កំពង់ឆ្នាំង៖ យុវជន២នាក់ជាបងប្អូនបង្កើតបានរងរបួសធ្ងន់ធ្ងរ ក្រោយពេលពួកគេបានបើកម៉ូតូមានល្បឿនលឿននៅក្នុងក្រុងបានជែងរយន្តមួយគ្រឿងជ្រុលទៅបុករថយន្តដឹកដីពីក្រោយពេញទំហឹង។ហេតុការណ៍នេះបានកើតឡើងនៅវេលាម៉ោង១០និង២៥នាទីថ្ងៃទី១៩
ខែឧសភា ឆ្នាំ២០១៥ លើផ្លូវជាតិលេខ៥ នៅចំណុចស្ថានីយ៍ប្រេងតូតាល់ ស្ថិតក្នុងភូមិទី៨ សង្កាត់ខ្សាម ក្រុងកំពង់ឆ្នាំង។
សមត្ថកិច្ចនគរបាលចរាចរណ៍ក្រុងកំពង់ឆ្នាំងបានបញ្ជាក់អោយដឹងថា៖យុវជនទាំង២ជាបងប្អូនបង្កើតនឹងគ្នា មានឈ្មោះ កន មុន្នី អាយុ២៤ឆ្នាំ រងរបួសបែកលលាក្បាលពីមុខ និងម្នាក់ទៀតឈ្មោះ កន ពេជ្រ អាយុ២៥ឆ្នាំជាបង ជិះពីក្រោយ រងរបួសធ្ងន់ ពួកគេទាំង២នាក់រស់នៅភូមិទួលនាងសាវ ឃុំផាត់សណ្តាយ ស្រុកកំពង់ស្វាយ ខេត្តកំពង់ធំ។
មុនពេលកើតហេតុពួកគេទាំង២នាក់បានធ្វើដំណើរតាម៉ូតូម៉ាកស៊ុយស៊ុយគីអិចស៊ីឡូ ពណ៌ខ្មៅក្រហម ពាក់ផ្លាកលេខ កំពង់ធំ1F-4587 ក្នុងទិសដៅពីជើងទៅត្បូងតាមបណ្តោយ ផ្លូវជាតិលេខ៥ក្នុងល្បឿនលឿន លុះមកដល់ចំណុចកើតហេតុ ក៍បានជ្រែងរថយន្តមួយគ្រឿង ហើយបានជ្រុលទៅបុករថយន្ត ដឹកដីដែលកំពុងបើកបរស្របទិសគ្នាពីក្រោយពេញទំហឹង បណ្តាលអោយយុវជនទាំង២នាក់ ដួលបោកផ្ទប់ទៅទៅនឹងកន្ទុយរថយន្តដឹកដីរងរបួសយ៉ាងធ្ងន់ធ្ងរទាំងអស់គ្នាតែម្តង។
ក្រោយពេលកើតហេតុ សមត្ថកិច្ចបានហៅរថយន្តសង្គ្រោះបន្ទាន់ដឹកបញ្ជូនជនរងគ្រោះទៅសង្គ្រោះព្យាបាលនៅមន្ទីរពេទ្យខេត្តកំពង់ឆ្នាំង។ក្រោយពីពិនិត្យអ្នករបួសរួចមកលោកគ្រូពេទ្យខេត្តបានបញ្ជាក់អោយដឹងថា ឈ្មោះ កន មុន្នី ដែលជាអ្នកបើកបរម៉ូតូ បន្តមានសភាពធ្ងន់ធ្ងរ និងត្រូវបញ្ជូនទៅសង្គ្រោះនៅមន្ទីរពេទ្យភ្នំពេញ។
ដោយឡែករថយន្តដឹកដីវិញ ក្រោយពីម៉ូតូជនរងគ្រោះបានបុកពីក្រោយរួចមក គេបានបើកគេចបាត់តែម្តង រីឯម៉ូតូជនរងគ្រោះត្រូបានសមត្ថកិច្ចយមមករក្សាទុកនៅក្នុងអធិការដ្ឋាននគរបាលក្រុងកំពង់ឆ្នាំង កសាងសំណុំរឿងតាមផ្លូវច្បាប់៕
