មន្ត្រីនគរបាល នៃអធិការដ្ឋាន ស្រុកកំពង់ត្រឡាច កាលពីថ្ងៃទី៧ ខែមេសា ឆ្នាំ២០១៤ បានរៀបចំធ្វើពិធីសូត្រមន្ត ចំរើនសិរីសួស្តី នៅក្នុងឱកាសបុណ្យចូលឆ្នាំថ្មី ឆ្នាំមមី ឆស័ក ពុទ្ធស័ករាជ ២៥៥៨ និង បាននិមន្តព្រះសង្ឃ ធ្វើកិច្ចរំដោះគ្រោះ នៅតាមដងផ្លូវ ដែលជាចំណុចកើតឡើង នូវ
ករណីគ្រោះថ្នាក់ចរាចរណ៌ញឹកញាប់ បណ្តាលអោយមនុស្សស្លាប់ និងរបួសជាច្រើន ។
ស្នូសូត្រធម៌ និងដំណើរព្យុះហយាត្រា របស់ព្រះសង្ឃចំនួន៦អង្គ និងមន្ត្រីនគរបាលជាច្រើននាក់ បាននិមន្ត និងចេញដំណើរពីអធិការដ្ឋាននគរបាល ស្រុកកំពង់ត្រឡាច ឆ្ពោះទៅកាន់ផ្លូវជាតិលេខ៥ និងផ្លូវ សំខាន់ៗ ក្នុងស្រុកមួយចំនួនទៀត ។
នៅត្រង់ចំណុចធ្លាប់កើតមានករណី គ្រោះថ្នាក់ចរាចរណ៌ញឹកញាប់ ដែលបណ្តាលអោយមនុស្ស ស្លាប់ និងរងរបួស ព្រះសង្ឃបានធ្វើកិច្ចដោយសូត្រធម៌ បង្សុកូល ប្រោះព្រហ្ម ទឹកមន្ត ដេញឧបទ្រុពចង្រៃ អោយបវាសចៀសឆ្ងាយ និងសុំមកវិញនូវសេចក្តីសុខសប្បាយ ដល់អ្នកដំណើរទាំងឡាយ កុំអោយជួបនូវ ហេតុការណ៌អាក្រក់ដូចមុនៗទៀត ។
លោក ហ៊ុល វាសនា អធិការនគរបាល ស្រុកកំពង់ត្រឡាច បានមានប្រសាសន៌ អោយដឹងថា នៅក្នុងឱកាស ដែលពិធីបុណ្យចូលឆ្នាំថ្មី ប្រពៃណីជាតិ នឹងឈានចូលមកដល់ នៅក្នុងពេលឆាប់ៗ ខាងមុខនេះ កម្លាំងប៉ូលីសចរាចរណ៌ បានចាប់ផ្តើមរឹតបន្តឹង និងដាក់កម្លាំងចុះត្រួតពិនិត្យ ការអនុវត្តន៌ច្បាប់ ចរាចរណ៌ផ្លូវគោក ក្នុងគោលបំណង ពង្រឹងការគោរពច្បាប់ចរាចរណ៌ ដើម្បីកាត់បន្ថយគ្រោះថ្នាក់ចរាចរណ៌ អោយនៅកម្រិតទាបបំផុត ។
ក្នុងពេលជាមួយគ្នានេះ កម្លាំងនគរបាល ស្រុកកំពង់ត្រឡាច ក៏បានដាក់អោយឈរជើង នៅតាម គោលដៅសំខាន់ៗមួយចំនួន ដូចជាទីវត្តអារាម និងរម្យនីយ៌ដ្ឋាននានា ដែលប្រជាពលរដ្ឋ ទៅធ្វើបុណ្យ និងទៅលេងកំសាន្ត ដើម្បីរក្សាសន្តិសុខ និងសណ្តាប់ធ្នាប់ ជូនពួកគាត់អោយបានល្អប្រសើរ ៕
