ក្រចេះ៖ ផ្សារស្រុកឆ្លូងជិតក្លាយជាចំណីភ្លើងដោយសារឆេះផ្ទះល្វែងលក់ឥវ៉ាន់ចាប់ ហួយមួយកន្លែងនៅក្នុងទីប្រជុំជនផ្សារស្រុកឆ្លូង ភូមិជ្រោយថ្មលើ ឃុំឆ្លូង ស្រុក ឆ្លូង នាវេលាម៉ោង ៨យប់ ថ្ងៃទី ១៧ ខែ ឧសភា ឆ្នាំ ២០១៥
សេចក្តីរាយការណ៍បានឲ្យដឹងថាផ្ទះថ្មមួយល្វែងលក់ទំនិញចាប់ហួយចំរុះត្រូវគេស្គាល់ឈ្មោះ ខៃ សៀ បានឆេះពីក្រោយផ្ទះរាល់ដាលដល់តូបលក់ឥវ៉ាន់ជាច្រើននៅក្បែនោះ និងរាល់ដាលឆាបឆេះដល់ផ្ទះល្វែងជាច្រើនផ្សេងទៀតដែលនៅជាប់ៗគ្នា បណ្តាលឲ្យសម្ភារៈគ្រឿងបរិក្ខា មុខទំនិញផ្សេងៗខូចខាតទាំងស្រុង។
ខណៈពេលនោះ ប្រជាពលរដ្ឋនៅស្រុកឆ្លូងបាននាំគ្នាជួយអន្តរាគមន៍ពន្លត់ តែមិនអាចគ្រប់គ្រងស្ថានការណ៍បានទើបមានកម្លាំងអន្តរាគមន៍សមត្ថកិច្ចចំរុះប្រមាណជាង១០០នាក់ដឹកនាំដោយលោក ស ចំរុង អភិបាលនិងជាប្រធានគណៈបញ្ជាការឯកភាពខេត្តក្រចេះ យកឡានទឹកជួយបាញ់ពន្លត់ទើបអាចទប់ស្កាត់មិនឲ្យរាល់ដាលឆេះដល់ផ្សារធំនៃស្រុកឆ្លូងទាំងមូល។
ទន្ទឹមជាមួយនឹងហេតុការណ៍ភ្លើងឆេះផ្ទះជិតរាល់ដាល់ឆេះដល់ផ្សារនោះផងដែរក្រុមអាជីវករផ្សារនិងអ្នកលក់ដូរក្បែៗនោះបាននាំគ្នាប្រវេប្រវ៉ាសារឥវ៉ាន់រៀងៗខ្លួនរត់ចេញ ប្រផាក់ប្រភីងព្រោះតែការភ័យខ្លាចព្រះអគ្គីលេបត្របាក់។ នៅក្នុងហេតុការណ៍ភ្លើងឆេះនាយប់នោះ
សមត្ថកិច្ចមិនបានបញ្ជាក់អំពីចំនួនតួលេខនៃការខូចខាតបាននៅឡើយទេ ដោយគ្រាន់តែដឹងថាផ្ទះនិងតូបជាច្រើននៅក្បែនោះបានទទួលរងការឆេះខ្ទិចសល់តែផេះ តែមិនបានបង្ករឲ្យនណាម្នាក់រងគ្រោះថ្នាក់ឡើយ។ដោយឡែកចំពោះមូលហេតុនៃការឆេះសមត្ថកិច្ចមិនទាន់ហ៊ានធ្វើការសនិដ្ឋានថាឆេះមកពីបញ្ហាអ្វីនោះដែរ កំពុងស្រាវជ្រាវរកមូលហេតុបន្ត៕
