សៀមរាប ,នៅចុងសប្តាហ៍ថ្ងៃទី០៩ខែឧសភាឆ្នាំ២០១៥នេះលោកឃឹម ប៊ុនសុង អភិបាលនៃគណៈអភិបាលខេត្តសៀមរាប បានជួបពិភាក្សាការងារមួយចំនួនជាមួយប្រតិភូថៃ ដឹកនាំដោយឯ.ឧ វិឈិត យ៉ាជិប សមាជិកសភា កំណែទម្រង់ជាតិថៃនិងជាប្រធានសមាគមមិត្តភាពថៃ.កម្ពុជា ស្តីពីការមកធ្វើវិនិយោគនៅកម្ពុជា សំខាន់នៅខេត្តសៀមរាប ។
តាមការបញ្ជាក់របស់លោក វិឈិត យ៉ាជិបក៏បានឲ្យដឹងពីគោលបំណងរបស់ប្រតិភូ ព្រមទាំងលើកឡើងពីការ ទំនាក់ទំនងរវាងប្រទេសទាំងពីរ នូវផ្នែកវប្បធម៌ និង ពាណិជ្ជកម្ម ។ ឯកឧត្តមបានបន្តទៀតថា ប្រទេសយើងទាំងពីរ ជា ប្រទេសភូមិនឹងគ្នា ព្រមទាំងបានរឹតចំណងមិត្តភាពនឹង សំខាន់លើវិស័យកងទ័ព និង រដ្ឋបាល នៅតាមបណ្តោយខ្សែ បន្ទាត់ព្រំដែន ក្នុងកិច្ចសហប្រតិបត្តិការនឹងគ្នាកាន់តែមានភាពល្អប្រសើរឡើង ។ លោក វិឈិត យ៉ាជិត មានប្រសាសន៍បន្តទៀតថាការចូលជួបពិភាក្សាជាមួយគណៈអភិបាលខេត្តសៀមរាបនាពេលនេះ ក៏ជាការចូលរួមចំណែកមួយក្នុងការអភិវឌ្ឍន៍លើវិស័យសេដ្ឋកិច្ចនៅកម្ពុជាពិសេសនៅខេត្តសៀមរាប ដោយបាននាំនូវអ្នកវិនិយោគក្រុមហ៊ុនចិន ហុងកុង ចូលជួបធ្វើការពិភាក្សា ដើម្បីធ្វើការសិក្សាស្វែងយល់អំពីស្ថានភាព ក្នុងការដាក់វិនិយោគនៅខេត្តសៀមរាបហើយក៏ជាការផ្តល់ដំណឹងដល់បងប្អូនប្រជាជនកម្ពុជាផងដែរ ។ ឯកឧត្តមបានបន្តទៀតថា ក្នុងនាមប្រធានសមាគមន៍មិត្តភាព ថៃ កម្ពុជា នៅពេលខាងមុខនេះ សមាគមន៍វិនិយោគ និង ទេសចរណ៍នៃព្រះរាជាណាចក្រថៃនិងចូលជួមពិភាក្សាជាមួយគណៈអភិបាលខេត្ត ព្រមទាំងបានធ្វើការអញ្ជើញគណៈប្រតិភូខេត្តសៀមរាបទៅទស្សនកិច្ចនៅក្រុងបាងកកនិងទីក្រុង ហុងកុង ដើម្បីទទួលបាននូវបទពិសោធន៍ល្អៗ យកមកធ្វើការអភិវឌ្ឍន៍នៅក្រុងសៀមរាបផងដែរ ។ក្នុងនោះដែរតំណាងក្រុមហ៊ុនចិន ក៏បានបញ្ជាក់ថា ក្រុមហ៊ុនមានបំណងមកធ្វើវិនិយោគនៅស្រុកខ្មែរតាំងពីឆ្នាំ ២០១៤ ហើយគោលដៅរបស់ក្រុមហ៊ុន មិនផ្តោតសំខាន់ទៅលើរោងចក្រនោះទេ គឺទាក់ទងទៅនឹងវិស័យទេសចរណ៍ ផងដែរ ។ លោកបានបន្តទៀតថា គោលដៅដំបូងក្រុមហ៊ុននឹងនាំយកនូវរោងចក្រផលិតកញ្ចក់វ៉ាន់តា នៅកម្ពុជា ដោយ ប្រទេសកម្ពុជាមានទីតាំងល្អ ស្ថិតក្នុងតំបន់អាស៊ាន ដែលមានវិស័យកាត់ដេរបានកំពុងប្រណាំងប្រជែងគ្នាផងដែរ ។ ក្នុង នោះក្រុមហ៊ុនក៏បានគូសបញ្ជាក់ថា ក្រៅពីការរោងចក្រ ក៏មានបច្ចេកទេសថ្មីៗមកកម្ពុជា នៅពេលក្រុមហ៊ុនរបស់លោក មានភាពជោគជ័យហើយនោះ នឹងមានបណ្តាក្រុមហ៊ុននៅប្រទេសចិន នឹងចូលមកជាបន្តបន្ទាប់ផងដែរ ។
មានប្រសាសន៍នោះដែរលោក ឃឹម ប៊ុនសុង ក៏បានថ្លែងអំណរគុណផងដែរ ពីគោលបំណងរបស់ប្រតិភូ ដែល បានដឹកនាំអ្នកវិនិយោគក្រុមហ៊ុនចិន មកកាន់ខេត្តសៀមរាប ដែលជាតម្រូវការចាំបាច់របស់ខេត្តចំពោះមុខ ក្នុងវិស័យ ទេសចរណ៍ ។ ឯកឧត្តមបានគូសបញ្ជាក់ជូនដល់ប្រតិភូឲ្យបានដឹងថា ខេត្តសៀមរាបជាគោលដៅអភិវឌ្ឍន៍ថ្មី ដែលតំបន់មួយ ក្នុងការពង្រីកនូវសេវាកម្មទេសចរណ៍ ដោយបច្ចុប្បន្ននេះក្រោយពេលដែរភ្ញៀវទេសចរណ៍ បានទស្សនាកម្សាន្តនៅ តាមរមណីយដ្ឋានប្រវត្តិសាស្ត្រ យើងនូវខ្វះទីកន្លែងសម្រាប់ភ្ញៀវដើរកម្សាន្តសប្បាយនៅពេលរាត្រី សំខាន់ទីផ្សារទំនើប។ លោក ឃឹមប៊ុនសុងក៏បានលើកឡើងផងដែរពីហេដ្ឋារចនាសម្ព័ន្ធលើវិស័យទេសចរ ដែលជាតម្រូវការចាំបាច់របស់ខេត្ត ក្នុងការស្វែងរកអ្នកវិនិយោគមកចូលរួមអភិវឌ្ឍន៍នៅតាមតំបន់ថ្មីនៅជិតក្រុងបុរាណយើងនេះផងដែរ ។ តាមការព្យាករណ៍របស់ក្រសួងទេសចរណ៍នៅឆ្នាំ២០១៧.២០២០ភ្ញៀវទេសចរណ៍ដែលចូលមកកម្ពុជា នឹងមានកំណើតទៅ២០លាននាក់ដោយព្រះរាជាណាចក្រកម្ពុជាបានធ្វើការពង្រីកនូវតំបន់អេកូ ទេសចរណ៍ជាច្រើនបន្ថែមទៀត ។ ដូច្នេះខេត្តសៀមរាបគឺជាគោលដៅសំខាន់ សម្រាប់ភ្ញៀវទេសចរណ៍គ្រប់ជាតិសាសន៍ ចូលមកទស្សនាកម្សាន្តផងដែរ។
លោកក៏លើកឡើងថាដោយកត្តានេះហើយខេត្តសៀមរាប ត្រូវមានការទាមទារលើការបណ្តុះបណ្តាលនូវធនធានមនុស្សនិងពង្រីកនូវសេវាកម្មទេសចរណ៍ ដោយខេត្តមានតំបន់ទេស ចរណ៍វប្បធម៌ និង រមណីយដ្ឋានធម្មជាតិ ។ ក្នុងនោះលោក ឃឹម ប៊ុនសុង ក៏បានសុំឲ្យប្រតិភូ ជួយជម្រុញដល់អ្នកវិនិយោគទាំងនោះ មកធ្វើវិនិយោគលើវិស័យទេសចរ នៅលើខេត្តប្រវតិ្តសាស្ត្រ ដោយអាជ្ញាធរខេត្ត ធ្វើការគាំទ្រនូវរាល់គម្រោង និង គំនិតទាំងនេះ ដើម្បីចូលរួមក្នុងកិច្ចអភិវឌ្ឍលើវិស័យទេសចរណ៍ នៅកម្ពុជា ក៏ដូចជាការកង្កើនការងារជូនដល់ប្រជាជនកម្ពុជា សំខាន់ធ្វើឲ្យជីវភាពរបស់ប្រជាជនកាន់តែមានភាពប្រសើរ ឡើងទៀតផង ព្រមទាំងធ្វើឲ្យចំណងមិត្តភាពកម្ពុជា ថៃ មានភាពរឹងមាំទៅអនាគតផងដែរ ៕
