ភ្នំពេញ ៖ រថយន្តលុចស៊ីសមួយគ្រឿងមិនចាំស្លាកលេខបានបោះពួយយ៉ាងលឿនជ្រុលទៅបុកម៉ូតូមួយគ្រឿងម៉ាកហុងដាឌ្រីម ធុនសេ១២៥ បណ្ដាលបុរស៣នាក់រងរបួសស្រាល ហើយម៉ូតូគៀបជាប់ក្រោមរថយន្តអូសបែកផ្កាភ្លើង ប្រហែល១០០ម៉ែត្រ ដែលហេតុការណ៍នេះបានកើតឡើង
នៅវេលាម៉ោង ៩និង៣០នាទីយប់ថ្ងៃទី០៩ ខែមេសាឆ្នាំ២០១៤ ចំណុចផ្លូវ៥៩៨កែងផ្លូវ៣១៥ ស្ថិតនៅក្នុងសង្កាត់បឹងកក់ទី១ ខណ្ឌទួលគោក។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុ គេឃើញរថយន្តឡិចស៊ីស៤៧០ ពណ៌ខ្មៅ មិនស្គាល់ស្លាកលេខ បើកដោយបុរសម្នាក់ក្នុងល្បឿនលឿនដូចហោះតាមបណ្ដោយផ្លូវ ៥៩៨ ទិសដៅពីត្បូងទៅជើង ស្រាប់តែមកដល់ចំណុចកើតហេតុ កែងនិងផ្លូវ៣១៥រថយន្តក៏ជ្រុលចង្កូតទៅបុកម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ ភ្នំពេញ 1AL-6636 បណ្តាលឱ្យអ្នកជិះម៉ូតូទាំង៣នាក់ខ្ទាតចេញពីម៉ូតូរងរបួសស្រាល ចំណែករថយន្តព្យាយាមបានបើករត់គេច ទាំងម៉ូតូគៀបជាប់ពីក្រោមរថយន្តបណ្តាលឱ្យអូសបែកផ្កាភ្លើងប្រហែល១០០ម៉ែត្រ ហើយរថយន្តបង្ក បានរីយ៉ែថយថយក្រោយដើម្បីទម្លាក់ម៉ូតូចុះ រួចបើករត់គេចបាត់ស្រមោលតែម្តង។
បន្ទាប់ពីកើតហេតុជនរងគ្រោះរបួសស្រាលទាំង៣នាក់ត្រូវបានរថយន្តសាមុយ ដឹកយកទៅសង្គ្រោះនៅមន្ទីរពេទ្យភ្លាមៗ ចំណែកឯម៉ូតូ ត្រូវសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌទួលគោក ចំណែរថយន្តបង្កសមត្ថកិច្ចបានស្គាល់ស្លាកលេខ ហើយ និងកំពុងស្រាវជ្រាវស្វែងរកដើម្បីធ្វើការដោះស្រាយតាមផ្លូវច្បាប់៕
