ភ្នំពេញ៖ មនុស្សចំនួន៥នាក់បានរងរបួសធ្ងន់និងស្រាលត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ ចំណុចខាងកើតនិងប្រេងឥន្ទនៈកាលតិច តាមបណ្តោយផ្លូវសហព័ន្ធរុស្ស៊ី ស្ថិតក្នុងសង្កាត់ភ្នំពេញថ្មី ខណ្ឌសែនសុខ កាលពីវេលាម៉ោង២រំលងអាធ្រាតឈានចូលថ្ងៃទី៤ ខែឧសភា ឆ្នាំ២០១៥ បន្ទាប់កើតហេតុរថយន្តបង្កបានបើកគេចខ្លួនបាត់ស្រមោលតែម្តង។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញម៉ូតូ២គ្រឿង មួយគ្រឿងម៉ាកសងកូរ៉េ ពណ៌ក្រហម គ្នានស្លាកលេខជិះដោយយុវជន ៣នាក់ និងមួយគ្រឿងទៀតប្រភេទម៉ូតូលេខអូតូ ពណ៌ខ្មៅពាក់ស្លាកលេខភ្នំពេញ1AH-5719 ជិះគ្នា២នាក់ បានធ្វើដំណើរតាមបណ្តោយផ្លូវសហព័ន្ធរុស្ស៊ី ក្នុងទិសដៅពីលិចទៅកើត ខណៈមកដល់ចំណុចកើតហេតុស្រាប់តែមានរថយន្តមួយគ្រឿងមិនចាំស្លាកលេខធ្វើដំណើរស្របទិសគ្នា ក្នុងល្បឿនលឿន ហើយបានបុករៈម៉ូតូទាំង២គ្រឿងពីក្រោយពេញទំហឹងនិងអូសជាង១០ម៉ែត្របណ្តាលឲ្យនាក់ជិះម៉ូតូទាំង២គ្រឿងរងរបួសធ្ងន់ ចំណែកម៉ូតូរងការខូចខាតយ៉ាងដំណំ។
សាក្សីដដែលបានបន្តថា បន្ទាប់ពីរថយន្តបង្កបានបុកម៉ូតូទាំង២គ្រឿងហើយរថយន្តបានបន្ថែមល្បឿនបើកគេចខ្លួនបាត់ស្រមោលតែម្តងដោយមិនមាននណារម្នាក់ម៉ាកនោះទេ។
ក្រោយពេលកើតហេតុជនរងគ្រោះត្រូវបានរថយន្តសង្គ្រោះដឹកទៅសង្គ្រោះនៅមន្ទីរពេទ្យភ្លាមៗចំណែកម៉ូតូត្រូវបានសមត្ថកិច្ចមូលដ្ឋានយកទៅរក្សាទុកបណ្ណោះអាសន្ន៕
