កំពង់ឆ្នាំង៖ សាលាដំបូងខេត្តកំពង់ឆ្នាំង បានសម្រេចឃុំខ្លួនជនសង្ស័យម្នាក់ នៅល្ងាច ថ្ងៃទី០៥ ខែឧសភា ឆ្នាំ២០១៥ ចោទប្រកាន់ពីបទប្រើអំពើហឹង្សាដោយចេតនា បណ្តាលអោយជនរងគ្រោះ ម្នាក់រងរបួសធ្ងន់ ធ្ងរនៅក្នុងពីធីមង្គលការមួយ នៅភូមិច្រាបកន្ទួត ឃុំពាម ស្រុក
សាមគ្គីមានជ័យ ករណីនេះបានប្រព្រឹត្តឡើង វេលាម៉ោង៧និង៣០នាទៅយប់ថ្ងៃទី០៣ ខែឧសភា ឆ្នាំ២០១៥ លោក ឌុច ចំរើន នាយនគរបាលព្រហ្មទ័ណ្ឌកំរិតធ្ងន់ នៃស្នងការដ្ឋាននគរបាលខេត្ត បានអោយដឹងថាៈ ជនសង្ស័យដែលត្រូវបានតុលាការឃុំខ្លួននោះមានឈ្មោះ ហ៊ុំ ចិត្រា អាយុ២១ឆ្នាំ មានទីលំនៅក្នុងខេត្តកំពង់ចាម។ចំណែកជនរងគ្រោះដែលកំពុងសម្រាកព្យាបាលរបួសនៅមន្ទីរពេទ្យកាលម៉ែត្រ មានឈ្មោះកង ណែត អាយុ២៦ឆ្នាំ មានទីលំនៅភូមិច្រាបកន្ទួត ឃុំពាម ស្រុកសាមគ្កីមានជ័យ ។
លោកប្រធានការិយាល័យបានបញ្ជាក់អោយដឹងថាៈ នៅថ្ងៃកើតហេតុ ជនសង្ស័យ និងមិត្តភ័ក្រចំនួន១០នាក់ ដែលធ្វើការនៅភ្នំពេញ ជាមួយកូនកម្លោះ បានមកចូលរួមនិង ជួយកំដរការកូនកម្លោះជាមិត្រភ័ក្ររបស់គេ នៅ ភូមិ ឃុំ កើតហេតុខាងលើ ។លុះដល់ល្ងាចឡើងក្នុងពីធីរាំលេងកំសាន្ត ភាគីកូនកម្លោះ បានប៉ះសំដីមានទំនាស់គ្នាជាមួយភាគីកូនក្រមុំដែលជាម្ចាស់ស្រុក ហើយកឈានដល់ការប្រវ៉ាយប្រតប់គ្នាមួយប្រ៉ាវ បណ្តាលអោយភាគីខាងកូនកម្លោះម្នាក់ឈ្មោះ សី រងរបួសបែកក្បាល ហើយត្រូវបានប្រជាពលរដ្ឋនិងប្រជាការពារបាននាំគ្នាឃាត់និងស្ងប់ស្ងាត់ ព្រមជាមួយបិទធុងបាស់ផងដែរ ។
ក្រោយមកភាគីខាងកូនកម្លោះមិនអស់ចិត្ត ខណៈឃើញជនរងគ្រោះឈ្មោះ កង ណែត ដែលជាភាគីខាងកូនក្រមុំ ដើរតែម្នាក់ឯងត្រឡប់ទៅផ្ទះវិញ ភាគីកូនកម្លោះដែលមានគ្នាច្រើននាក់បាននាំគ្នាពួនស្ទាក់វាយ ជនរងគ្រោះបណ្តាលអោយរងរបួសធ្ងន់ធ្ងរ ហើយត្រូវក្រុមគ្រួសារដឹកទៅសង្គ្រោះនៅមណ្ឌលសុខភាពស្រុកកំពង់ត្រឡាច និងបានត្រូវក្រុមគ្រូពេទ្យបញ្ជូនបន្តទៅសង្គ្រោះព្យាបាលបន្តនៅមន្ទីរពេទ្យកាល់ម៉ែត ក្រុងភ្នំពេញ។
ចំណែកបក្ខពួកជនដៃដល់បាននាំគ្នាគេចខ្លួនអស់ នៅសល់តែជនសង្ស័យម្នាក់ ឈ្មោះ ហ៊ុំ ចិត្រា ត្រូវបានសមត្ថកិច្ចចាប់ឃាត់ខ្លួន កសាងសំណុំរឿងបញ្ជូន ទៅកាន់សាលាលដំបូងខេត្ត។ លោក ឌុច ចំរើន បានបន្តថាៈ ក្នុងជម្លោះខាងលើគឺបណ្តាលមកពីការ ផឹកស្រចឹងរាំវង់ឌឺដង និងប៉ះសំដីគ្នា រវាងភាគីកូនកម្លោះ និងភាគីកូនក្រមុំជាម្ចាស់ទឹកដី ទើបកើតជម្លោះហឹង្សាបែបនេះ ដោយម្នាក់របួសធ្ងន់កំពុងដេកពេទ្យ និងម្នាក់ទៀតបក្ខពួកជនដៃដល់ចូលដេកក្នុងពន្ឋនាគារខេត្ត ៕
