្រក្នុង១ថ្ងៃៗ និងមានចំណូលរាប់លានរៀលក្នុង១ថ្ងៃៗ ដូច្នេះហើយទើបពួកគេតវ៉ាមិនចង់អោយអាជ្ញាធរខត្តធ្វើរានអោយអាជីវករសងខាងផ្សារលើលក់ដូរ៕
