ភ្នំពេញ ៖ បុរសម្នាក់បានរងរបួសធ្ងន់ ត្រូវបានយកទៅសង្គ្រោះ នៅមន្ទីរពេទ្យភ្លាមៗ ដោយសារតែរូបគាត់ខឹង និងតូចចិត្តជាមួយប្រពន្ឋថា មិនយកចិត្តទុកដាក់និងមើលថែខ្លួន ឱ្យបានដិតដល់នោះ ក៏សម្រេចចិត្តលោតចុះពីលើផ្ទះជួលជាន់ទី៣ សំណាងល្អ មិនគ្រោះថ្នាក់ដល់អាយុជីវិត ដោយសារតែខាងក្រោមជាស្រះទឹក បង្កការភ្ញាក់ផ្អើលកាលពីវេលាម៉ោង៩នឹង៣០នាទីយប់ ថ្ងៃទី១៨ ខែឧសភា ឆ្នាំ២០១៥ នៅម្តុំផ្ទះជួលមួយកន្លែង ស្ថិតក្នុងភូមិកាកាប សង្កាត់ចោមចៅ ខណ្ឌពោធិ៍សែនជ័យ ។
តាមការឱ្យដឹងពីនារីជាប្រពន្ឋជនរងគ្រោះ បានឱ្យដឹងថា រូបនាងបានចេញទៅស្រុកកំណើត ប្រមាណជា៣ទៅ៤ថ្ងៃទៅហើយ ដោយទុកឱ្យបុរសជាប្តីនៅផ្ទះជួលតែម្នាក់ឯង ហើយនៅល្ងាចថ្ងៃកើតហេតុ រូបនាងបានត្រឡប់មកវិញ និងបានដាំបាយធ្វើម្ហូបទៅ ប្តីត្រឡប់មកពីធ្វើការសំណងវិញដូចសពដង ។ ប៉ុន្តែពេលបុរសជាប្តី ត្រឡប់មកវិញទាំងអាការៈស្រវឹងផងនោះ បានស្រែកឡូឡារ និងរករឿងរូបនាង ដោយបាននិយាយថា ទៅស្រុកចោលរូបខ្លួនយូរ និង
មិនបានយកចិត្តទុកដាក់ មើលថែខ្លួនឱ្យបានដិតដល់ ។ ប្រភពបន្តថា ដោយគ្រាន់តែទាស់ពាក្យសម្តីជាមួយគ្នាបន្តិចបន្តួចប៉ុណ្ណោះ ហើយមួយសន្ទុះក្រោយមក បុរសខាងលើក៏សម្រេចចិត្តលោតចុះពីលើផ្ទះ ជួលជាន់ទី៣តែម្តង បណ្តាលឱ្យរងរបួសធ្ងន់ធ្ងរ បង្កឱ្យមានការភ្ញាក់ផ្អើល រួចអ្នកជិតខាងបានទំនាក់ទំនងទៅ សមត្ថកិច្ច និងរថយន្តសាមុយឱ្យមកដឹកជនរងគ្រោះទៅសង្គ្រោះនៅមន្ទីរពេទ្យភ្លាមៗផងដែរ ។
នេះជាសំណងល្អហើយ ដែលមិនមានគ្រោះថ្នាក់ដល់អាយុជីវិត ដោយសារតែបុរសខាងលើ លោតចុះមក ធ្លាក់ចូលក្នុងស្រះទឹកនៅពីក្រោម ដោយគ្រាន់តែរបួសធ្ងន់តែប៉ុណ្ណោះ ។
បុរសដែលប៉ុនប៉ងលោតពីលើផ្ទះ សម្លាប់ខ្លួនខាងលើ ត្រូវបានគេស្គាល់ឈ្មោះ កែន បារាំង អាយុ២៧ឆ្នាំ មុខរបជាកម្មសំណង់ មានស្រុកកំណើត នៅខេត្តពោធិ៍សាត់ ចំណែកប្រពន្ធឈ្មោះ ហួន ស្រីល័ក្ខ អាយុ២៦ឆ្នាំ មុនរបរកម្មករោងចក្រ មានស្រុកកំណើតនៅស្រុកលលាផ្អៀរ ខេត្តកំពង់ឆ្នាំង នាក់ទាំង២ស្នាក់នៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ។
បើតាមការបញ្ជាក់ពីនារីជាប្រពន្ឋ គឺបុរសខាងលើ បានរៀបការជាមួយគ្នា រយះពេលជាច្រើនឆ្នាំមកហើយ ឱ្យតែនៅពេលដែលគេស្រវឹងស្រា នៅពេលត្រឡប់មកផ្ទះវិញ គឺតែងតែរករឿងរូបនាងជាញឹកញាប់ និងបានបោកប្រាស់របស់របរនៅក្នុងផ្ទះ ប៉ុន្តែមិនដែលប្រើអំពើរហិង្សាលើខ្លួននោះទេ ហើយរូបនាងបានសុំចែកផ្លូវគ្នាជាច្រើនដង តែបុរសប្តីមិនព្រម ៕
