ស្វាយរៀង៖ បើកមកបុកជាមួយរថយន្តតួរីស ដឹកកម្មករយ៉ាងពេញទំហឹង នៅស្រុកកំពង់រោទិ៍ ខេត្តស្វាយរៀង តាមបណ្តោយផ្លូវជាតិលេខ១ មានករណីគ្រោះថ្នាក់ចរាចរណ៍មួយដ៏គួរឲ្យរន្ធត់ បានកើតទ្បើងរវាងរថយន្តទេសចរណ៍ របស់ក្រុមហ៊ុន ១៥SH កម្ពុជា-វៀតណាម នៅលើ
កំណាត់ផ្លូវជាតិលេខ១ កាលពីវេលាម៉ោង៦និង៤០នាទីព្រឹក ស្ថិតក្នុងភូមិដើមពោធិ៍ ឃុំស្វាយតាយាន ស្រុកកំពង់រោទិ៍ ខេត្តស្វាយរៀង ដែលព័ត៌មានបឋមនោះ មានកម្មករ កម្មការនី២១នាក់ បានបាតបង់ជីវិត និងមានកម្មករ កម្មការនី ជាច្រើននាក់ទៀតបានរងរបួសធ្ងន់-ស្រាល ។
បើតាមនគរបាលស្រុកកំពង់រោទិ៍ បានឲ្យដឹងថា ចំនួនកម្មករ កម្មការនី ដែលស្លាប់ទាំង២១នាក់នោះ មានបុរសម្នាក់ដែលគេស្គាលថា ជាអ្នកបើកបររថយន្ត ហើយកម្មករ កម្មការនីស្លាប់ទាំង២១នាក់នោះ សុទ្ធសឹងតែមានស្រុកកំណើត នៅភូមិព្រៃខ្លា ឃុំពោធិ៍រាជ ស្រុកស្វាយជ្រំ ចំណែកនៅក្នុងរថយន្តទេសចរណ៍១៥SH មានអ្នកជិះប្រមាណជាង២០នាក់ ប៉ុន្តែពុំមានអ្នកណាម្នាក់ស្លាប់នោះទេ ចំណែកអ្នកបើកបរជាជនជាតិវៀតណាម ត្រូវបានប៉ូលិសធ្វើការឃាត់ខ្លួនបានភ្លាមៗផងដែរ ។
យោងតាមសាក្សីនៅកន្លែងកើតហេតុ បានឲ្យដឹងថា រថយន្តទេសចរណ៍បានធ្វើដំណើរពីកើតមកលិច បើកបរក្នុងល្បឿនយ៉ាងលឿន រីឯរថយន្តដឹកកម្មករ កម្មការនី ធ្វើដំណើរពីលិចទៅកើត លុះមកដល់ចំណុចកើតហេតុ រថយន្តទេសចរណ៍បានជែងរថយន្តខាងមុខ ហើយក៏វាក់ជាមួយនឹងរថយន្តដឹកកម្មករ ហើយក៏បានបុកពីមុខពេញមួយទំហឹងតែ ម្តង ។
ក្រោយពេលកើតហេតុ គេសង្កេតឃើញមានសមត្ថកិច្ចជាច្រើន ចុះមកសំរួលចរាចរណ៍ នឹងដឹកសាកសព និងអ្នករងរបួសធ្ងន់-ស្រាល មកកាន់មន្ទីរពេទ្យខេត្តស្វាយរៀង ហើយក៏មានវត្តមានឯ,ឧ ជៀង អំ អភិបាល នៃគណៈអភិបាល ខេត្តស្វាយរៀង អភិបាលរងខេត្ត និង មន្ត្រីគ្រប់មន្ទីរក្នុងខេត្ត ចុះមកសួរសុខទុក្ខ និងចូលរួមរំលែកទុក្ខ ដល់អ្នករងរបួសទាំងអស់ និងក្រុងគ្រួសារ ក្នុងមន្ទីរពេទ្យផងដែរ ៕
