ខេត្តបន្ទាយមានជ័យ៖ តាមពាក្យបណ្ដឹងចុះថ្ងៃទី១៨ខែឧសភាឆ្នាំ២០១៥របស់ឈ្មោះ ជ្រិនចាន់រៀម(ម្ចាស់ក្លឹបកំសាន្តវិមានរៀម)ភេទប្រុស អាយុ៣៨ឆ្នាំរស់ភូមិ អូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ បានប្ដឹងទៅលើឈ្មោះ នាក់ ឌីណាភេទប្រុស អាយុ
៥១ឆ្នាំនិងបក្សពួកចំនួន៣នាក់ទៀតពីបទបង្កអសន្តិសុខ ជេរប្រមាថគំរៀមសម្លាប់ទៅលើឈ្មោះ ជ្រិនចាន់រៀមកាលពីវេលាម៉ោង១និង៤៥នាទីនៅមជ្ឈមណ្ឌលកំសាន្តវិមានរៀមស្ថិតនៅភូមិនិងសង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ។ក្នុងពេលឈ្មោះ ជ្រិន ចាន់រៀមជាម្ចាស់ក្លឹបបានធ្វើការផ្លាស់ប្ដូរប្រព័ន្ធភ្លើងស្រាប់តែមានភ្ញៀវមួយតុដែលមានភ្ញៀវឈ្មោះ នាក់ឌីណាបានចូលទៅដល់បន្ទប់គណនេយ្យហើយបានស្រែកជេរឡូឡានៅទីនោះពេលនោះសន្តិសុខរបស់ក្លឹបបាននាំនាក់ឌីណាចេញមកក្រៅកុំឲ្យរំខានដល់អ្នកដទៃទៀតនិងសុំអោយ នាក់ឌីណាចេញពីក្លឹបត្រឡប់ទៅផ្ទះវិញដោយឃើញថានាក់ឌីណាស្រវឹងចូកជាំហើយតែនាក់ឌីណាមិនស្ដាប់ នៅតែជេរប្រមាថទៅលើម្ចាស់ក្លឹបបណ្ដាលអោយមានជំលោះឈ្លោះប្រកែកគ្នាកាន់តែខ្លាំង ក្រោយពីឈ្លោះប្រកែករួចបក្សពួកឌីណា៣នាក់ទៀតបាននាំឌីណាឡើងឡានហើយចាកចេញពីក្លឹបនោះទៅ។ ប្រហែលកន្លះម៉ោងក្រោយមកជ្រិនចារៀមជាម្ចាស់ក្លឹបបានឃើញ នាក់ឌីណានិងបក្សពួក៣នាក់ទៀតបានជិៈឡានកាត់មុខក្លឹបទៅមកៗហើយបានមកឈប់ចតនៅមុខក្លឹបពេលនោះជ្រិនចាន់រៀមឃើញសភាពការណ៍ដូច្នោះព្រោះនាក់ ឌីណាបានជេរប្រមាថនិងគំរៀមសម្លាប់ផងនោះទើបម្ចាស់ក្លឹបទូរស័ព្ទរាយការណ៍មកសមត្ថកិច្ចអាវុធហត្ថខេត្តដើម្បីជួយអន្តរាគមន៍។
ក្រោយពីទទួលបានព័ត៍មានភ្លាមកំលាំងអាវុធហត្ថក្រុងសិរីសោភ័ណចំនួ៥នាក់ដឹកនាំដោយលោកវរៈសេនីយ៍ត្រី យ៉ានសុវណ្ណមេបញ្ជាការមូលដ្ឋានអាវុធហត្ថក្រុងទៅដល់កន្លែងកើតហេតុហើយបានឃាត់ខ្លួននិងនាំខ្លួននាក់ឌីណានិងបក្សពួក៣នាក់ទៀតព្រមទាំងរថយន្ត១គ្រឿងម៉ាក Camery មកកាន់ការិយាល័យជំនាញដើម្បីធ្វើការសាកសួរស្រាវជ្រាវរឿងហេតុដែលបានកើតឡើង។ ក្រោយពីធ្វើការសាកសួរ នាក់ ឌីណាបានឆ្លើយថាពួកគេខឹងនឹងម្ចាស់ក្លឹបបិទភ្លើងដោយពួកគេមិនទាន់ឈប់ផឹកផង ប៉ុន្តែពួកគេមិនបានជេរប្រមាថនិងគំរៀមសម្លាប់ទៅលើម្ចាស់ក្លឹបនោះទេ។ ដោយមានការសង្ស័យលើជនទាំង៤នាក់នេះសមត្ថកិច្ចបានធ្វើតេស្តទឹកនោមលទ្ធផលបានបង្ហាញភស្ដុតាងបញ្ជាក់ថាជនទាំង៤នាក់នេះមានសារធាតុញៀននៅក្នុងខ្លួនទើបសមត្ថកិច្ចធ្វើការចោទប្រកាន់ពីបទប្រើប្រាស់គ្រឿងញៀន។បច្ចុប្បន្នសមត្ថកិច្ចកសាងសំណុំរឿងបញ្ជូនជនសង្ស័យទាំង៤ទៅសាលាដំបូងខេត្តដើម្បីចាត់ការតាមនិតិវិធីច្បាប់៕
