ខេត្តកំពង់ឆ្នាំង៖កាលពីវេលាម៉ោងជិត១០យប់ ថ្ងៃទី២ ខែឧសភា ឆ្នាំ២០១៥ មនុស្សស្រីប្រុស៥នាក់ បានរងរបួសធ្ងន់ និងស្រាល នៅក្នុងហេតុការណ៍គ្រោះថ្នាក់ចរាចរណ៍មួយ ដែលបង្កឡើងដោយរថយន្តពីរគ្រឿង បានបុកគ្នាពេញមួយទំហឹង ហើយអូសជាង១០ម៉ែត្រ នៅលើកំណាត់ផ្លូវជាតិលេខ៥ ស្ថិតក្នុងភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ។
សមត្ថកិច្ចនគរបាលចរាចរណ៍ ក្រុងកំពង់ឆ្នាំង បានអោយដឹងថា នៅមុនពេលកើតហេតុ គេឃើញមានរថយន្តដឹកទំនិញមួយ ម៉ាហ់ហ្វុយហ្ស៊ូ ពាក់ស្លាកលេខ បាត់ដំបង 3A-0278 ធ្វើដំណើរក្នុងទិសដៅពីត្បូងទៅជើង នៅពេលមកដល់ចំណុចកើតហេតុ ដែលជាចំណុចផ្លូវបំបែកជាបួន ស្រាប់តែមានរថយន្តតូយូតា កាមរីបាឡែនមួយគ្រឿង ពាក់ស្លាកលេខ ភ្នំពេញ 2AD-5072 ធ្វើដំណើរក្នុងទិសដៅពីលិចទៅកើត ចេញពីផ្លូវក្រាលកៅស៊ូ របស់ខេត្ត ដោយបើកក្នុងល្បឿនយ៉ាងលឿន បានបើកចូលទៅខាងស្តាំផ្លូវរថយន្តដឹកទំនិញ បណ្តាលអោយរថយន្តដឹកទំនិញ បុកពេញមួយទំហឹង រថយន្តជាប់គ្នាអូសជិត១០ម៉ែត្រ បណ្តាលអ្នកជិះនៅក្នុងរថយន្តបាឡែន ចំនួន៥នាក់រងរបួសធ្ងន់និងស្រាល ។
ក្រោយពេលកើតហេតុ ជនរងគ្រោះត្រូវបានដឹកទៅសង្គ្រោះ នៅមន្ទីរពេទ្យបង្អែក ខេត្តកំពង់ឆ្នាំង ដោយមធ្យោបាយបង្ក ត្រូវបានដឹកយកទៅរក្សាទុក នៅអធិការនគរបាលក្រុងកំពង់ឆ្នាំង ដើម្បីរង់ចាំធ្វើការដោះស្រាយតាមនីតិវិធី ។
សមត្ថកិច្ចបានអោយដឹងទៀតថា ភាគីខាងរថយន្តកាមរីបាឡែន គឺទើបចេញពីហូបការមិត្តភ័ក្តិ នៅសណ្ឋាគារសំរោងសែន ខេត្តកំពង់ឆ្នាំង ហើយក៏ជួបហេតុការណ៍នេះតែម្តង ពោលគឺទំនងជាអ្នកជិះក្នុងរថយន្តទាំងអស់ស្រវឹង ទើបបង្កឲ្យមានគ្រោះថ្នាក់បែបនេះតែម្តងទៅ ៕
