កំពង់ឆ្នាំង៖ មនុស្សប្រុសស្រីចំនួន៤នាក់ត្រូវបានរងរបួសធ្ងន់ស្រាល នៅក្នុងហេតុការណ៍គ្រោះថ្នាក់ចរាចរណ៍ រថយន្ត៥តោនបុករថយន្តបាឡែនកំពុងឆ្លងផ្លូវ ហេតុការណ៍នេះបានកើតឡើងនៅលើផ្លូវជាតិលេខ៥ វេលាម៉ោង៩និង៤០នាទីយប់ថ្ងៃទី០២ ខែឧសភា ឆ្នាំ២០១៥ នៅចំណុចផ្លូវបែកជាបួន ស្ថិតក្នុងភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង នៅមុខផ្ទះសំណាក់ផ្កាយព្រឹក។
សមត្ថកិច្ចនគរបាលចរាចរណ៍ក្រុងកំពង់ឆ្នាំងបានអោយដឹងថា៖ ជនរងគ្រោះទាំង៤នាក់មានឈ្មោះ ច្រឹង សាវុធ ភេទប្រុស អាយុ៣៦ឆ្នាំរងរបួសធ្ងន់,អៀន ស៊ីថា ប្រុសអាយុ៣៥ឆ្នាំរងរបួសស្រាល,ឈាន វុន ភេទប្រុស អាយុ៣៤ឆ្នាំ,និងស្ត្រីម្នាក់ទៀតមិនស្គាល់ឈ្មោះ រងរបួសធ្ងន់ អ្នកទាំងអស់គ្នារស់នៅទីក្រុងភ្នំពេញ។
មុនពេលកើតហេតុ គេឃើញរថយន្ត៥តោនមួយគ្រឿង ពណ៌ស ពាក់ផ្លាកលេខ បាត់ដំបង3A-0278 បានបើកបរក្នុងល្បឿនលឿនតាមបណ្តោយផ្លូវជាតិលេខ៥ពីត្បូងទៅជើង លុះមកដល់ផ្លូវបែកជាបួន និងជាផ្លូវបត់កោងផងនោះ ក៍ស្រាប់តែមានរថយន្តកាមរីបាឡែនពណ៌ស្ករ ពាក់ផ្លាកលេខ ភ្នំពេញ2AD-5072 បានបើកឆ្លងកាត់ផ្លូវ ក៍ត្រូវរថយន្ត៥តោនបុកចំចំហៀងខាងស្តាំពេញទំហឹង រួចអូសចំងាយ២២,៧០ម៉ែត្រ និងបានបោកផ្ទប់រថយន្តបាឡែនទៅនឹងរបងថ្មផ្ទះសំណាក់ និងផ្ទះប្រជាពលរដ្ឋ បាក់អស់ប្រមាណជាង១០ម៉ែត្រទៀតផង។
ក្រោយពេលកើតហេតុ អ្នករងគ្រោះទាំងអស់ ត្រូវបានសមត្ថកិច្ចនគរបាលចរា ចរណ៍ក្រុងកំពង់ឆ្នាំង ដឹកបញ្ជូនតាមរថយន្តសង្គ្រោះ យកទៅសង្គ្រោះព្យាបាល នៅមន្ទីរពេទ្យខេត្តកំពង់ឆ្នាំង តែដោយស្ថានភាពស្ត្រីរងគ្រោះម្នាក់ទៀតមានសភាពធ្ងន់ធ្ងរ ក្រុមគ្រួសារស្ត្រីរងគ្រោះបានបញ្ជូនបន្តយកទៅសង្គ្រោះនៅមន្ទីរពេទ្យក្រុងភ្នំពេញបន្តទៀត។
រថយន្តកាមរីរងការខូចខាតទាំងស្រុង រីឯរថយន្ត៥តោនខូចខាតមធ្យម រថយន្តទាំង២គ្រឿង ត្រូវបានសមត្ថកិច្ចនគរបាលចរាចរណ៍ក្រុង អូសយកមករក្សាទុកនៅអធិការដ្ឋាននគរបាលក្រុងកំពង់ឆ្នាំង រង់ចាំការដោះស្រាយតាមនីតិវិធី។ប៉ុន្តែនៅ វេលាម៉ោង៥និង១០នាទីល្ងាច ថ្ងៃទី០៣ ខែឧសភា ឆ្នាំ២០១៥ គេឃើញខាងម្ចាស់រថយន្ត ៥តោន បានមកសាងយកឥវ៉ាន់ពីក្នុងរថយន្តនោះចេញ។
សមត្ថកិច្ចបានសន្និដ្ឋានថា៖រថយន្តទាំង២មានកំហុសម្យ៉ាងម្នាក់ ដោយរថយន្ត កាមរីបាឡែនពេលឆ្លងផ្លូវមិនគោរពសិទ្ធអាទិភាពរបស់គេ និងមិនប្រុងប្រយ័ត្ន ដោយឡែករថយន្ត៥តោនវិញ បើកហួសល្បឿនកំណត់ក្នុងក្រុង និងមិនប្រយ័ត្នផ្លូវនៅចំណុចផ្លូវកោង ដែលមានគ្រោះថ្នាក់ ទើបបង្កអោយមានគ្រោះថ្នាក់ធ្ងន់បែបនេះកើតឡើង៕
