កំពង់ឆ្នាំង៖ ក្រុមសមត្ថកិច្ចចំរុះថ្នាក់ខេត្តដឹកនាំដោយនាយការិយាល័យគ្រប់គ្រងអាវុធជាតិផ្ទុះ នៃស្នងការដ្ឋាននគរបាលខេត្ត និងជាអនុប្រធានអចិន្ត្រៃយ៍សមត្ថកិច្ចចំរុះ បានចុះត្រួតពិនិត្យរំសេវគ្រឿងផ្ទុះនៅការដ្ឋានវាយថ្ម២កន្លែងទៀត ដើម្បីរក្សាសន្តិសុខសុវត្ថិភាពជូនជាតិមាតុភូមិ
និងប្រជាពលរដ្ឋ ស្របតាមសេចក្តីសម្រេចលេខ៨២ ស ស រ ចុះថ្ងៃទី០៤ ខែឧសភា ឆ្នាំ២០១៥ របស់សាលាខេត្តកំពង់ឆ្នាំង។ការចុះត្រួតពិនិត្យនេះបានធ្វើឡើងនៅព្រឹកថ្ងៃទី១៩ ខែឧសភា ឆ្នាំ២០១៥ នៅទីតាំងអាជីវកម្មវាយថ្មភ្នំចំណុចភ្នំថ្លុកត្របែក និងការដ្ឋានវាយថ្មភ្នំតារាជតារូង ស្ថិតក្នុងឃុំពង្រ ស្រុករលាប្អៀរ។
នៅព្រឹកថ្ងៃទី១៩ ខែឧសភា ឆ្នាំ២០១៥ លោក កែវ ឈុន នាយការិយាល័យគ្រប់គ្រងអាវុធជាតិផ្ទុះ នៃស្នងការដ្ឋាននគរបាលខេត្ត និងជាអនុប្រធានអចិន្ត្រៃយ៍សមត្ថកិច្ចចំរុះបានអោយដឹងថា៖សមត្ថកិច្ចចំរុះដែលបានចុះធ្វើការងារខាងលើនេះរួមមាន មន្ត្រីកងរាជអាវុធហត្ថខេត្ត តំបន់សឹករងខេត្ត និងមន្ត្រីនគរបាលស្រុករលាប្អៀរ។ទីតាំងអាជីវកម្មការដ្ឋានវាយថ្មភ្នំថ្លុកត្របែកមានម្ចាស់ឈ្មោះ លោក ឡុច ចាន់ណារិទ្ធ មានអ្នកគ្រប់គ្រងរំសេវជាតិផ្ទុះជាជនជាតិខ្មែរ និងការដ្ឋានវាយថ្មភ្នំតារាជតារូងមានម្ចាស់ឈ្មោះ ឡឹក សុកាន់ មានអ្នកគ្រប់គ្រងរំសេវផ្ទុះក៍ជាជនជាតិខ្មែរដែរ។ការដ្ឋានវាយថ្មភ្នំទាំង២ខាងលើមានអាជ្ញាបណ្ណ័អាជីវកម្មត្រឹមត្រូវពីក្រសួងឧស្សាហកម្មដោយបានទទួលកាផ្គរត់ផ្គង់រំសេវ និងគ្រឿងផ្ទុះពីអគ្គស្នងការនគរបាលជាតិ។ការត្រួតពិនិត្យរំសេវ និងគ្រឿងផ្ទុះរវាងក្នុងឃ្ឡាំងស្តុក និងក្នុងបញ្ជីជាក់ស្តែងនៅព្រឹកថ្ងៃទី១៩ ខែឧសភា ឆ្នាំ២០១៥នេះ គឺមានភាពត្រឹមត្រូវ ហើយបានរក្សាទុកដាក់ក្នុងឃ្លាំងបានល្អតាមលក្ខណៈបច្ចេកទេស។
លោកបានបន្តថា៖ នេះជាលើកទី៣ហើយនៃការចុះត្រួតពិនិត្យរំសេវជាតិផ្ទុះ ដែលកាលពីលើកទី១គឺធ្វើនៅភ្នំដំរីរមៀល ហើយបានពិនិត្យការដ្ឋានចំនួន២ ក្នុងនោះការដ្ឋានមួយត្រូវបានផ្អាកអាជីវកម្មបណ្តោះអាស្នសិន ដោយសារតែលិខិត អនុញាតិអោយប្រើប្រាស់រំសេវជាតិផ្ទុះរបស់ការដ្ឋានគាត់ផុតសុពលភាព និងការដ្ឋានទី២គឺការដ្ឋានភ្នំជើងភ្នំ ដែលមានអ្នកគ្រប់គ្រងរំសេវជាតិផ្ទុះជាជនជាតិបរទេស ហើយការដ្ឋានភ្នំជើងភ្នំនេះសមត្ថកិច្ចចំរុះបានប្រាប់អោយប្តូអ្នកគ្រប់គ្រងរំសេវដោយតំរូវអោយដាក់អ្នកគ្រប់គ្រងជាជាតិខ្មែរវិញស្របទៅតាមច្បាប់គ្រប់គ្រងអាវុធជាតិផ្ទុះ។ការត្រួតពិនិត្យនេះ ត្រូវធ្វើជាបន្តបន្ទាប់រហូត ហើយនឹងបញ្ចប់នៅសប្តាហ៍ក្រោយ ដោយត្រូវពិនិត្យទាំង៧ការដ្ឋានដែលកំពុងដំណើរការអាជីកម្មក្នុងចំណោម១២ការដ្ឋាន។
សមត្ថកិច្ចចំរុះបានសំណូមពរអោយម្ចាស់ការដ្ឋានទាំង២ យកចិត្តទុកដាក់បន្ថែមលើការរក្សាទុកនូវរំសេវជាតិផ្ទុះ និងត្រូវផ្តល់ដំណឹងជូនសមត្ថកិច្ចជំនាញមុននឹងធ្វើការបំផ្ទុះម្តងៗ លើសពីនេះក្រុមសមត្ថកិច្ចចំរុះ បានណែនាំនិងបំពេញបន្ថែមដល់អ្នកគ្រប់គ្រងរំសេវជាតិផ្ទុះទាំង២ការដ្ឋាននូវបច្ចេកទេសគ្រប់គ្រងរក្សាទុកគ្រឿងផ្ទុះបន្ថែមទៀតអោយបានល្អផងដែរ។
លោកបានបញ្ជាក់ថា៖ការដ្ឋានធ្វើអាជីវកម្មកិនថ្មភ្នំក្នុងខេត្តសរុបរួមមាន១២ការដ្ឋាន កំពុងដំណើរការសព្វថ្ងៃមាន៧ការដ្ឋាន ចំណែកការចុះពិនិត្យរំសេវនិងគ្រឿផ្ទុះនិងត្រូវចុះពិនិត្យគ្រប់ការដ្ឋានទាំងអស់ជាប្រចាំខែ ដើម្បីរក្សាការពាសន្តិសុខជាតិ និងសុវត្តិភាពជូនប្រជាពលរដ្ឋ ទប់ស្កាត់អោយបាននូវអំពើភេរវកម្មផ្សេងៗមិនអោយកើតមាននៅក្នុងប្រទេសកម្ពុជា៕ 
