ខេត្តប៉ៃលិន៖ មានការភា្ញក់ផ្អើលមួយបានកើតឡើង ខណៈពេលឃើញបុរសម្នាក់លង់ទឹកស្ទឹងស្លាប់ ត្រួវបានប្រជាពលរដ្ឋប្រទះឃើញ ហើយរាយការណ៏ប្រាប់សមត្ថកិច្ចឲ្យដឹង ។ ហេតុការណ៏បុរសលង់ទឹកស្ទឹងស្លាប់នេះ បានកើតឡើងកាលពីវេលាម៉ោង០៩ និង៤០នាទីព្រឹក ថ្ងៃទី
១៤ ខែឧសភា ឆ្នាំ២០១៥ នៅចំណុចក្នុងស្ទឹងវត្តចាស់ ស្ថិតក្នុង ភូមិទួលខ្ពស់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន។បុរសរងគ្រោះដែលលង់ទឹកស្ទឹងស្លាប់ មានឈ្មោះ ជួប សំ ភេទប្រុស អាយុ២៦ឆ្នាំ ជាមនុស្សវិកលចរិក មានទីលំនៅភូមិវាល ឃុំសាលាក្រៅ ស្រុកសាលាក្រៅ ខេត្តប៉ៃលិន បានស្លាប់ដោយសារលង់ទឹកស្ទឹង នៅចំណុចកើតហេតុខាងលើ ។
ប្រភពព័ត៌មានពីកន្លែងកើតហេតុ បានឲ្យដឹងថា៖ មុនពេលកើតហេតុគេឃើញបុរសរងគ្រោះ ដើរចូលវត្តសាលាក្រៅចាស់ មើលដូចជាមនុស្សបែកថ្នាំញៀន ដូចមនុស្សវិកលចរិក ហើយស្រវឹងស្រាដោយដើរមិនត្រង់ផ្លូវ បន្ទាប់មកក៏ដើរចុះទៅស្ទឹង ក៏បាត់មិនឃើញឡើងមកវិញ ។ 
ប្រភពព័ត៌មានបន្តថា៖ នៅវេលាកើតហេតុខាងលើ មានប្រជាពលរដ្ឋ បានដើរឆ្លងស្ទឹងនោះ ក៏ប្រទះឃើញបុរសរងគ្រោះដេកស្លាបបាត់ទៅហើយ ,នេះប្រហែលជាស្រវឹងស្រា រួចដើរដួលក្នុងទឹកងើបមិនរួច បានជាស្លាបដូច្នេះ ។ ប្រភពព័ត៌មានដែលស្កាល់បុរសរងគ្រោះ បានឲ្យដឹងថា៖ កន្លងមកបុរសរងគ្រោះ ជាមនុស្សធម្មតា ចេះដឹងខុសត្រួវ តែមួយរយៈក្រោយមកស្រាប់តែ មិនដឹងថាម៉េច ក៏ក្លាយជាមនុស្សវិកលចរិក ដូចជាអ្នកបែកថ្នាំញៀន ដើរផឹកស្រា មានពេលខ្លះចងប្រើអំពើហិង្សាក៏មាន ។
ប្រភពព័ត៌មានពីសមត្ថកិច្ចមូលដ្ឋាន បានឲ្យដឹងថា៖ ជនរងគ្រោះឈ្មោះ ជួប សំ ភេទប្រុស អាយុ ២៦ឆ្នាំ ជាមនុស្សវិកលចរិក មានទីលំនៅភូមិវាល ឃុំសាលាក្រៅ ស្រុកសាលាក្រៅ ហើយបានស្លាប់ដោយលង់ទឹកស្ទឹង នៅចំណុចវត្តចាស់ ក្នុងភូមិទូលខ្ពស់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន ។ បើតាមការស្រាវជ្រាវរបស់សមត្ថកិច្ចជំនាញបង្ហាញអោយឃើញថា ជនរងគ្រោះពិតជាបានលង់ទឹកស្លាប់ពិតប្រាកដមែន។ បច្ចុប្បន្នសពត្រូវបានប្រគល់ជូនបងប្អូនសាច់ញាតិ យកទៅធ្វើបុណ្យតាមប្រពៃណី ៕
