កំពង់ធំៈ ប្រជាពលរដ្ឋជាច្រើនបានសម្តែងការក្តៅក្រហាយ ចំពោះការរំលោភយកដីចំណីផ្លូវ ជាតិលេខ៦២ យកធ្វើជាកម្មសិទ្ធ និងការចាក់លុបប្រព័ន្ឋលូទឹក នៅតាមបណ្តោយផ្លូវជាតិ បង្ករឲ្យប្រជាពលរដ្ឋជាច្រើនគ្រួសារ មានការព្រួយបារម្ភណ៍ និងការស្ទះចរាចរណ៍ទឹក ដោយសារតែរដូវវស្សាបានចូលមកដល់ ត្រូវបានឈ្មួញដឹកដីមកចាក់លុបលូ។
តាមការឲ្យដឹងពីអ្នកម៉ៅការចាក់ដី បានឲ្យដឹងថា ម្ចាស់ដីឈ្មោះលោក ចាន់ សារី រស់នៅភូមិ ថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ ការចាក់ដីនេះ លោកពុំមានដឹងថា លោក ចាន់ សារី បានសុំច្បាប់ហើយឬនៅនោះទេ លោកគ្រាន់តែទទួលចាក់ដីតាមបណ្តោយផ្លូវជាតិ ប្រមាណជាង១០០ម៉ែត្រនេះ ចំណែកប្រព័ន្ឋលូបង្ហូរទឹកតាមបណ្តោយផ្លូវនឹងត្រូវលុបទាំងអស់ នៅចំនុចផ្លូវចូលប្រាសាទសំបូរព្រៃគុម្ព ។
ពាក់ព័ន្ឋទៅនឹងការរំលោភយកដីចំណីផ្លូវ និងចាក់ដីលុបប្រព័ន្ឋលូរំដោះទឹក ដែលនៅអមសងខាងថ្នល់ជាតិនេះ លោក ចាន់ សារី ដែលជាម្ចាស់ដីបានឲ្យដឹងថា លោកបានបញ្ជាឲ្យគ្រឿងចក្រលុបប្រព័ន្ឋលូមែន និងចាក់ដីតាមមាត់ផ្លូវជាតិ ដើម្បីពង្រៀបដីឲ្យជួយឲ្យគេធ្វើកន្លែងជួសជុល និងប៉ះកង់ឡាន ហើយលោកក៏ពុំមានសុំច្បាប់អ្វីនោះទេ ដោយសារតែ លោកពុំបានដឹងពីច្បាប់ទំលាប់ លោកនឹងធ្វើការណែនាំរបស់សត្ថកិច្ចជំនាញនៃមន្ទីរសាធារណៈការនិងដឹកជញ្ជូន ។
លោក ជូ កុឡា ប្រធានមន្ទីរសាធារណៈការនិងដឹកជញ្ជូន បានឲ្យមន្ត្រីចុះមកពិនិត្យសកម្មភាពផ្ទាល់ហើយបាន ផ្អាកដំណើរការចាក់ដីលុបចំណីផ្លូវ ហើយណែនាំឲ្យ កាយដាក់លូទឹកដែលមាន មុខមួយម៉ែត្រ និងណែនាំឲ្យទៅសុំច្បាប់ អនុញ្ញាតិត្រឹមត្រូវ ដោយសារតែការចាក់ដីនេះ វាបានប៉ះពាល់ដីចំណីផ្លូវ និងប៉ះពាល់ដល់ការស់នៅរបស់ប្រជាពលរដ្ឋ ដែលបង្ករឡើងដោយសារតែ ការចាក់ដីលុបប្រព័ន្ឋរំដោះទឹក។
ដោយ ប៊ុន រដ្ឋា
