ខេត្តប៉ៃលិន៖ ការលើកឡើងរបស់ប្រជាពលរដ្ឋនេះ កើតឡើងកាលពី រសៀលថ្ងៃទី៧ ខែឧសភា ឆ្នាំ២០១៥ នៅភូមិផ្សាព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដោយប្រជាពលរដ្ឋប្រមាណ១០៥គ្រួសារមានការកើតទុកមិនសុខចិត្ត បានប្តឹងតវ៉ាដល់អាជ្ញាធរខេត្តឲ្យរកដំណោះស្រាយជូនពួកគាត់ អំពីបញ្ហាភ្លើងឡើងគីឡូខុសពីធម្មតា ក្នុងខែមិនា ឆ្នាំ២០១៥កន្លងទៅ។ ហើយការប្តឹងតវ៉ានេះ បានកើតឡើងជាច្រើនដងរួចមកហើយ ប៉ុន្តែអាជ្ញាធរខេត្តប៉ៃលិន ពុំមានវិធានការដោះស្រាយឲ្យពួកគាត់នោះទេ ទុកឲ្យក្រុមហ៊ុនអគ្គីសនីឯកជនមួយនេះ ធ្វើតាមអំពើចិត្ត ។
ប្រភពព័ត៌មានពីប្រជាពលរដ្ឋជាច្រើនគ្រួសាររស់នៅភូមិផ្សារព្រំ ឃុំស្ទឹងកាច់ បានឲ្យអ្នកយកព័ត៌មានដឹងថា៖ កាលពីថ្ងៃទី១២ខែមេសាឆ្នាំ២០១៥កន្លងទៅថ្មីៗនេះ អាជ្ញាធរខេត្តប៉ៃលិនបានអនុញ្ញាតិអោយតំណាងមន្ទីររ៉ែថាមពល តំណាងក្រុមហ៊ុនភ្លើងអគ្គីសនីឯកជនផ្សារព្រំ និងតំណាងប្រជាពលរដ្ឋមកចូលរួមប្រជុំដោះស្រាយម្តងរួចមកហើយ ជាលទ្ធផល តំណាងក្រុមហ៊ុនភ្លើងអគ្គីសនីបានផ្អាកមិនអោយប្រជាពលរដ្ឋដែលមានបញ្ហាភ្លើងឡើងគីឡូទាំងនោះបង់សេវាប្រើប្រាស់ក្នុងខែមិនានោះទេ ចាំអោយអាជ្ញាធរអគ្គីសនីកម្ពុជាត្រួតពិនិត្យមើលសិន ។ ប្រភពព័ត៌មានបន្តទៀតថា៖ អាជ្ញាធរខេត្តបានជំរុញអោយមន្ទីររ៉ែថាមពលធ្វើលិខិតស្នើរ សុំអោយអាជ្ញាធរអគ្គីសនីកម្ពុជា ចុះមកស្រាវជ្រាវរកមូលហេតុអំពីការឡើងគីឡូភ្លើងនេះ។ តែក្រោយពីអាជ្ញាធរអគ្គីសនីមកត្រួតពិនិត្យ គឺបានធ្វើតែផ្ទះមួយចំនួន ប៉ុណ្ណោះដោយឆ្លើយថា កុងទ័រភ្លើងមិនមានបញ្ហាអ្វីទេ ព្រោះរដូវនេះជារដូវក្តៅបានជាឡើងខុសធម្មតា។តែប្រជាពលរដ្ឋមិនទទួលយកនោះទេ បើខុសហេតុអ្វីខុសតែក្នុងខែមិនានោះ ចុះខែមុនៗមិនលើសដូចខែមិនានេះ។
លោកស្រីខិត សុម៉ាលី តំណាងអោយប្រជាពលរដ្ឋ រស់នៅភូមិផ្សារព្រំ បានអោយដឹងថា៖ មូលហេតុដែលពួកគាត់បាន ប្តឹងតវ៉ាអំពីភ្លើងនេះ គឺដោយសារការប្រើប្រាស់ភ្លើងក្នុងខែមិនា វាឡើងគីឡូច្រើនពេក វាមិនតុល្យៈភាពដូចខែមុនៗនោះទេ ។ លោកស្រីបន្តថា៖ ជារៀងរាល់ខែគ្រួសារគាត់ប្រើអស់ថវិកាចំនួន ៤,១០០បាតតែប៉ុណ្ណោះ តែក្នុងខែមិនាឆ្នាំ២០១៥គឺកើនឡើងដល់៩,៥០០បាត។ ហើយគ្រួសារតូចជាងគេប្រើអស់២៣០បាត តែបានកើនឡើង៧៥០បាត និងមានប្រជាពលរដ្ឋជាច្រើនគ្រួសារទៀតបានកើនឡើងទ្វេគុណដល់ទៅជាង១០០%ឯណោះ។ លោកស្រីបន្ថែមថា៖ ក្នុងករណីនេះដែរតំណាងក្រុមហ៊ុនអគ្គីសនីបានអោយដឹងថា បើបងប្អូនប្រជាពលរដ្ឋមិនបានបង់សេវាភ្លើងជូនទេនោះរយៈពេល៥ថ្ងៃទៀតនឹងបិទភ្លើងមិនអោយប្រើប្រាស់ទៀតទេ។ ដូច្នេះក្នុងនាមប្រជាពលរដ្ឋទាំងអស់សូមសំណូមពរដល់អាជ្ញាធរខេត្តជួយដោះស្រាយអោយពួកគាត់បានសមស្របផង គឺទី១ អោយពួកគាត់បង់សេវ៉ាក្នុងខែមិនាដូចខែមុនៗ ទី២សុំអោយបុគ្គលឹកក្រុមហ៊ុនធ្វើការបូកសរុបកុងទ័រភ្លើងអោយបានច្បាស់លាស់ ទី៣ សូមកុំអោយក្រុមហ៊ុនអគ្គីសនីឯកជនបិទភ្លើង ។ បើអាជ្ញាធរខេត្តមិនទទួលយកសំណូមពរទាំង៣ចំណុចនោះទេ ពួកគាត់នឹងធ្វើសំណើរសុំដល់ការិយាល័យតំណាងរាស្ត្រជួយដោះស្រាយថែមទៀត។
អ្នកយកព័ត៌មានកម្ពុជាថ្មីប្រចាំខេត្តប៉ៃលិន មិនអាចសុំការបញ្ជាក់ពីតំណាងក្រុមហ៊ុនអគ្គីសនីឯកជនភូមិផ្សារព្រំ បានទេ ដោយទូរស័ព្ទមិនចូល ។
ពាក់ព័ន្ធបញ្ហានេះដែរលោក ធូ ភា អភិបាលរងខេត្តប៉ៃលិនបានបញ្ជាក់តាមទូរស័ព្ទដល់អ្នកសាព័ត៌មានកាលពីរសៀលថ្ងៃទី៧ ខែឧសភា នេះថា៖ កន្លងមកអាជ្ញាធរខេត្តប៉ៃលិនបានដោះស្រាយជូនពួកគាត់ជា៣តំណាក់កាល រវាងក្រុមហ៊ុនអគ្គីសនី និងប្រជាពលរដ្ឋ ហើយប្រជាពលរដ្ឋ៣៥គ្រួសារទទួលស្គាលចំនួនតែប្រជាពលរដ្ឋចំនួន៤៧គ្រួសារមិនទទួលស្គាល់នោះទេ ដោយពួកគាត់ចោទប្រកាន់ថាការត្រួតពិនិត្យនេះ គឺមានការអាថ៌កំបាំងក្នុងនោះបានអោយពួកគាត់មានការកើតទុកមិនសុខចិត្តប្តឹងតវ៉ាបន្តទៀតដូច្នោះ ។ លោកមានប្រសាសន៏បន្តទៀតថា៖ អាជ្ញាធរខេត្តពុំមានវិធានការដោះស្រាយ ឲ្យពួកគាត់បន្តទៀតទេ តែនិងជួយសម្របសម្រួលបន្ថែមទៀត ។
សូមបញ្ជាក់ថា៖ករណីខាងលើនេះ ត្រូវបានប្រជាពលរដ្ឋចោទសួរថា តើអាជ្ញាធរខេត្តប៉ៃលិន ទុកឲ្យប្រជាពលរដ្ឋដែលខ្លួនគ្រប់គ្រង រស់ក្រោមការជិៈជាន់របស់ឈ្មួញរកស៊ីឯកជនមួយនេះ ឫក៏មានការឃុបឃិតគ្នា ដើម្បីបំផ្លាញសន្លឹងឆ្នោតរបស់គណបក្សប្រជាជនកម្ពុជា ដោយពួកគាត់សុទ្ធតែជាសមាជិកគណបក្សប្រជាជនកម្ពុជានោះ ៕
