កំពង់ធំៈ ព្រៃឡង់ជិតក្លាយទៅជាឈ្មោះនៃប្រវត្តិសាស្ត្រ និងរលាយនៃពេលដ៏ឆាប់ខាងមុខនេះ ដោយសារតែក្នុងមួយថ្ងៃៗ គេសង្កេតឃើញមានការកាប់ឆ្ការ ដុតបំផ្លាញទាំងព្រៃឈើ ចាប់ពីតូចរហូតដល់ធំ ដើម្បីរំលោភយកដីធ្វើជាកម្មសិទ្ធ ចំណែកអ្នកអាឈើក៏ធ្វើសកម្មភាព កក្រើកពេញព្រៃ សមត្ថកិច្ចមេព្រៃនៃសង្កាត់រដ្ឋបាលព្រៃឈើសណ្តាន់ ពុំមានភាពទទួលខុសត្រូវលើតួនាទី ។
តាមប្រភពពត៌មានពីប្រជាពលរដ្ឋ បានឲ្យដឹងថា អ្នកកាប់ឆ្កាព្រៃយកដីធ្វើជា់សកម្មសិទ្ធ និងអ្នកអាឈើ ធ្វើសកម្មភាពពេញព្រៃនេះ គឺមួយចំនួនធំ និងស្ទើរតែទាំងអស់ គឺជារបស់សមត្ថកិច្ច ក្នុងនោះមាន ប៉ូលិស និងប៉េអ៊ឹម និងមន្ត្រីរាជការ ក្នុងស្រុកសណ្តាន់ រីឯប្រជាពលរដ្ឋស្ទើរតែពុំមាន ដោយសារតែប្រជាពលរដ្ឋ អាឈើបន្តិចបន្តួច ត្រូវបានគេគំរាមចាប់ ដាក់គុកដាក់ច្រវ៉ាក់ ក្នុងនោះត្រូវបានគេទំលាយ ឲ្យដឹងថា លោក សុខថន ជាមន្ត្រីប៉ូលិស នៃទី
បញ្ជាការកងរាជអាវុធហត្ថ ស្រុកសណ្តាន់ បានធ្វើសកម្មភាពជួលមនុស្ស៦ នាក់ឲ្យអាឈើឲ្យខ្លួន និងឲ្យប្រពន្ឋចុងឈ្មោះ ស្រីខួច ជាអ្នកមើលការខុសត្រូវ អាឈើនុច អូឆ្នូរ រូចដឹកមកដាក់នៅផ្ទះរបស់ស្រីខួច នៅស្រុកចាស់ ឃុំ សុខចិត្ត ស្រុកសណ្តាន់ រួចដឹកតាមកាឡេថងបន្តទៅលក់ ក្នុងនោះត្រូវបានគេរិះគន់ថា លោក ថន ជាមន្ត្រីកងរាជអាវុធហត្ថផង ជាឈ្មួញឈើផង ដោយបានចាប់អ្នកអាឈើផង និងជាអ្នកអាឈើខ្លួនឯងផង អ្នកណាមិនបងលុយឲ្យនិងត្រូវចាប់តែម្តង ។
ពាក់ព័ន្ឋទៅនឹងបញ្ហានេះ លោក ថន ដែលត្រូវបានប្រជាពលរដ្ឋឆ្លើយដាក់ថា ដៃម្ខាងចាប់ ដៃម្ខាងប្រព្រឹត្តបទល្មើសព្រៃ ឈើដោយខ្លួនឯង លោក បានព្យាយាមលាក់បាំងនូវកំហុសឆ្គងរបស់ខ្លួនឯង ហើយបានបំភ្លឺតាមទូរស័ព្ទថាលោកអត់ បានរកស៊ីពាក់ព័ន្ឋនោះទេ ខណៈពេលដែលមហាជនឆ្លើយដាក់ទាំងអស់ ។ ចំណែកលោក វង្ស មេបញ្ជាការកងរាជអាវុអហត្ថស្រុកសណ្តាន់ បានឲ្យដឹងតាមទូរស័ព្ទថា លោក អគុណណាស់ចំពោះការផ្តល់ពត៌មាន នូវទង្វើមន្ត្រីរបស់លោក លោកបានបន្តថា ទើបតែទទួលបទបញ្ជាព្រឹកមិញ ពីអភិបាលស្រុក ឲ្យកម្លាំងដែលប្រចាំការជាមួយមេព្រៃ ឲ្យចូលបន្ទាយវិញទាំងអស់ និងឈប់ឲ្យប្រចាំការជាមួយសមត្ថកិច្ចជំនាញ ។
ចំណែកឯកព្រៃឡង់ ដែលមានការកាប់ឆ្ការរុករាន្ទ យកដីដោយមានការកាប់បំផ្លាញនោះ គឺសុទ្ធតែជាដីរបស់លោកនេះ លោកនោះ គ្មានដីប្រជាពលរដ្ឋនោះទេ បច្ចុប្បន្នព្រៃឡង់បានក្លាយទៅជា ព្រៃចំការ ព្រៃស្វាយចន្ទី ព្រៃដំឡូងមី និងកំពុងតែបាត់បង់យ៉ាងធ្ងន់ធ្ងរ ដោយមើលពីផ្លូវទៅប្រមាណ៥០ម៉ែត្រ សុទ្ធតែវាលចំការ រីឯព្រៃគឺមានតែតាមដងផ្លូវ មហាជនបានសំណូមពរឲ្យ រាជរដ្ឋបាភិបាល មេត្តាចុះពិនិត្យស្ថានភាពព្រៃឡង់ពិតប្រាកដផង ដោយសារតែការអសមត្ថភាពរបស់លោក នាយសង្កាត់រដ្ឋបាលព្រៃឈើសណ្តាន់ បានធ្វើឲ្យព្រៃឡង់បាត់ពីផែនទី នៅសល់តែឈ្មោះ និងចំការអ្នកស្រុក ។
ដោយ ប៊ុន រដ្ឋា
