ភ្នំពេញ ៖ ជនជាប់ចោទ២នាក់ ម្នាក់ឈ្មោះ ឡុត សិរីបុត្រ ជាអតីតមន្ត្រីនគរបាល ខណ្ឌដូនពេញ និងម្នាក់ទៀតឈ្មោះ ថៃ សិទ្ឋ ហៅម៉ាប់ ដែលអះអាងជាអាណិកជនរស់នៅក្រៅ ប្រទេស ត្រូវបានសាលាឧទ្ឋរណ៍ កាលពីថ្ងៃទី០៨ មេសា បើកសវនាការកាត់ទោស ពីបទជួញដូរគ្រឿងញៀនប្រភេទមេតំហ្វេតាមីនទម្ងន់កន្លះគីឡូក្រាម បន្ទាប់ពីសំណុំរឿងនេះធ្លាប់ ចាត់របៀបម្តងរួចមកហើយ ។ ចំណែកម្នាក់ទៀតឈ្មោះ សឹម ប៊ុនសាន្ត ត្រូវបានដោះលែងហើយ ព្រោះបានអនុវត្តទោសចប់ ។
ប៉ុន្តែអ្វីជាការកត់សម្គាល់នោះ គឺ នៅពេលជនជាប់ចោទបម្រុងដើរចេញពីបន្ទប់សវនាការ មានមនុស្សមួយក្រុមដែលអាចសន្មត់បានថា ជាសាច់ញាតិរបស់ជនជាប់ចោទទាំង២នាក់ បានរារាំងនិងព្រមានអ្នកកាសែតមិនឲ្យថតរូប ប្រសិនបើនៅតែថតទៀត ពួកគេនឹងដកហូតកាមេរ៉ា ទុកជាមិនខាន ។ ក្នុងនោះក៏មានស្ត្រីវ័យកណ្តាលម្នាក់ ទំនងជាអ្នកមានអំណាច ដោយសង្កេត ទៅលើការមានអង្គរក្សជុំជិតនិងជិះសុទ្ឋតែរថយន្តទំនើប បានពោលពាក្យយ៉ាងថ្លោះ ថា “ ស្គាល់ខ្ញុំជា អ្នកណាទេ បើសិនជាហ៊ានថតរូបដោយខ្ញុំ អ្នកឯងពិតជាមានបញ្ហាមិនខាន ” ។
ក្រុមអ្នកកាសែត ដែលត្រូវរងការគំរាមគំហែងនេះ រួមមាន អ្នកយកព័ត៌មានកាសែតរស្មីកម្ពុជា កាសែតភ្នំពេញប៉ុស្តិ៍ និង ខាងទូរទស្សន៍បាយ័ន ។ ទោះបីយ៉ាងណាក្រុមអ្នកកាសែត បានព្យាយាមផ្តិតយករូបភាពទាំងនេះ និង បាននិយាយតប វិញ ថា “ អ្នកទាំងអស់គ្នាគ្មានសិទ្ឋិហាមឃាត់មិនឲ្យខ្ញុំថតរូបនោះទេ ព្រោះនេះជាវិជ្ជាជីវៈសារព័ត៌មាន គឺមានតែតុលាការប៉ុណ្ណោះមានសិទ្ឋិហាមខ្ញុំ ” ។
ជនជាប់ចោទទាំង៣នាក់ ត្រូវបានសមត្ថកិច្ចមន្ទីរប្រឆាំងគ្រឿងញៀនក្រសួងមហាផ្ទៃ ឃាត់ខ្លួន ជាក់ស្តែង កាលពីថ្ងៃទី១៧ ខែមករា ឆ្នាំ២០១០ ដោយដកហូតបានគ្រឿងញៀនប្រភេទ មេតំហ្វេតាមីនទម្ងន់កន្លះគីឡូក្រាម និង រថយន្ត២គ្រឿង ។ អង្គហេតុនេះ សាលាដំបូងរាជធានីភ្នំពេញ បានផ្តន្ទាទោសឈ្មោះ សឹម ប៊ុនសាន្ត ដាក់ពន្ឋនាគារ៣ឆ្នាំ ពីបទទទួលកម្រៃជើងសារ ផ្តន្ទាទោឈ្មោះ ឡុត សិរីបុត្រ និង ឈ្មោះ ថៃ សិទ្ឋ ដាក់ពន្ឋនាគារ ក្នុងម្នាក់ៗជាង១០ឆ្នាំ ។ ប៉ុន្តែការសម្រេចនេះ ត្រូវ ឡុត សិរីបុត្រ និង ថៃ សិទ្ឋ ប្តឹងឧទ្ឋរណ៍ ។
ក្នុងសវនាការសាលាឧទ្ឋរណ៍ ជនជាប់ចោទទាំង៣នាក់ បដិសេធថា ពុំបានប្រព្រឹត្តដូចការចោទ ប្រកាន់នោះទេ ។ ចំណែកលោក ង៉ែត សារ៉ាត តំណាងមហាអយ្យការ បានសន្និដ្ឋាន ថា មានភស្តុតាងដាក់បន្ទុកគ្រប់គ្រាន់លើជនជាប់ចោទទាំង៣នាក់ ដូច្នេះសំណូមពរ ឲ្យតុលាការតម្កល់ សាលក្រមតុលាការថ្នាក់ក្រោមទុកជាបានការដដែល ។ ក្រោយការសួរដេញដោល លោកចៅក្រម ឃុន លាងម៉េង បានលើកពេលប្រកាសសាលដីកា ទៅថ្ងៃទី២៣ ខែមេសា ឆ្នាំ២០១៤ ខាងមុខនេះវិញ ៕
