ភ្នំពេញ៖ ស្ត្រីម្នាក់ត្រូវបានក្រុមចោរប្លន់មួយក្រុម ជិះម៉ូតូពីរគ្រឿង មានគ្នាប្រមាណជា៤នាក់ធ្វើសកម្មភាពវាយប្លន់លើរូបខ្លួនយកកាបូបលុយ បានទៅដោយសុវត្ថភាពនៅចំណុចទល់មុខសាលាបឋមសិក្សាភូមិចំរើនផល ស្ថិតក្នុងសង្កាត់បឹងទំពុន ខណ្ឌមានជ័យ កាលពីវេលាម៉ោង ១និង៤០នាទីរំលងអាធ្រាត្រឈានចូលថ្ងៃទី ៩ មិនា ឆ្នាំ២០១៤។
ស្ត្រីរងគ្រោះខាងលើមានឈ្មោះ យ៉ូ ចាន់លក្ខណា ភេទស្រី អាយុ៣១ឆ្នាំ មានមុខរបរ ពេលថ្ងៃជាអ្នកអ៊ុតសក់ ចំណែកពេលយប់ជាអ្នកបម្រើការ ក្នុងភោជនីយ៍ដ្ឋានមួយកន្លែងដែលមានទីតាំងនៅម្តុំកោះពេជ្រ និងមានទៅលំនៅបច្ចុប្បន្នជិតកន្លែងកើតហេតុ។ យោងតាមសម្តីរបស់ស្ត្រីរងគ្រោះបានឲ្យដឹងថា ដំបូងឡើយរូបខ្លួនបានជិះម៉ូតូមួយគ្រឿងម៉ាកគុប ពណ៌ទឹកប៊ិច ពាក់ស្លាកលេខ ទ 3878 ភព១ ត្រឡប់មកពីធ្វើការវិញ
ដោយជិះធ្វើដំណើរតាំងពីកោះពេជ្ររហូតមកដល់ផ្សារសុវណ្ណា ក៏ស្រាប់តែមានជនសង្ស័យមិនស្គាល់អត្តសញ្ញាណមួយក្រុម មានគ្នា បួននាក់ជិះម៉ូតូពីរគ្រឿង មិនចាំម៉ាក បានជិះតាមពីក្រោយនារីរងគ្រោះតាំងពីចំណុចមុខផ្សារសុវណ្ណារហូតមកដល់ចំណុចកើតហេតុខាងលើស្រាប់ជន សង្ស័យពីរនាក់ ក្នុងចំណោមពួកគេទាំងបួននាក់នោះ បានធាក់ម៉ូតូស្ត្រីឈ្មោះ យ៉ូ ចាន់លក្ខណាឲ្យដួលហើយពីរនាក់ផ្សេងទៀតក៏ធ្វើសកម្មភាព វាយប្លន់យក កាបូបពីរស្ត្រីរងគ្រោះតែម្តង បន្ទាប់ពីវាយប្លន់រួចហើយជនសង្ស័យបានគំរាមស្ត្រីរងគ្រោះ ថាកុំឲ្យស្រែកបើស្រែខ្លួននិង
បាញ់ចោល ហើយជនសង្ស័យទាំង បួននាក់ក៏ជិះម៉ូតូចេញទៅបាត់ដោយសុវត្ថិភាព។ ប្រភពដដែលបន្តថា ចំពោះករណីប្លន់យកកាបូបនេះដែរស្ត្រីរងគ្រោះបានបញ្ជាក់ថា ក្នុងកាបូបរបស់ខ្លួន មានលុយចំនួន២ដុល្លារ ប៉ាស្ព័រ និង ទូរស័ព្ទដៃចំនួនពីរគ្រឿងផងដែរ ដែលក្រុមចោរប្លន់យកទៅ ហើយខ្លួនមិនអាចធ្វើអ្វីបាននោះទេ បានត្រឹមតែអង្គុយយំស្តាយរបស់របររបស់ខ្លួនដែលបាត់បង់ ទៅតែប៉ុណ្ណោះ។
បន្ទាប់ពីកើតហេតុភា្លមៗកងកម្លាំងសមត្ថកិច្ចដែលល្បាតក្នុងមូលដ្ឋានរបស់ខ្លួនបានចុះអន្តរាគមន៍ ដល់កន្លែងកើតហេតុ និងណែនាំឲ្យស្ត្រីរង គ្រោះទៅដាក់ពាក្យបណ្តឹងផងដែរ តែបុរសម្នាក់ដែលត្រូវជាសាច់ញាតិរបស់ស្ត្រីរងគ្រោះគិតថា យប់ជ្រៅទៅហើយខ្ជិលរំខានដល់សមត្ថកិច្ចទើបឲ្យស្ត្រី រងគ្រោះ ត្រឡប់ ទៅ ផ្ទះវិញហើយរងចាំព្រឹកស្អែកចាំមកធ្វើការដាក់ពាក្យបណ្តឹងក៏បានដែរ៕
