ឧត្តរមានជ័យ៖ អំណោយសំភារៈគ្រឿងឧបភោគបរិភោគ និងថវិកាមួយចំនួន ជាអំណោយរបស់ឯកឧត្តម គន់ គីម ប្រធានក្រុមការងារថ្នាក់ជាតិគណៈបក្សប្រជាជនកម្ពុជា ចុះជួយខេត្តឧត្តរមានជ័យ បាននាំយកទៅចែកជូនគ្រួសារសពជនរងគ្រោះ ដោយសារខ្យល់កន្ត្រាក់គួចរលំ
ផ្ទះសង្កត់ និងជនរងគ្រោះ ២នាក់ទៀតកំពុងសំរាកព្យាបាលនៅមន្ទីរពេទ្យ។
ការនាំអំណោយយកទៅចែកជូនដល់គ្រួសាររងគ្រោះដោយសារខ្យល់កន្ត្រាក់ របស់ឯកឧត្តម គន់ គីម តាមរយៈឯកឧត្តម នាង ឃីម មេបញ្ជារការ កងពលតូចថ្មើរជើងលេខ៤១ រួមនឹងនាយទាហានរង ពលទាហាន នៅក្នុងអង្គភាពទាំងអស់ បាននាំយកទៅប្រគល់ជូនផ្ទាល់ដៃគ្រួសារជនរងគ្រោះ នៅព្រឹកថ្ងៃទី៨ ខែឧសភា ឆ្នាំ២០១៥នេះ ដែលគ្រួសារសព ឈ្មោះ មាស ឌឿន ភេទប្រុស ៦២ឆ្នាំ រស់នៅភូមិត្រពាំងធំ ឃុំលំទង ស្រុកអន្លង់វែង ខេត្តឧត្តរមានជ័យ ដែលត្រូវខ្យល់កន្ត្រាក់គួចផ្ទះរលំសង្កត់ កាលល្ងាចថ្ងៃទី៧ ខែឧសភា ឆ្នាំ២០១៥ ម្សិលមិញ ហើយក៏បណ្តាលឱ្យស្ត្រីមានផ្ទៃពោះម្នាក់បានរងរបួស ដោយសារ ខ្យល់គួចផ្ទះរលំ និងប៉ើងឈើបោកត្រូវជើង និងកុមារម្នាក់បានរងរបួសធ្ងន់ ហើយជនរងគ្រោះកំពុងសំរាក់ព្យាបាលនៅមន្ទីរពេទ្យបង្អែកស្រុកអន្លង់វែង។
ក្នុងគ្រោះមហន្តរាយខ្យល់កន្ត្រាក់ម្សិលមិញ ឯកឧត្តម នាង ឃីម ក៏បានបញ្ជូនកម្លាំងអន្តរាគមន៍ ប្រមាណជាង១០០នាក់ ដើម្បីចុះជួយសាងសង់ផ្ទះជូនប្រជាពលរដ្ឋដែលរងគ្រោះ ហើយក្រុមការងារនាយទាហាន ពលទាហាន ក៏បានពាំនាំការផ្តាំផ្ញើរសាកសួរសុខទុក្ខ ពីសំណាក់ឯកឧត្តម គន់ គីមក្នុងនាមជាក្រុមការងារថ្នាក់ជាតិចុះជួយ ខេត្តឧត្តរមានជ័យ ហើយទោះបីជាអំណោយទាំងនេះ មិនបានដោះទុក្ខលំបាកជូនប្រជាពលរដ្ឋបានយូរក្តី តែវាបានសម្រួលដល់ការលំបាករបស់បងប្អូនប្រជាពលរដ្ឋបានមួយរយៈផងដែរ។
អំណោយដែលនាំយកទៅចែកជូនដល់គ្រួសារសព ដែលរងគ្រោះដោយសារខ្យល់រលំផ្ទះសង្កត់ស្លាប់ឈ្មោះ មាស ឌឿន នូវថវិកា ៥សែនរៀល អង្ករ ២បេ និងមី ២កេះ ចំណែកជនរងគ្រោះរបួស ២នាក់ទៀត ថវិកា ១០ម៉ឺនរៀល និងគ្រឿងឧបភោគបរិភោគមួយចំនួនទៀត៕
