ខេត្ដសៀមរាប៖នៅរសៀលថ្ងៃទី១១ខែឧសភាឆ្នាំ២០១៥នេះកម្លាំងនគរបាលទេសចរនិងអាជ្ញាធរអប្សរាបាននាំខ្លួនជនបរទេសប្រុសស្រីចំនួន៣នាក់មកតុលាការដើម្បីសួរនាំក្នុងករណីពួកគេបាននាំគ្នាថតរូបអាសអាភាសនៅក្នុងប្រាសាទតាព្រហ្មនិងទីលានស្តេចគម្លង់កាលពីរសៀលថ្ងៃទី១០ខែឧសភាឆ្នាំ២០១៥កន្លងទៅនេះ។
លោក លឹម ស្រ៊ូ នាយករងការិយាល័យផ្សព្វផ្សាយនៃអាជ្ញាធរអប្សរាបានប្រាប់ឲ្យដឹងនៅរសៀលថ្ងៃទី១១ខែឧសភានេះថា ជនបរទេសប្រុសស្រីចំនួន៣នាក់នោះមានឈ្មោះ ទី១/ឈ្មោះ Munoz Luciano Gaston ភេទប្រុសអាយុ៣១ឆ្នាំ ជាជនជាតិអាហ្សង់ទីនទី២/ឈ្មោះ Magrini Bruno ភេទប្រុសអាយុ៣១ឆ្នាំជនជាតិអ៊ីតាលីនិងទី៣/ឈ្មោះ Stamou Kiki ភេទស្រីអាយុ២០ឆ្នាំជាជនជាតិហូឡង់។លោកបន្តថា អ្នកទាំងបីនាក់ត្រូវបានកម្លាំងនគរបាលទេសចរនាំខ្លួនមកកាន់តុលាការនៅរសៀលថ្ងៃទី១១ខែឧសភានេះ ក្នុងករណីពួកគេបានថតរូបអាសអាភាសមួយកំណាត់ខ្លួន(ចេញត្រឹមកំប៉េះគូថ)។
គួររំលឹកថា ករណីជនបរទេសដែលបានថតរូបអាសអាភាសនៅប្រាសាទបូរាណខ្មែរក្នុងខេត្តសៀមរាបនេះត្រូវបានគេសង្កេតថា ពួកគេធ្វើឡើងជាលើកទី៣ហើយនៅតំបន់ទេសចរនៃខេត្តសៀមរាប ហើយជនបរទេសមួយចំនួនត្រូវបានតុលាការកាត់ទោសដោយបង់ផាកពិន័យនិងបណ្តេញចេញពីប្រទេសកម្ពុជារយៈពេល៤ឆ្នាំ។ប៉ុន្តែករណីថ្មីៗនេះនៅមិនទាន់ដឹងពីចំណាត់ការរបស់តុលាការនៅឡើយទេ ដោយរង់ចាំតុលាការសម្រេចសិន៕
