ស្ទឹងត្រែង៖ ឃ្លាំងស្តុកឈើមួយកន្លែងនៅជាប់ព្រំប្រទល់ ខេត្តស្ទឹងត្រែង និងខេត្តរតនៈគីរី ត្រូវបានបញ្ជាពីរដ្ឋបាលព្រៃឈើថ្នាក់កណ្តាល អោយខណ្ឌរដ្ឋបាលព្រៃឈើខេត្ត សហការជាមួយប៉ុស្តិ៍នគរបាលតាឡាត ចុះឆែកឆេររកឃើញឈើ ប្រណីតនិងឈើលេខ១ លេ២ជាច្រើន
ម៉ែត្រគូប។ប្រតិបត្តិការនេះធ្វើឡើង កាលពីវេលាម៉ោង១៦និង៣០នាទីល្ងាច ថ្ងៃទី១១ខែឧសភាឆ្នាំ២០១៥ ត្រង់ចំនុចផ្លូវជាតិលេខ៧៨ចាស់ ស្ថិតក្នុងភូមិក្របីជ្រុំ ឃុំក្បាលរមាស ស្រុកសាសាន ខេត្តស្ទឹងត្រែង។ ប្រភពពីប្រជាពលរដ្ឋដែលនៅក្បែរទីតាំងស្តុកឈើបានអោយដឹងថា ឃ្លាំងឈើដ៏ធំនេះត្រូវបានគេស្គាល់ជារបស់ តា វែនតា ស្ថិតនៅចំណុចខាងលើ។ឈើទាំងនេះត្រូវបានគេប្រមូលទិញ ពីប្រជាពលរដ្ឋរស់នៅតបន់នោះ យកមកធ្វើសិប្បកម្មកែឆ្នៃផង និងលក់ទៅអោយឈ្មួញ ទៅកាន់ទីផ្សារ និងតាមតម្រូវការ តាមគេកុម្មង់។
ប្រភពបានបន្តអោយដឹងទៀតថាឈើដែលសមត្ថកិច្ចបង្ក្រាបនេះ ជាឈើប្រណីត ប្រភេទឈើធ្នង់ បេង និងឈើលេខមួយប្រភេទសុក្រំ ត្រសេក ផ្ចឹក ខ្វាវ គគី។ល។ឈើនេះត្រូវបានគេផែកំរាស់៥ហ៊ុនទៅមួយតឹក ដែលមានមុខកាត់ចាប់ពី២០សង់ទីម៉ែត្ររហូតដល់៧០សង់ទីម៉ែត្រ ប្រវែង២ទៅ៣ម៉ែត្រមួយចំនួនសំរាប់កែឆ្នៃ ធ្វើជាតុ ទូ ទ្វារ បង្អួច គ្រែ និងចំនួនទៀត សំរាប់ដាក់រថយន្តទៅកាន់ប្រទេសជិតខាង។
ប្រភពបន្តថាផ្លូវជាតិលេខ៧៨ចាស់គឺជាផ្លូវមួយអំណោយផលក្នុងការរកស៊ីបទល្មើ ជារាងរាល់ថ្ងៃគេសង្កេតឃើញ មានរថយន្តទំនើបៗជាច្រើនគ្រឿង បានចូលទៅធ្វើការដឹកជញ្ជូនចេញពី ភូមិស្រែគរ និងភូមិតាឡាត មួយចំនួនដឹកទៅកាន់ផ្លូវជាតិលេខ៧៨ថ្មីឆ្ពោះទៅកាន់ខេត្តត្បូងឃុំ និងខ្លះដឹកទៅខេត្តរតនៈគីរី ឆ្ពោះទៅកាន់ច្រកអន្តរជាតិអូយ៉ាដាវព្រំប្រទល់ប្រទេសវៀតណាម។
ដោយឡែកឈើដែលចាប់នេះត្រូវបានម្ចាស់អះអាងថា គេបានប្រមូលទិញអោយអ្នកមានអំណាចម្នាក់ អោយគាត់ប្រមូលទិញយកទៅធ្វើវត្ត។ក្រោយមកមិនឃើញគេមកយកក៏បានរក្សាទុកមកដល់ពេលនេះ ហើយឈើមួយចំនួនជាឈើចាស់ ដែលសល់មិនបានដឹក និងឈើមួយចំនួនទៀត ជាឈើថ្មីដែលទើបនិងកាប់យកមកកែឆ្នៃ។
ប្រជាពលរដ្ឋបានលើកឡើថាបច្ចុប្បន្នឈើប្រណីតដូចជា ឈើ ធ្នង់ បេង នានួន គ្រញូងស្ទើរតែដាច់ពូជហើយ សព្វថ្ងៃឈើលេខ១និងឈើលេខ២ឈ្មួញម្នាក់ឈ្មោះ ធាបាននិងកំពុងធ្វើការកាប់បំផ្លាញ ដឹកតាមរថយន្តយីឌុប ជ្រកក្រោមក្រុមហ៊ុនដីសមប្បទានសេដកិច្ចយកឈ្មោះរបស់ឧកញ៉ាម្នាក់ធ្វើជាឡេសតែតាមការពិតឈើនេះ បានកាប់ពីដីព្រៃរបស់រដ្ឋ ដឹកចេញពីផ្លូវជាតិលេខ៧៨ថ្មី ចាប់ព្រំប្រទល់មណ្ឌុលគីរីត្រង់ចំណុច ក្រុមហ៊ុនផេ ស៊ីហ្វេច(ឡូ៤) (ឡុ៣)(ឡូ២)(ឡូ១)រហូតមកដល់ចំណុចភូមិច្រប ឃុំក្បាលរមាស ស្រុកសេសានខេត្តស្ទឹងត្រែង
ដោយសារមានការបើកភ្លើងខៀវពីជំនាញ។ចំណែកឃ្លាំងដែលសមត្ថកិច្ចកំពុងបង្ក្រាបនេះ ក៏ធ្លាប់បានធ្វើការដឹកជញ្ជូនតាមរថយន្តយីឌុបជាញឹកញាប់ដែរ តែដោយសារមានការស្ទះមួយរយះ មិនបានដឹកចេញទើបឈើនេះត្រូវបានជំនាញធ្វើការបង្ក្រាបតែម្តង។ហើយឃ្លាំងឈើនេះ ដោយមានការបញ្ជាពីរដ្ឋបាលព្រៃឈើថ្នាក់កណ្តាល ទើបលោកឈាង តុលានាយខណ្ឌរដ្ឋបាលព្រៃឈើខេត្ត អោយសង្កាត់រដ្ឋបាលព្រៃឈើក្បាលរមាសស្រែគរ ចុះទៅទីតាំងកើតហេតុ សហការជាមួយមន្ត្រីប៉ុស្តិ៍នគរបាល ឃុំតាឡាតធ្វើការបង្ក្រាប។បច្ចុប្បន្នឃ្លាំងឈើដ៏ធំនេះ ជំនាញរដ្ឋបាលព្រៃឈើ កំពុងធ្វើការដឹកជញ្ជូនតាមរថយន្ត ទៅរក្សាទុកនៅបណ្តុះកូនឈើក្បាលរមាស រីឯចំនួនពិតប្រាកដគេមិនទាន់ដឹងថាមានចំនួនប៉ុន្មាននៅឡើយទេ បើតាមការប៉ាន់ស្មានអាចមានរហូត២០ទៅជាង៣០ម៉ែត្រគូប៕
