ឧត្តរមានជ័យ៖ បន្ទាប់ឧបទ្ទវ ហេតុគ្រោះធម្មជាតិខ្យល់កន្ត្រាក់ បានបំផ្លាញលំនៅដ្ឋានប្រជាពលរដ្ឋអស់ចំនួន ៣៧ខ្នង និងសាលារៀនធ្វើអំពីឈើរបស់សហគមន៍ នៅចំណុចអូរចាប់ត្រី ភូមិត្រពាំងធំ ឃុំលំទង ស្រុកអន្លង់វែង ខេត្តឧត្តរមានជ័យ ឯកឧត្តម ស ថាវី ជាអភិបាលខេត្ត
បានដឹកនាំក្រុមការងារថ្នាក់ខេត្ត និងកងកម្លាំងប្រដាប់អាវុធទាំង ៣ប្រភេទ ចុះជួយរុះរើផ្ទះរបស់ប្រជាពលរដ្ឋ និងជួយសាងសង់ផ្ទះជូនពួកគាត់ ដែលរងគ្រោះដោយខ្យល់កន្ត្រាក់កាលពីល្ងាចថ្ងៃទី៧ ខែឧសភា ឆ្នាំ២០១៥ ម្សិលមិញ ហើយបានបណ្តាលឱ្យមនុស្សស្លាប់ម្នាក់ និងរងរបួសចំនួន ២នាក់។
ក្រុមការងារថ្នាក់ខេត្ត និងកម្លាំងអន្តរាគមន៍ ដែលមកពីអង្គភាពកងពលតូចថ្មើរជើងលេខ៤១ ចំនួន ១០០នាក់ កងរាជអាវុធហត្ថចំនួន ៣៣នាក់ ប៉ូលីសស្រុកចំនួន ១៥នាក់ បានចុះសួរសុខទុក្ខដល់ប្រជាពលរដ្ឋ ចំនួន ៣៧គ្រួសារ និងជួយធ្វើជូនដល់ពួកគាត់នៅថ្ងៃនេះ ជាលទ្ធិផលរួមរាល់ផ្ទះចំនួន ១ខ្នង ៤មx៥ម ចំណែកផ្ទះរបស់ប្រជាពលរងគ្រោះឯទៀត កងកម្លាំងអាវុធហត្ថ យោធា និងប៉ូលីស កំពុងតែបន្តជួយសាងសង់ជូនប្រជាពលរដ្ឋជាបណ្តើរៗ ហើយផ្ទះប្រជាពលរដ្ឋដែលពុំទាន់បានធ្វើផ្ទះ ក្រុមការងារបានរៀបចំរកកន្លែងសុវត្ថិភាពឱ្យពួកគាត់ស្នាក់នៅជាបណ្តោះអាសន្នសិន៕
