សៀមរាបៈ ពេលនេះជារដូវប្រាំងអាកាសធាតុមានភាពរាំងស្ងួតហួតហែងក្តៅខ្លាំងព្រៃងាយនឹងភ្លើងឆេះ។ ជាក់ស្តែងនៅចំណុចស្ទឹងកំបុត, អូរតាជ័យ, ខ្វែងតាមាស, ស្ថិតក្នុងឃុំអន្លង់សំណរ ស្រុកជីក្រែង ព្រៃលិចទឹកដែលជាវារីជីវៈចម្រុះត្រូវភ្លើងស្ទើរទាំងស្រុង នៅចុងខែមេសា និងដើមខែឧសភានេះ។ ករណីបំផ្លាញប្រព័ន្ធអេកូឡូស៊ីជលផលចំណុចទាំងនេះ មានការសន្និដ្ឋានពីប្រជាពលរដ្ឋថា នៅចំណុចស្ទឹងកំបុតការដុតព្រៃគឺជាចេតនារបស់បុគ្គល ក្នុងគោលបំណងយកផ្ទៃដីធ្វើកសិកម្ម។
ព្រោះមានស្នាមអារឈើ និងដែករណា និងស្នាមកាប់ព្រៃចាស់ថ្មី ចំណែកឯកន្លែងផ្សេងទៀតពុំទាន់មានការសន្និដ្ឋានច្បាស់លាស់ទេជុំវិញបញ្ហាទាំងនេះ លោក សេង យន់ មេឃុំអន្លង់សំណរបាននិយាយថា លោកធ្លាប់ធ្វើការផ្សព្វផ្សាយពិផលប្រយោជន៍ព្រៃលិចទឹកដល់ប្រជាពលរដ្ឋជាច្រើនដងដែរ។ ប៉ុន្តែនៅតែមានជនអគតិមួយចំនួនដុតបំផ្លាញដីកសម្បទានរបស់រដ្ឋមកធ្វើជាកម្មសិទ្ធ គាត់បន្តទៀតថា គាត់នឹងអោយមន្ត្រីក្រោមឱវាទរបស់គាត់ប្រឹងប្រែងស៊ើបរកឈ្មោះអ្នកដុតដើម្បីយកមកដាក់ទោសតាមច្បាប់។ ដោយ អុក ផ្លុង
